പൊലീസിൽ പരാതി നൽകിയതിന്റെ വൈരാഗ്യം?;കൊച്ചിയിൽ സിനിമാ ഫൈറ്റ് മാസ്റ്ററായ യുവതിക്ക് നേരെ ഗുണ്ടാ ആക്രമണം

JUNE 15, 2026, 1:55 AM

കൊച്ചി: സിനിമാ മേഖലയിൽ ഫൈറ്റ് മാസ്റ്ററായി പ്രവർത്തിക്കുന്ന യുവതിക്ക് നേരെ ക്രൂര ആക്രമണം നടന്നതായി പരാതി. ലഹരിമരുന്ന് കേസിലെ പ്രതിയായ യൂസഫും സംഘവും ചേർന്നാണ് ആക്രമണം നടത്തിയതെന്നാണ് ആരോപണം. സംഭവത്തിൽ പൊലീസ് അന്വേഷണം ആരംഭിച്ചു.

കഴിഞ്ഞ ദിവസം രാത്രി കലൂർ സ്റ്റേഡിയത്തിനുസമീപത്താണ് സംഭവം. ‘കാളി’ എന്ന പേരിൽ സിനിമാ മേഖലയിലെ ഫൈറ്റ് മാസ്റ്ററായി അറിയപ്പെടുന്ന യുവതിയാണ് ആക്രമണത്തിനിരയായത്. കല്ലെറിഞ്ഞ് വീഴ്ത്തിയ ശേഷം യുവതിയെ മർദിച്ചതായാണ് പരാതി.

മുമ്പ് യൂസഫ് യുവതിയോട് അപമര്യാദയായി പെരുമാറിയതിനെ തുടർന്ന് അവർ പൊലീസിൽ പരാതി നൽകിയിരുന്നു. ഈ പരാതിയുടെ വൈരാഗ്യമാണ് ആക്രമണത്തിന് പിന്നിലെന്നാണ് യുവതി ആരോപിക്കുന്നത്.

സംഭവസമയത്ത് 25ഓളം പേർ അടങ്ങുന്ന സംഘം ആക്രമണത്തിൽ പങ്കെടുത്തതായി യുവതി ആരോപിച്ചു. ആക്രമണത്തിൽ പരിക്കേറ്റ യുവതിയെ സുഹൃത്തുക്കൾ ചേർന്നാണ് ആശുപത്രിയിലെത്തിച്ചത്.

അതേസമയം, ആക്രമണം നടന്ന സമയത്ത് സഹായത്തിനായി ശ്രമിച്ചിട്ടും പൊലീസ് ഉടൻ സ്ഥലത്തെത്തിയില്ലെന്നും പൊലീസ് വാഹനമൊന്നും സംഭവസ്ഥലത്ത് എത്തിയില്ലെന്നും പരാതിയുണ്ട്.

സംഭവത്തിൽ കൂടുതൽ അന്വേഷണം നടത്തിവരികയാണെന്ന് പൊലീസ് അറിയിച്ചു. ആക്രമണവുമായി ബന്ധപ്പെട്ട ആരോപണങ്ങളിൽ പ്രതിഭാഗത്തിന്റെ പ്രതികരണം ഇതുവരെ പുറത്തുവന്നിട്ടില്ല.