കീഴടക്കിയ പ്രദേശങ്ങള്‍ പരസ്പരം കൈമാറി യുദ്ധമവസാനിപ്പിക്കാൻ തയ്യാറെന്ന് സെലെൻസ്‌കി

FEBRUARY 12, 2025, 9:22 AM

കീവ്: യുഎസ് പ്രസിഡന്റ് ഡൊണാൾഡ് ട്രംപിന്റെ മധ്യസ്ഥതയിൽ റഷ്യയും ഉക്രെയ്നും ചർച്ചകൾക്ക് തയ്യാറായാൽ, ഇരു രാജ്യങ്ങളും പിടിച്ചെടുത്ത പ്രദേശങ്ങൾ പരസ്പരം കൈമാറാൻ ഉക്രെയ്ൻ നിർദ്ദേശിക്കുമെന്ന് റിപ്പോർട്ട്. ഗാർഡിയന് നൽകിയ അഭിമുഖത്തിലാണ് സെലെൻസ്‌കി ഇക്കാര്യം വ്യക്തമാക്കിയത്.

ഉക്രെയ്നിൽ റഷ്യ കൈവശപ്പെടുത്തിയിരിക്കുന്ന പ്രദേശങ്ങൾക്ക് പകരമായി ഉക്രെയ്ൻ അധിനിവേശ കുർസ്ക് മേഖല റഷ്യയ്ക്ക് നൽകുമെന്ന് ഉക്രെയ്ൻ പ്രസിഡന്റ് വോളോഡിമർ സെലെൻസ്‌കി പറഞ്ഞു.

കുർസ്ക് മേഖല റഷ്യയ്ക്ക് നൽകുമെന്ന് അദ്ദേഹം പറഞ്ഞു. റഷ്യൻ നിയന്ത്രണത്തിലുള്ള ഏതൊക്കെ പ്രദേശങ്ങളാണ് പകരമായി തിരികെ നൽകേണ്ടതെന്ന് ചോദിച്ചപ്പോൾ, എല്ലാ പ്രദേശങ്ങളും പ്രധാനപ്പെട്ടതാണെന്നും മുൻഗണനകളില്ലെന്നും സെലെൻസ്‌കി മറുപടി നൽകി.

2014 ലാണ് റഷ്യ യുക്രൈനില്‍ നിന്ന് ക്രിമിയ പിടിച്ചെടുത്തത്. പിന്നീട് 2022 ല്‍ ഡോണെസ്ക്, ഖെർസണ്‍, ലുഹൻസ്ക്, സപ്പോറിഷിയ എന്നിവിടങ്ങളും പിടിച്ചെടുത്തു. അതേസമയം, അമേരിക്കയുടെ മധ്യസ്ഥതയിൽ യുദ്ധം അവസാനിപ്പിക്കാൻ റഷ്യയും ഉക്രെയ്‌നും ഒരു കരാറിൽ എത്തിയാൽ, അതിൽ കർശനമായ സുരക്ഷാ ഗ്യാരണ്ടികളും ഉൾപ്പെടുത്തണമെന്ന് സെലെൻസ്‌കി പറഞ്ഞു.

നാറ്റോ അംഗത്വം, സമാധാന സേനയുടെ വിന്യാസം എന്നിവയുൾപ്പെടെയുള്ള സൈനിക പ്രതിബദ്ധതകൾ ഉൾപ്പെടുന്ന വ്യവസ്ഥകൾ കരാറിൽ ഉൾപ്പെടുത്തണമെന്ന് ഉക്രെയ്‌ൻ ആഗ്രഹിക്കുന്നു.