ബാറ്റിംഗ് ഗ്രൂപ്പിലോ ബൗളിംഗ് ഗ്രൂപ്പിലോ ഞങ്ങൾക്ക് മറ്റ് എന്തൊക്കെ ഓപ്ഷനുകൾ ഉണ്ടെന്ന് നോക്കേണ്ടതുണ്ട്: ഹാർദ്ദിക് പാണ്ഡ്യ

APRIL 13, 2026, 10:18 AM

ഞായറാഴ്ച വാംഖഡെ സ്റ്റേഡിയത്തിൽ നടന്ന ആവേശം നിറഞ്ഞ ഐ.പി.എൽ 2026 പോരാട്ടത്തിൽ റോയൽ ചലഞ്ചേഴ്‌സ് ബെംഗളൂരുവിനോട് 18 റൺസിന് പരാജയപ്പെട്ടതിന് പിന്നാലെ ടീമിൽ കാര്യമായ മാറ്റങ്ങളുണ്ടാകുമെന്ന സൂചനയുമായി മുംബൈ ഇന്ത്യൻസ് നായകൻ ഹാർദിക് പാണ്ഡ്യ.
രണ്ട് ഇന്നിംഗ്‌സുകളിലും മുംബൈ നിരന്തരം പിന്നിലായിപ്പോകുകയായിരുന്നു. ബാറ്റിംഗ്, ബൗളിംഗ് നിരകളിൽ വലിയ മാറ്റങ്ങൾ വരുത്തേണ്ടി വന്നാലും ടീം തങ്ങളുടെ സമീപനത്തെക്കുറിച്ച് പുനർചിന്തനം നടത്തുമെന്ന് പാണ്ഡ്യ പറഞ്ഞു.

'ധാരാളം വിക്കറ്റുകൾ നഷ്ടമായി. അതേ സമയം തന്നെ ഞങ്ങൾ വളരെയധികം റൺസ് വഴങ്ങിയതായും ഞാൻ കരുതുന്നു. കളി എപ്പോഴും ഞങ്ങൾക്ക് പിന്നാലെ ഓടി പിടിക്കേണ്ട അവസ്ഥയിലായിരുന്നു. കഴിഞ്ഞ രണ്ട് മത്സരങ്ങളിലും, ഒരു ബൗളിംഗ് യൂണിറ്റ് എന്ന നിലയിലും ബാറ്റിംഗ് യൂണിറ്റ് എന്ന നിലയിലും, കളി നിയന്ത്രിക്കുന്നതിന് പകരം ഞങ്ങൾ കളിക്ക് പിന്നാലെ ഓടുകയായിരുന്നു' അദ്ദേഹം പറഞ്ഞു.

ടൂർണമെന്റിൽ ഫോം കണ്ടെത്താൻ ടീം പാടുപെടുകയാണെന്നും തങ്ങളുടെ ശൈലി പുനർചിന്തനം ചെയ്യണമെന്നും ഹാർദിക് സമ്മതിച്ചു. 'ഞങ്ങൾക്ക് ശരിക്കും ചിന്തിക്കേണ്ടതുണ്ട്, ഞങ്ങൾക്ക് ചെയ്യാൻ കഴിയുന്ന ഏറ്റവും മികച്ച കാര്യങ്ങൾ എന്താണെന്നും, ഞങ്ങൾക്ക് ആവശ്യമായ സ്പീഡും ക്ലിക്കും എങ്ങനെ നേടാമെന്നും നോക്കേണ്ടതുണ്ട്. ഇനി ഞങ്ങൾക്ക് കുറച്ച് ദിവസത്തെ ഇടവേളയുണ്ട്, അതിനുശേഷം ഞങ്ങൾ വീണ്ടും കളിക്കും. വളരെ സത്യസന്ധമായി പറഞ്ഞാൽ, ഇപ്പോൾ പല കാര്യങ്ങളും പുനർചിന്തനം ചെയ്യേണ്ടതുണ്ട്. കാര്യങ്ങൾ ഉദ്ദേശിച്ച രീതിയിൽ നടക്കുന്നില്ല. ഒരുപക്ഷേ ബാറ്റിംഗ് ഗ്രൂപ്പിലോ ബൗളിംഗ് ഗ്രൂപ്പിലോ ഞങ്ങൾക്ക് മറ്റ് എന്തൊക്കെ ഓപ്ഷനുകൾ ഉണ്ടെന്ന് നോക്കേണ്ടതുണ്ട് ' അദ്ദേഹം പറഞ്ഞു.