ക്രിസ്റ്റൽ പാലസിനെ തോൽപ്പിച്ച് ടോട്ടൻഹാം ഹോട്‌സ്പർ

JANUARY 2, 2026, 3:19 AM

ഇംഗ്ലീഷ് പ്രീമിയർ ലീഗ് ഫുട്‌ബോളിൽ ക്രിസ്റ്റൽ പാലസിനെതിരെ ടോട്ടൻഹാം ഹോട്‌സ്പറിന് ജയം. മത്സരത്തിൽ എതിരില്ലാത്ത ഒരു ഗോളിനാണ് ടോട്ടൻഹാം വിജയിച്ചത്.

ഒന്നാം പകുതിയുടെ അവസാന നിമിഷങ്ങളിൽ യുവതാരം ആർച്ചി ഗ്രേ നേടിയ ഗോളാണ് സ്പർസിന് നിർണ്ണായക വിജയം സമ്മാനിച്ചത്. ഈ ജയത്തോടെ 25 പോയിന്റുമായി ടോട്ടനം പട്ടികയിൽ 11-ാം സ്ഥാനത്തേക്ക് ഉയർന്നപ്പോൾ, പരാജയപ്പെട്ടെങ്കിലും 26 പോയിന്റുള്ള പാലസ് ഒൻപതാം സ്ഥാനത്ത് തുടരുന്നു.

മത്സരത്തിന്റെ തുടക്കം മുതൽ പന്തടക്കത്തിലും ആക്രമണത്തിലും ആതിഥേയരായ ക്രിസ്റ്റൽ പാലസിനായിരുന്നു ആധിപത്യം. അഞ്ചാം മിനിറ്റിൽ തന്നെ ലഭിച്ച അപകടകരമായ ഒരു ഫ്രീ കിക്ക് ടോട്ടനം പ്രതിരോധത്തെ വിറപ്പിച്ചു. ജീൻഫിലിപ്പ് മാറ്റെറ്റയും യെറെമി പിനോയും ലഭിച്ച സുവർണ്ണാവസരങ്ങൾ പാഴാക്കിയത് പാലസിന് തിരിച്ചടിയായി. ടോട്ടനം ഗോൾകീപ്പർ ഗുഗ്ലിയെൽമോ വികാരിയോയുടെ മികച്ച സേവുകളും സ്പർസ് പ്രതിരോധത്തെ ഉറച്ചുനിൽക്കാൻ സഹായിച്ചു. കളിയുടെ 17-ാം മിനിറ്റിൽ റിച്ചാർലിസൺ പാലസ് വല കുലുക്കിയെങ്കിലും വാർപരിശോധനയിൽ അത് ഓഫ്‌സൈഡാണെന്ന് കണ്ടെത്തി ഗോൾ നിഷേധിച്ചു.

എന്നാൽ 42-ാം മിനിറ്റിൽ സ്പർസ് കാത്തിരുന്ന ഗോൾ പിറന്നു. പെഡ്രോ പോറോ എടുത്ത കോർണർ കിക്കിൽ നിന്ന് പന്ത് സ്വീകരിച്ച റിച്ചാർലിസൺ അത് കൃത്യമായി ആർച്ചി ഗ്രേയ്ക്ക് കൈമാറി. ഒട്ടും പിഴയ്ക്കാതെ താരം പന്ത് തലകൊണ്ട് പാലസ് വലയിലേക്ക് എത്തിക്കുകയായിരുന്നു. ആർച്ചി ഗ്രേയുടെ ഈ സീസണിലെ ആദ്യ സീനിയർ ഗോൾ കൂടിയാണിത്. ആദ്യ പകുതിയിൽ 11 ഷോട്ടുകൾ പാലസ് ഉതിർത്തെങ്കിലും രണ്ടെണ്ണം മാത്രമാണ് ലക്ഷ്യത്തിലേക്ക് എത്തിയത്.

രണ്ടാം പകുതിയിൽ സമനിലയ്ക്കായി പാലസ് കിണഞ്ഞു പരിശ്രമിച്ചെങ്കിലും ടോട്ടനത്തിന്റെ പ്രതിരോധം ഭേദിക്കാനായില്ല. എഡ്ഡി എൻകെറ്റിയയെയും മറ്റും ഇറക്കി പാലസ് പരിശീലകൻ ഒലിവർ ഗ്ലാസ്‌നർ ആക്രമണം ശക്തമാക്കിയപ്പോൾ, ജോവോ പാലിഞ്ഞയെയും ബ്രണ്ണൻ ജോൺസണെയും കളത്തിലിറക്കി തോമസ് ഫ്രാങ്ക് പ്രതിരോധം ഉറപ്പിച്ചു. മത്സരത്തിന്റെ അവസാന മിനിറ്റുകളിൽ ടോട്ടനം നേടിയ മറ്റൊരു ഗോൾ കൂടി ഓഫ്‌സൈഡ് വിധിയിൽ റദ്ദാക്കപ്പെട്ടു. ഇഞ്ചുറി ടൈമിൽ ലഭിച്ച അവസരങ്ങൾ പാലസ് താരങ്ങൾ പുറത്തേക്ക് അടിച്ചതോടെ ടോട്ടനം വിജയം ഉറപ്പാക്കുകയായിരുന്നു.