മുംബൈ: ലോക ടെസ്റ്റ് ചാമ്പ്യന്‍ഷിപ്പിലും ചാമ്പ്യന്‍സ് ട്രോഫിയിലും രോഹിത് ശര്‍മ്മ ഇന്ത്യയെ നയിക്കുമെന്ന് ബിസിസിഐ സെക്രട്ടറി ജയ് ഷാ സ്ഥിരീകരിച്ചു. രണ്ട് അന്താരാഷ്ട്ര ക്രിക്കറ്റ് കൗണ്‍സില്‍ ഇവന്റുകളിലും ഇന്ത്യ വിജയിക്കുമെന്നും അദ്ദേഹം ആത്മവിശ്വാസം പ്രകടിപ്പിച്ചു. 

രോഹിത് ശര്‍മ്മയുടെ നേതൃത്വത്തിലുള്ള ടീം ടി20 ലോകകപ്പ് നേടുമെന്ന തന്റെ വാക്കുകള്‍ സത്യമായതില്‍ ജയ് ഷാ സന്തോഷം പ്രകടിപ്പിച്ചു. 2023ലെ ഏകദിന ലോകകപ്പ് ഫൈനലിലെ ഹൃദയഭേദകമായ തോല്‍വിയാണ് യുഎസ്എയിലും വെസ്റ്റ് ഇന്‍ഡീസിലുമായി നടന്ന ടി20 ലോകകപ്പില്‍ ചരിത്രം എഴുതാന്‍ ഇന്ത്യന്‍ ടീമിനെ പ്രേരിപ്പിച്ചതെന്നും ഷാ കൂട്ടിച്ചേര്‍ത്തു.

'നവംബര്‍ 23 ന്, 10 മത്സരങ്ങള്‍ വിജയിച്ച് ഞങ്ങള്‍ ഹൃദയങ്ങള്‍ കീഴടക്കിയിരുന്നു. പക്ഷേ ഞങ്ങള്‍ക്ക് ഏകദിന ലോകകപ്പ് നേടാനായില്ല. ജൂണ്‍ 29 ന് ഞങ്ങള്‍ ഹൃദയങ്ങള്‍ക്കൊപ്പം കപ്പ് നേടുമെന്നും ബാര്‍ബഡോസില്‍ വിജയപതാക ഉയര്‍ത്തുമെന്നും ഞാന്‍ രാജ്കോട്ടില്‍ പറഞ്ഞു. ക്യാപ്റ്റന്‍ അത് അവിടെ ഉയര്‍ത്തി,'' ബിസിസിഐ പങ്കിട്ട വീഡിയോയില്‍ ജയ് ഷാ പറഞ്ഞു.

ഇന്ത്യയുടെ ലോകകപ്പ് താരങ്ങള്‍ ജൂലൈയില്‍ ആരംഭിക്കുന്ന ശ്രീലങ്കന്‍ പര്യടനത്തിനിടെ കളിക്കളത്തിലേക്ക് മടങ്ങും. മുതിര്‍ന്ന താരങ്ങള്‍ അടുത്ത 12 മാസത്തേക്ക് ടെസ്റ്റിലും ഏകദിനത്തിലും ശ്രദ്ധ കേന്ദ്രീകരിക്കാനാണ് സാധ്യത. സിംബാബ്വെയില്‍ ആരംഭിച്ച ടി20 പരമ്പരയില്‍ ജൂനിയര്‍ താരങ്ങളാണ് ഇന്ത്യയെ പ്രതിനിധീകരിക്കുന്നത്.

2023-25 ലോക ടെസ്റ്റ് ചാംപ്യന്‍ഷിപ്പ് സൈക്കിളില്‍ ഒമ്പത് ടെസ്റ്റുകളില്‍ ആറ് വിജയങ്ങളുമായി ഇന്ത്യ നിലവില്‍ ഒന്നാമതാണ്. ഓസ്ട്രേലിയയില്‍ 5 ടെസ്റ്റുകളുടെ ബോര്‍ഡര്‍-ഗവാസ്‌കര്‍ പരമ്പരയില്‍ ഓസ്ട്രേലിയയെ നേരിടുന്നതിന് മുമ്പ് ഇന്ത്യ ബംഗ്ലാദേശിനെയും ന്യൂസിലന്‍ഡിനെയും ഹോം ടെസ്റ്റുകളില്‍ നേരിടും. 2025 ഫെബ്രുവരി-മാര്‍ച്ച് മാസങ്ങളില്‍ ചാമ്പ്യന്‍സ് ട്രോഫി നടക്കും.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്