അർജന്റൈൻ ഫുട്ബോൾ ഇതിഹാസം ലിയോണൽ മെസ്സി സ്പാനിഷ് ഫുട്ബോളിലേക്ക് ബിസിനസ്സ് നിക്ഷേപങ്ങളുമായി വീണ്ടും എത്തുന്നു. സ്പാനിഷ് രണ്ടാം ഡിവിഷൻ ക്ലബ്ബായ സിഡി എൽഡെൻസെയുടെ പൂർണ്ണ ഉടമസ്ഥാവകാശം ഏറ്റെടുക്കാൻ മെസ്സി നിലവിലെ ഉടമകളുമായി ധാരണയിലെത്തിയതായി വിദേശ മാധ്യമങ്ങൾ റിപ്പോർട്ട് ചെയ്യുന്നു. മറ്റാരെയും പങ്കാളികളാക്കാതെ, പൂർണ്ണമായും സ്വന്തം നിക്ഷേപത്തിലൂടെയായിരിക്കും മുപ്പത്തിയൊൻപതുകാരനായ മെസ്സി ക്ലബ്ബിന്റെ മുഴുവൻ ഓഹരികളും സ്വന്തമാക്കുക.
നിയമപരമായ നടപടിക്രമങ്ങളും സാമ്പത്തിക പരിശോധനകളും പൂർത്തിയാകുന്നതോടെ അടുത്ത ദിവസങ്ങളിൽ തന്നെ കരാർ ഔദ്യോഗികമായി ഒപ്പുവെക്കും. സ്പാനിഷ് നാഷണൽ സ്പോർട്സ് കൗൺസിലിന്റെ അംഗീകാരവും ഇതിനായി ആവശ്യമാണ്. നിലവിൽ ലാ ലിഗ ടുവിൽ മത്സരിക്കുന്ന എൽഡെൻസെയെ സ്വന്തമാക്കുന്നതോടെ, താൻ കരിയറിന്റെ ഭൂരിഭാഗവും ചെലവഴിച്ച സ്പെയിനിലെ ഫുട്ബോൾ മേഖലയിൽ കൂടുതൽ സജീവമാകാൻ മെസ്സിക്ക് സാധിക്കും.
ഈ വർഷം ഏപ്രിലിൽ സ്പാനിഷ് മൂന്നാം ഡിവിഷൻ ക്ലബ്ബായ യുഇ കോർനെല്ലയുടെ മുഴുവൻ ഓഹരികളും മെസ്സി സ്വന്തമാക്കിയിരുന്നു. എന്നാൽ കോർനെല്ലയേക്കാൾ ഉയർന്ന തലത്തിലുള്ള പ്രൊഫഷണൽ ലീഗിൽ മത്സരിക്കുന്ന ക്ലബ്ബാണ് എൽഡെൻസെ. ഇന്റർ മയാമിയിലെ കളിജീവിതത്തിന് ശേഷം സ്പെയിനിലേക്ക് മടങ്ങിയെത്താൻ ആഗ്രഹിക്കുന്ന മെസ്സിക്ക് ഈ പുതിയ നിക്ഷേപം വലിയൊരു ചുവടുവെപ്പാണ്.
നിലവിൽ ലീഗിലെ ആദ്യ നാല് മത്സരങ്ങളിൽ നിന്ന് രണ്ട് പോയിന്റ് മാത്രം നേടി പോയിന്റ് പട്ടികയിൽ പിന്നിലുള്ള എൽഡെൻസെ തങ്ങളുടെ പരിശീലകനെ പുറത്താക്കി പ്രതിസന്ധിയിലൂടെ കടന്നുപോകുന്ന സമയത്താണ് മെസ്സിയുടെ വരവ്. എട്ട് തവണ ബലോൺ ഡി ഓർ പുരസ്കാരവും ലോകകപ്പും സ്വന്തമാക്കിയ ഫുട്ബോൾ ചരിത്രത്തിലെ ഏറ്റവും മികച്ച താരം ഉടമസ്ഥാവകാശ രംഗത്തേക്ക് വരുന്നത് ക്ലബ്ബിന്റെ വളർച്ചയ്ക്ക് വലിയ ഊർജ്ജം നൽകുമെന്നാണ് ആരാധകരുടെ പ്രതീക്ഷ.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260908031330.jpg)
