ന്യൂയോര്‍ക്ക്: രാജസ്ഥാന്‍ റോയല്‍സിനായി 14 ാം വയസില്‍ ചരിത്രപരമായ ഐപിഎല്‍ അരങ്ങേറ്റം നടത്തിയ വൈഭവ് സൂര്യവംശിയെ പ്രശംസിച്ച് ഗൂഗിള്‍ സിഇഒയും ക്രിക്കറ്റ് ആരംധകനുമായ സുന്ദര്‍ പിച്ചൈ. ലഖ്നൗ സൂപ്പര്‍ ജയന്റ്സിനെതിരായ മത്സരത്തില്‍ ഷാര്‍ദുല്‍ താക്കൂറിന്റെ ആദ്യ പന്തില്‍ തന്നെ സിക്സ് നേടിയ കൗമാര താരത്തിന്റെ നിര്‍ഭയമായ ബാറ്റിംഗ് പ്രകടനത്തെ പിച്ചൈ തന്റെ ഔദ്യോഗിക എക്സ് അക്കൗണ്ടിലൂടെ പ്രശംസിച്ചു.

എട്ടാം ക്ലാസുകാരന്റെ അരങ്ങേറ്റത്തിന് സാക്ഷ്യം വഹിക്കാന്‍ ആര്‍ആര്‍-എല്‍എസ്ജി മത്സരം തത്സമയം കാണാന്‍ താന്‍ നേരത്തെ ഉണര്‍ന്നെന്ന് സുന്ദര്‍ പിച്ചൈ പറഞ്ഞു. 

'ഐപിഎല്ലില്‍ എട്ടാം ക്ലാസുകാരന്റെ കളി കാണാന്‍ ഉണര്‍ന്നു, എന്തൊരു അരങ്ങേറ്റം!', പിച്ചൈയുടെ പോസ്റ്റ് ഇങ്ങനെയായിരുന്നു.

എല്‍എസ്ജിക്കെതിരായ 181 റണ്‍സിന്റെ വിജയലക്ഷ്യം പിന്തുടര്‍ന്ന രാജസ്ഥാനു വേണ്ടി ഇന്നിംഗ്‌സ് ഓപ്പണ്‍ ചെയ്ത വൈഭവ് സൂര്യവംശി പരിക്കേറ്റ സഞ്ജു സാംസണിന് പകരക്കാരനായാണ് ടീമിലെത്തിയത്. കൗമാര താരത്തിന്റെ ആത്മവിശ്വാസത്തോടെയുള്ള സ്‌ട്രോക്ക്‌പ്ലേ എല്ലാവരെയും വിസ്മയിപ്പിച്ചു.

ഐപിഎല്‍ ലേല ചരിത്രത്തിലെ ഏറ്റവും പ്രായം കുറഞ്ഞ കളിക്കാരനായി ആര്‍ആര്‍ തിരഞ്ഞെടുത്തതുമുതല്‍, സൂര്യവംശിയെ ചുറ്റിപ്പറ്റിയുള്ള ആവേശം വളരെ വലുതായിരുന്നു. അരങ്ങേറ്റത്തില്‍ തന്നെ അദ്ദേഹം പ്രതീക്ഷകള്‍ക്ക് അനുകൂലമായി പ്രവര്‍ത്തിച്ചു. 20 പന്തില്‍ നിന്ന് 34 റണ്‍സ് നേടിയ വൈഭവിനെ മാര്‍ക്രമിന്റെ ബൗളിംഗില്‍ ഋഷഭ് പന്ത് സ്റ്റമ്പ് ചെയ്ത് പുറത്താക്കുകയായിരുന്നു. കരഞ്ഞുകൊണ്ടാണ് വൈഭവ് മൈതാനം വിട്ടത്.

സൂര്യവംശിയും ജയ്സ്വാളും ചേര്‍ന്ന് 85 റണ്‍സിന്റെ ഓപ്പണിംഗ് കൂട്ടുകെട്ട് പടുത്തുയര്‍ത്തിയെങ്കിലും, രാജസ്ഥാന്റെ മധ്യനിരയ്ക്ക് വിജയലക്ഷ്യം മുന്നോട്ട് കൊണ്ടുപോകാന്‍ കഴിഞ്ഞില്ല. എല്‍എസ്ജി പേസര്‍ ആവേശ് ഖാന്‍ അവസാന ഓവര്‍ എറിഞ്ഞ് തന്റെ ടീമിന് രണ്ട് റണ്‍സിന്റെ വിജയം സമ്മാനിച്ചതോടെ അവരുടെ ശ്രമങ്ങള്‍ പാഴായി.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്