കളിക്കളത്തിലെ തന്ത്രങ്ങൾ ഇനി കൈത്തണ്ടയിൽ; മൊറോക്കോയെ വിറപ്പിക്കാന്‍ ബ്രസീലിന് റിസ്റ്റ് ബാന്‍ഡുകളുടെ സഹായം

JUNE 13, 2026, 9:31 AM

കളിക്കളത്തിലെ തന്ത്രപരമായ സന്ദേശക്കൈമാറ്റത്തിനായി റഗ്ബി ടീമുകൾ പതിവായി ഉപയോഗിക്കുന്ന അത്യാധുനിക വിദ്യയുമായി ബ്രസീൽ ഫുട്ബോൾ ടീം. സെറ്റ് പീസുകൾ അടക്കമുള്ള സുവർണ്ണാവസരങ്ങൾ യാതൊരു പിഴവുമില്ലാതെ മൈതാനത്ത് നടപ്പിലാക്കാൻ കളിത്തിരക്കിനിടയിലും താരങ്ങളെ സഹായിക്കുന്ന പ്രത്യേക 'ടാക്റ്റിക്കൽ റിസ്റ്റ് ബാൻഡുകളാണ്' ബ്രസീൽ ടീം അവതരിപ്പിക്കുന്നത്.

മത്സരത്തിനിടയിൽ താരങ്ങൾ പന്തിന് പിറകെ പായുമ്പോൾ, ഗ്യാലറിയുടെ ആർത്തുവിളികൾക്കിടയിലൂടെ പരിശീലകർ നൽകുന്ന നിർദ്ദേശങ്ങൾ പലപ്പോഴും കളിക്കാർക്ക് കൃത്യമായി കേൾക്കാൻ സാധിക്കാറില്ല. ഈ ആശയവിനിമയ തടസ്സം പൂർണ്ണമായും പരിഹരിക്കാനാണ് ബ്രസീൽ റിസ്റ്റ് ബാൻഡുകളെ ആശ്രയിക്കുന്നത്.

കളിയുടെ വിവിധ കോഡുകൾ, ഫോർമേഷനുകൾ, കളിക്കാരുടെ പൊസിഷനുകൾ എന്നിവ അടങ്ങിയ നിർദ്ദേശങ്ങൾ ഈ റിസ്റ്റ് ബാൻഡിൽ രേഖപ്പെടുത്തിയിട്ടുണ്ടാകും. മത്സരത്തിനിടയിൽ ഒരു സെറ്റ് പീസ് ലഭിക്കുമ്പോൾ അത് ആരാണ് എടുക്കേണ്ടതെന്ന് കോച്ച് നൽകുന്ന നമ്പറോ കളർ കോഡോ നോക്കി കളിക്കാർക്ക് തൽക്ഷണം തിരിച്ചറിയാനാകും.

പ്രത്യേകിച്ച്, ത്രോകളും കോർണറുകളും കൃത്യസമയത്ത് എടുത്തില്ലെങ്കിൽ അത് എതിർ ടീമിന് അനുകൂലമായി മാറുമെന്നിരിക്കെ, പിഴവുകളില്ലാതെ വേഗത്തിൽ തീരുമാനമെടുക്കാൻ ഈ വിദ്യ താരങ്ങളെ ഏറെ സഹായിക്കും.

മുഖ്യ പരിശീലകൻ കാർലോ ആൻസലോട്ടിയും സെറ്റ് പീസുകളുടെ ചുമതലയുള്ള അസിസ്റ്റന്റ് കോച്ച് ഫ്രാൻസെസ്കോ മൗരിയും ചേർന്നാണ് ടീമിൽ ഈ റിസ്റ്റ് ബാൻഡുകൾ ഉപയോഗിക്കാൻ തീരുമാനിച്ചത്. ഇതിനോടകം തന്നെ താരങ്ങൾക്ക് ഇതിനായുള്ള പ്രത്യേക പരിശീലനവും നൽകിക്കഴിഞ്ഞു.