അറ്റ്ലാന്റ: പരമ്പരാഗത വൈരികളുടെ പോരാട്ടത്തില് ഇംഗ്ലണ്ടിനെ നാടകീയമായി വീഴ്ത്തി നിലവിലെ ചാമ്പ്യന്മാരായ അര്ജന്റീന ലോകകപ്പ് ഫൈനലില് പ്രവേശിച്ചു. അവസാന നിമിഷങ്ങളിലെ നാടകീയ നീക്കങ്ങള്ക്കൊടുവില് ഒന്നിനെതിരെ രണ്ട് ഗോളുകള്ക്കാണ് അര്ജന്റീനയുടെ തകര്പ്പന് വിജയം. കളി അവസാനിക്കാന് മിനിറ്റുകള് മാത്രം ബാക്കിനില്ക്കെ എന്സോ ഫെര്ണാണ്ടസ്, ലൗട്ടാരോ മാര്ട്ടിനസ് എന്നിവര് നേടിയ ഗോളുകളാണ് മെസ്സിക്കും സംഘത്തിനും തുണയായത്. ഞായറാഴ്ച നടക്കുന്ന കലാശപ്പോരാട്ടത്തില് അര്ജന്റീന സ്പെയിനെ നേരിടും.
മത്സരത്തിന്റെ രണ്ടാം പകുതിയില് ഇംഗ്ലണ്ടാണ് ആദ്യം ലീഡെടുത്തത്. 55-ാം മിനിറ്റില് ആന്റണി ഗോര്ഡന് നേടിയ ഗോളിലൂടെ ഇംഗ്ലണ്ട് വിജയമുറപ്പിച്ചതായിരുന്നു. എന്നാല് മത്സരത്തിന്റെ അവസാന ഘട്ടത്തില് ഇംഗ്ലണ്ട് പ്രതിരോധത്തിലേക്ക് വലിഞ്ഞതോടെ അര്ജന്റീന തുടരെത്തുടരെ ആക്രമണങ്ങള് അഴിച്ചുവിട്ടു. ഒടുവില് 85-ാം മിനിറ്റില് ലയണല് മെസ്സി നല്കിയ പാസില് നിന്നും ബോക്സിന് പുറത്തുനിന്ന് എന്സോ ഫെര്ണാണ്ടസ് ഉതിര്ത്ത കിടിലന് ഷോട്ട് ഇംഗ്ലണ്ട് ഗോള്കീപ്പര് ജോര്ദാന് പിക്ക്ഫോര്ഡിനെ കാഴ്ചക്കാരനാക്കി വലയില് പതിച്ചു.
സമനിലയോടെ മത്സരം എക്സ്ട്രാ ടൈമിലേക്ക് നീങ്ങുമെന്ന് കരുതിയിരിക്കെ, ഇഞ്ചുറി ടൈമിന്റെ രണ്ടാം മിനിറ്റില് ലൗട്ടാരോ മാര്ട്ടിനസ് അര്ജന്റീനയുടെ വിജയഗോള് നേടി. അലക്സിസ് മാക് അലിസ്റ്ററിന്റെ ഷോട്ട് പോസ്റ്റിലിടിച്ചു മടങ്ങിയതിന് പിന്നാലെ പന്ത് വീണ്ടെടുത്ത മുപ്പത്തൊന്പതുകാരനായ താലിസ്മാന് ലയണല് മെസ്സി, വലതുവിംഗിലൂടെ കുതിച്ച് നല്കിയ മനോഹരമായ ക്രോസ് മാര്ട്ടിനസ് ഹെഡ്ഡറിലൂടെ വലയിലെത്തിക്കുകയായിരുന്നു. തങ്ങളുടെ പ്രിയതാരം ലയണല് മെസ്സിയുടെ കരിയറിലെ അവസാന ലോകകപ്പ് ടൂര്ണമെന്റില് വീണ്ടുമൊരു ഫൈനല് യോഗ്യതയെന്നത് അര്ജന്റീനയ്ക്ക് ഏറെ വൈകാരികമായ നിമിഷമാണ് സമ്മാനിച്ചത്.
1966 ന് ശേഷം ആദ്യമായി ലോകകപ്പ് ഫൈനല് സ്വപ്നം കണ്ടിറങ്ങിയ ഇംഗ്ലണ്ടിന് അവസാന നിമിഷങ്ങളിലെ പാളിച്ചകള് കനത്ത ആഘാതമായി മാറി. മികച്ച രീതിയില് കളിച്ചിട്ടും അവസാന ഘട്ടത്തില് കളി കൈവിട്ടതില് അങ്ങേയറ്റം നിരാശയുണ്ടെന്ന് ഇംഗ്ലണ്ട് നായകന് ഹാരി കെയ്ന് മത്സരശേഷം പ്രതികരിച്ചു.
അതേസമയം, കളിക്കാര് സര്വ്വശക്തിയും പുറത്തെടുത്തെന്നും ഈ തോല്വിയില് തനിക്ക് യാതൊരു ഖേദവുമില്ലെന്നും ഇംഗ്ലണ്ട് പരിശീലകന് തോമസ് ടുഷേല് വ്യക്തമാക്കി. മൈതാനത്തെ ആവേശപ്പോരാട്ടത്തിനൊപ്പം ഗാലറിയിലെ ആരാധകരുടെ വന് പങ്കാളിത്തം കൊണ്ടും ഈ സെമിഫൈനല് മത്സരം ഫുട്ബോള് ചരിത്രത്തിലെ മറ്റൊരു സുവര്ണ്ണ അധ്യായമായി മാറി.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260716022003.jpg)
-20260117051728.jpg)
