‘ടോക്സിക്’ ഒരു ആക്ഷൻ സിനിമ മാത്രമല്ല; ആഴമുള്ള കഥയുണ്ട്: യഷ്

APRIL 16, 2026, 6:34 AM

‘ടോക്സിക്: എ ഫെയറി ടെയിൽ ഫോർ ഗ്രോൺ അപ്‌സി’ എന്ന പുതിയ ചിത്രത്തെക്കുറിച്ചുള്ള തന്റെ അഭിപ്രായങ്ങൾ പങ്കുവച്ച് നടൻ യഷ്. സിനിമാകോൺ 2026 വേദിയിൽ ‘രാമായണ’ സഹനിർമാതാവ് നമിത് മൽഹോത്രയോടൊപ്പം പങ്കെടുത്തപ്പോഴായിരുന്നു പ്രതികരണം.

‘ടോക്സിക്’ വലിയ ലക്ഷ്യത്തോടെ ഒരുക്കുന്ന ചിത്രമാണെന്ന് യഷ് വ്യക്തമാക്കി. പ്രേക്ഷകർ നൽകുന്ന പിന്തുണയെ ഒരു വിജയാഘോഷമായി മാത്രമല്ല, ഓരോ തവണയും കൂടുതൽ മെച്ചപ്പെടാനുള്ള ഉത്തരവാദിത്തമായി കാണുന്നുവെന്നും അദ്ദേഹം പറഞ്ഞു.

ഇന്ത്യൻ സിനിമയെ ആഗോള തലത്തിലേക്ക് എത്തിക്കുകയാണ് ലക്ഷ്യമെന്നും, അതിന്റെ ഭാഗമായാണ് ഈ ചിത്രം ഒരുക്കുന്നതെന്നും യഷ് കൂട്ടിച്ചേർത്തു. കൂടുതൽ ആളുകൾക്ക് മനസിലാക്കാനായി ചിത്രം ഇംഗ്ലീഷിലും ചിത്രീകരിച്ചിട്ടുണ്ടെന്നും അദ്ദേഹം പറഞ്ഞു.

വലിയ കാൻവാസിലുള്ള ആക്ഷൻ സിനിമയായ ‘ടോക്സിക്’ ഒരു സാധാരണ ഗ്യാങ്സ്റ്റർ ചിത്രം മാത്രമല്ലെന്നും, അതിൽ രൂപകാത്മകമായ ഒരു ആഴമുള്ള പ്രമേയം അടങ്ങിയിട്ടുണ്ടെന്നും യഷ് വിശദീകരിച്ചു. സിനിമയുടെ പുറംകാഴ്ചകൾക്ക് അപ്പുറം ഏറെ കാര്യങ്ങൾ ഉള്ളടക്കത്തിൽ ഒളിഞ്ഞിരിക്കുന്നുവെന്നും അദ്ദേഹം പറഞ്ഞു.

സംവിധായിക ഗീതു മോഹൻദാസ് ഗ്യാങ്സ്റ്റർ സിനിമയ്ക്ക് പുതിയൊരു സമീപനമാണ് നൽകിയതെന്നും, ആ അനുഭവം ഏറെ ആസ്വദിച്ചതായും യഷ് പറഞ്ഞു. മികച്ച സാങ്കേതിക പ്രവർത്തകരോടൊപ്പം പ്രവർത്തിക്കുന്നത് വലിയ ആവേശമാണെന്നും അദ്ദേഹം കൂട്ടിച്ചേർത്തു.