'നാഗചൈതന്യയുടേത് സിനിമാ കുടുംബം, എന്റെ കരിയർ സ്വന്തമായി നേടിയെടുത്തത്'; ശോഭിത ധൂലിപാല

FEBRUARY 1, 2026, 11:11 PM

2024 ഡിസംബറിലാണ് നടി ശോഭിത ധൂലിപാല നാഗ ചൈതന്യയെ വിവാഹം കഴിച്ചത്, അതിനുശേഷം ഒരു വർഷത്തിലേറെയായി സ്‌ക്രീനിൽ നിന്ന് വിട്ടുനിൽക്കുകയായിരുന്നു നടി. തെലുങ്ക് ചിത്രമായ 'ചീകാടിലോ'യിലൂടെ തിരിച്ചെത്തിയ താരം ഇടവേളയെപ്പറ്റി തുറന്നു സംസാരിക്കുകയാണിപ്പോൾ.

തെലുങ്ക് സിനിമയിലെ ഏറ്റവും സ്വാധീനമുള്ള സിനിമാ കുടുംബങ്ങളിലൊന്നാണ് നാഗ ചൈതന്യയുടേത്. വിവാഹത്തോടെ സിനിമാ കരിയറിൽ എന്തെങ്കിലും മാറ്റത്തിന് കാരണമായിട്ടുണ്ടോ എന്ന് ശോഭിത ധുലിപാലയോട് ചോദിച്ചപ്പോൾ പറഞ്ഞതിങ്ങനെ:

"ഞാൻ വിവാഹിതയായിട്ട് ഒരു വർഷമേ ആയിട്ടുള്ളൂ, എന്റെ മുഴുവൻ കരിയറിലും, എന്റെ എല്ലാ ജോലികളും എന്റെ സ്വതന്ത്ര യാത്രയിൽ നിന്നാണ് വന്നത്. അതിനാൽ അതിന്റെ സ്വാധീനം എനിക്ക് ഇതുവരെ അറിയില്ല. അതെ, ഞാൻ വിവാഹിതയാണ്, സിനിമാ ബിസിനസിൽ ഏർപ്പെട്ടിരിക്കുന്ന ഒരു കുടുംബത്തിന്റെ ഭാഗമാണ്, അതൊരു സ്ഥാപനപരമായ പാരമ്പര്യ കുടുംബമാണ്, പക്ഷേ എന്റെ ജോലി വളരെ വേറിട്ടതാണ്."

തന്റെ ഭർത്താവിന്റെ കുടുംബത്തെ വ്യവസായത്തിന്റെ ഭാഗമായിട്ടല്ല, കുടുംബമായിട്ടാണ് കാണുന്നതെന്ന് നടി പറഞ്ഞു. വീട്ടിൽ വെച്ച് അവരെ കാണുമ്പോൾ, അവർ ഇപ്പോഴും എന്റെ കുടുംബം പോലെയാണ്. ഒരുപക്ഷേ ഭാവിയിൽ എനിക്ക് നന്നായി മനസ്സിലാകും, പക്ഷേ ഇപ്പോൾ, എന്റെ കരിയറും കുടുംബവും വളരെ വേർപിരിഞ്ഞിരിക്കുന്നു.- നടി കൂട്ടിച്ചേർത്തു.

"ധാരാളം ഓഡിഷനുകളിലൂടെയാണ് എന്റെ യാത്ര തുടങ്ങിയത്. ഞാൻ അൽപ്പം കൗണ്ടർ കൾച്ചർ സ്വഭാവമുള്ള പ്രോജക്റ്റുകളുടെ ഭാഗമായിരുന്നു. അങ്ങനെയുള്ള ഒരു കൂട്ടത്തിന്റെ ഭാഗമാകുമ്പോൾ, നിങ്ങൾക്ക് പിന്തുണ ആവശ്യമുണ്ടോ എന്നെനിക്കറിയില്ല, കുറഞ്ഞപക്ഷം എനിക്കുവേണ്ടി എനിക്ക് സംസാരിക്കാനാവും. എന്റെ സ്വന്തം കഴിവിൽ ഞാൻ വിശ്വസിക്കുന്നു, കാരണം എന്റെ തിരഞ്ഞെടുപ്പുകൾ കൗണ്ടർ കൾച്ചർ സ്വഭാവത്തിലുള്ളതായിരുന്നു.

ഒരു വ്യക്തിയെന്ന നിലയിൽ, തീരുമാനങ്ങളെടുക്കാനും പിന്തുണ നേടാനും ഞാനെന്നെത്തന്നെ ആശ്രയിക്കും. അതിനാൽ സിനിമയിലുള്ള ഒരു കുടുംബവുമായി ബന്ധപ്പെട്ടിരിക്കുന്നതിനാൽ, അത് എന്റെമേൽ എന്തെങ്കിലും സ്വാധീനം ചെലുത്തിയിട്ടുണ്ടോ എന്നെനിക്ക് സംശയമാണ്."- ശോഭിത പറഞ്ഞു.