അമേരിക്കൻ മരുമകൻ എന്റെ അമ്മായിമാരുടെ മനസ്സ് കീഴടക്കി; കഥപറഞ്ഞ് പ്രിയങ്ക

MARCH 3, 2026, 10:09 PM

ഹോളിവുഡ് താരം പ്രിയങ്ക ചോപ്രയും അമേരിക്കൻ ഗായകൻ നിക് ജോനാസും തമ്മിലുള്ള പ്രണയവും വിവാഹവും എന്നും വാർത്തകളിൽ നിറഞ്ഞുനിൽക്കുന്ന ഒന്നാണ്. അടുത്തിടെ മിത്തിക്കൽ കിച്ചൻ (Mythical Kitchen) എന്ന പരിപാടിയിൽ നൽകിയ അഭിമുഖത്തിൽ, തങ്ങളുടെ വിവാഹനിശ്ചയ ചടങ്ങായ റോക്കയ്ക്കിടെ നിക് എങ്ങനെയാണ് പ്രിയങ്കയുടെ ബന്ധുക്കളുടെ മനസ്സ് കീഴടക്കിയത് എന്ന് താരം വെളിപ്പെടുത്തി.

ഇന്ത്യൻ ആചാരപ്രകാരമുള്ള പൂജകളും മന്ത്രോച്ചാരണങ്ങളും നിക് അതീവ ഗൗരവത്തോടെയും കൃത്യതയോടെയും ചെയ്തത് പ്രിയങ്കയുടെ അമ്മായിമാരെ അത്ഭുതപ്പെടുത്തി. നിക് സ്വാഹ എന്ന് മന്ത്രിക്കുന്നതും ധോലക് വായിക്കുന്നതും കണ്ട് അവർക്കെല്ലാം വലിയ സന്തോഷമായെന്ന് പ്രിയങ്ക ഓർക്കുന്നു.

വിവാഹനിശ്ചയ ചടങ്ങുകൾക്ക് ശേഷം നിക് പ്രിയങ്കയുടെ കൈകൾ ചേർത്തുപിടിച്ച് പറഞ്ഞ വാക്കുകൾ ഏറെ ഹൃദയസ്പർശിയായിരുന്നു. "നമ്മുടെ മൂന്നാമത്തെയോ നാലാമത്തെയോ ജന്മമാണിതെന്ന് എനിക്ക് തോന്നുന്നു," എന്നായിരുന്നു നികിൻ്റെ വാക്കുകൾ. അഗ്നിക്ക് ചുറ്റും ഏഴ് വട്ടം വലംവെച്ച് ഏഴ് ജന്മം ഒന്നിച്ചുണ്ടാകുമെന്ന് പ്രതിജ്ഞ ചെയ്യുന്ന ഇന്ത്യൻ വിവാഹ സംസ്കാരത്തെക്കുറിച്ച് നിക് അറിഞ്ഞിരുന്നില്ല. എന്നിട്ടും തങ്ങൾ തമ്മിലുള്ള ആത്മബന്ധം അത്രത്തോളം ആഴമുള്ളതാണെന്ന് നിക് തിരിച്ചറിഞ്ഞ നിമിഷം, താൻ ശരിയായ ജീവിതപങ്കാളിയെ തന്നെയാണ് തിരഞ്ഞെടുത്തതെന്ന് ഉറപ്പിച്ചതായി പ്രിയങ്ക പറഞ്ഞു.

പ്രിയങ്കയുടെ സിനിമാ വിശേഷങ്ങളിലേക്ക് കടന്നാൽ, എസ്.എസ്. രാജമൗലി സംവിധാനം ചെയ്യുന്ന ബ്രഹ്മാണ്ഡ ചിത്രം വാരാണസി യുടെ തിരക്കിലാണ് താരം. മഹേഷ് ബാബു നായകനാകുന്ന ഈ ആക്ഷൻ-അഡ്വഞ്ചർ ചിത്രത്തിൽ പൃഥ്വിരാജ് സുകുമാരനും ഒരു പ്രധാന വേഷത്തിലെത്തുന്നുണ്ട്.

ചിത്രത്തിൻ്റെ അടുത്ത ഷെഡ്യൂൾ അൻ്റാർട്ടിക്കയിലായിരിക്കുമെന്ന് പ്രിയങ്ക തന്നെ സൂചന നൽകിയിട്ടുണ്ട്. അൻ്റാർട്ടിക്കയിൽ ചിത്രീകരിക്കുന്ന ആദ്യത്തെ മുഖ്യധാരാ ഇന്ത്യൻ സിനിമയായിരിക്കും ഇത്. ഐമാക്സ് ഫോർമാറ്റിൽ 1,300 കോടി രൂപ ബജറ്റിൽ ഒരുങ്ങുന്ന ഈ ചിത്രം 2027 ഏപ്രിൽ 7-ന് തീയേറ്ററുകളിൽ എത്തും. ഹോളിവുഡിലും പ്രിയങ്ക തൻ്റെ സാന്നിധ്യം ശക്തമാക്കുകയാണ്. കാൾ അർബനൊപ്പം അഭിനയിച്ച ദി ബ്ലഫ് (The Bluff) എന്ന ആക്ഷൻ ചിത്രം അടുത്തിടെ ആമസോൺ പ്രൈമിലൂടെ പുറത്തിറങ്ങി. ഇതിലെ പ്രിയങ്കയുടെ പ്രകടനത്തെ മഹേഷ് ബാബുവും രാജമൗലിയും പ്രശംസിച്ചിരുന്നു.