കാപ്പ കേസിൽ നാടുകടത്തിയ യുവാവ് ട്രെയിൻ തട്ടി മരിച്ചു; നാട്ടിലെത്തിയത് എങ്ങനെ എന്നത് ദുരൂഹം

APRIL 13, 2026, 6:56 AM

അമ്പലപ്പുഴ: ആലപ്പുഴയിൽ കാപ്പ കേസിൽ നാടുകടത്തിയ യുവാവ് ട്രെയിൻ തട്ടി മരിച്ചതായി റിപ്പോർട്ട്. പുന്നപ്ര വടക്ക് പഞ്ചായത്ത് 13-ാം വാർഡിൽ മരത്തുങ്കൽ ബാബു - ഗ്രേസി ദമ്പതികളുടെ മകൻ സിജു ബാബു (21) ആണ് മരിച്ചത്.

കഴിഞ്ഞ ദിവസം രാത്രി ഒൻപത് മണിയോടെ പുന്നപ്ര പറവൂർ സെന്റ് ജോസഫ് പള്ളിക്ക് പടിഞ്ഞാറുവശത്തായിരുന്നു അപകടം ഉണ്ടായത്. ട്രെയിൻ തട്ടിയാണ് മരണം സംഭവിച്ചതെന്നാണ് പ്രാഥമിക വിവരം.

പറവൂരിലെ ബാറിൽ അടിപിടി നടത്തിയതടക്കം പുന്നപ്ര പൊലീസ് സ്റ്റേഷൻ പരിധിയിലെ നിരവധി കേസുകളിൽ പ്രതിയായിരുന്നു സിജു ബാബു. ഇതിന്റെ അടിസ്ഥാനത്തിലാണ് ഇയാളെ കാപ്പ ചുമത്തി നാടുകടത്തിയത്. എന്നാൽ നാടുകടത്തിയ ഇയാൾ എങ്ങനെ നാട്ടിലെത്തിയെന്നത് സംബന്ധിച്ച് ദുരൂഹത തുടരുകയാണ്.