ഹാരിക്ക് മുൻനിര സീറ്റില്ല, എട്ടാം നിരയിൽ ഒതുക്കി; എൻ.ബി.എ വേദിക്കെതിരെ കടുത്ത് മേഗൻ മാർക്കൽ!

JUNE 17, 2026, 12:04 AM

അമേരിക്കയിൽ നടന്ന എൻ.ബി.എ.ഫൈനൽസിലെ അഞ്ചാം മത്സരത്തിൽ പങ്കെടുത്ത ബ്രിട്ടീഷ് രാജകുടുംബാംഗം പ്രിൻസ് ഹാരിക്ക് വി.ഐ.പി. പരിഗണന ലഭിച്ചില്ലെന്ന് പരാതി. മത്സരത്തിൽ ഹാരിക്ക് ലഭിച്ച ഇരിപ്പിടത്തെച്ചൊല്ലി അദ്ദേഹത്തിന്റെ ഭാര്യ മേഗൻ മാർക്കൽ കടുത്ത അതൃപ്തിയിലാണെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.

ന്യൂയോർക്ക് നിക്സും സാന്‍ അന്റോണിയോ സ്പർസും തമ്മിൽ നടന്ന ഫൈനൽ പോരാട്ടം കാണാൻ എൻ.ബി.എ. കമ്മീഷണർ ആഡം സിൽവർ ഹാരിയെ വ്യക്തിപരമായി ക്ഷണിക്കുകയായിരുന്നു. എന്നാൽ, പ്രമുഖ താരങ്ങൾക്കും വി.ഐ.പി.കൾക്കുമായി നീക്കിവെയ്ക്കുന്ന കോർട്ടിനടുത്തുള്ള മുൻനിര സീറ്റുകൾക്ക് പകരം എട്ടാം നിരയിലെ ഇരിപ്പിടമാണ് ഹാരിക്ക് ലഭിച്ചത്. ബെൻ സ്റ്റില്ലർ, തിമോത്തി ചാലമേറ്റ്, സ്പൈക്ക് ലീ തുടങ്ങിയ ഹോളിവുഡ് താരങ്ങളെല്ലാം മുൻനിരയിൽ ഇരുന്നപ്പോഴാണ് ഹാരിക്ക് ഈ അവഗണന നേരിട്ടത്.

ഹാരിക്ക് മുൻനിര സീറ്റ് ലഭിക്കാത്തത് മേഗന് ഒട്ടും ഇഷ്ടപ്പെട്ടിട്ടില്ലെന്ന് അവരുടെ അടുത്ത വൃത്തങ്ങൾ വെളിപ്പെടുത്തി. "മേഗനെ സംബന്ധിച്ച് ഇത്തരം പൊതുവേദികളിലെ ഇരിപ്പിടം എന്നത് ഒരു പദവിയുടെയും ബഹുമാനത്തിന്റെയും അടയാളമാണ്. ലോകത്തിലെ തന്നെ ഏറ്റവും ശ്രദ്ധേയനായ വ്യക്തികളിലൊരാളായ ഹാരി ഹോളിവുഡ് താരങ്ങൾക്ക് പുറകിലായി ഇരിക്കേണ്ടി വന്നത് ഒരു മോശം സന്ദേശമാണ് നൽകുന്നത്," എന്ന് അവർ പ്രതികരിച്ചു.

പ്രിൻസ് വില്യമും കേറ്റ് മിഡിൽറ്റണും മുൻപ് എൻ.ബി.എ. മത്സരങ്ങൾ കാണാൻ എത്തിയപ്പോൾ അവർക്ക് ലഭിച്ച രാജകീയമായ മുൻനിര പരിഗണനയും മേഗൻ ചൂണ്ടിക്കാണിക്കുന്നു. എന്നാൽ, മേഗന്റെ ഈ ബ്രാൻഡ് ചിന്തകളിൽ നിന്നും വ്യത്യസ്തമായി പ്രിൻസ് ഹാരി കളി ആസ്വദിക്കുന്നതിൽ മാത്രമാണ് ശ്രദ്ധിച്ചതെന്ന് അദ്ദേഹത്തിന്റെ സുഹൃത്തുക്കൾ പറഞ്ഞു.

ഇരിപ്പിടത്തെക്കുറിച്ച് അദ്ദേഹം ഒട്ടും ചിന്തിച്ചിരുന്നില്ല. മത്സരത്തിനിടയിൽ പ്രശസ്ത സംവിധായകനും ന്യൂയോർക്ക് നിക്സിന്റെ കടുത്ത ആരാധകനുമായ സ്പൈക്ക് ലീയുമായി ഹാരി സൗഹൃദം പങ്കുവെക്കുന്ന വീഡിയോയും സമൂഹമാധ്യമങ്ങളിൽ പ്രചരിക്കുന്നുണ്ട്. മുൻപ് ഇരുവരും ഒരുമിച്ച് പങ്കെടുത്ത കായിക മാമാങ്കങ്ങളിലെല്ലാം മുൻനിര വി.ഐ.പി. ഇരിപ്പിടങ്ങൾ തന്നെയാണ് ഇവർക്ക് ലഭിച്ചിരുന്നത്.