'ഒരു വീട്ടിൽ മൂന്ന് പങ്കാളികൾ'; പോളിഅമറസ് ബന്ധം അവസരങ്ങൾ നഷ്ടപ്പെടുത്തിയെന്ന് അമേരിക്കൻ ഗായകൻ

MAY 12, 2026, 10:25 PM

പ്രശസ്ത അമേരിക്കൻ ഗായകൻ നീ-യോ വീണ്ടും വാർത്തകളിൽ നിറയുന്നു. സംഗീതത്തിനപ്പുറം തന്റെ വ്യക്തിജീവിതത്തെക്കുറിച്ചുള്ള തുറന്നുപറച്ചിലുകളാണ് ഇത്തവണ താരത്തെ ചർച്ചകളിൽ എത്തിച്ചിരിക്കുന്നത്. താൻ ഒരേസമയം ഒന്നിലധികം പങ്കാളികളുമായി (Polyamorous relationship) പ്രണയത്തിലാണെന്നും ഈ തീരുമാനം തന്റെ കരിയറിലെ പല വലിയ ബിസിനസ്സ് കരാറുകളും നഷ്ടപ്പെടാൻ കാരണമായെന്നും നീ-യോ വെളിപ്പെടുത്തി. ടിഷ് സൈറസ്, ബ്രാൻഡി സൈറസ് എന്നിവർ നയിക്കുന്ന പോഡ്‌കാസ്റ്റിലായിരുന്നു താരത്തിന്റെ പ്രതികരണം.

തന്റെ ജീവിതരീതിയെ ലോകം തെറ്റായ രീതിയിലാണ് നോക്കിക്കാണുന്നതെന്ന് 46-കാരനായ താരം പറഞ്ഞു. "എന്റെ വ്യക്തിപരമായ തിരഞ്ഞെടുപ്പുകൾ കാരണം പല കമ്പനികളും എന്നെ പിന്തുണയ്ക്കാൻ മടിക്കുന്നു. മികച്ച ഒരു വ്യക്തിയായി ജീവിച്ചിട്ടും ആളുകൾക്ക് ഇഷ്ടപ്പെടാത്ത ഒരു കാര്യം ചെയ്താൽ ഉടൻ 'കാൻസൽ കൾച്ചർ' (Cancel culture) തുടങ്ങുകയാണെന്നും ഇത് അർത്ഥശൂന്യമാണെന്നും" താരം അഭിപ്രായപ്പെട്ടു. തന്റെ നിലപാടുകൾ ഒളിച്ചുവെക്കാൻ ഇനി താൻ തയ്യാറല്ലെന്നും അദ്ദേഹം കൂട്ടിച്ചേർത്തു.

നിലവിൽ തന്റെ മൂന്ന് പങ്കാളികളായ ഏരിയൽ ഹിൽ, ക്രിസ്റ്റീന, മോണി എന്നിവർക്കും അവരുടെ കുട്ടികൾക്കുമൊപ്പമാണ് നീ-യോ താമസിക്കുന്നത്. എല്ലാവരും ഒരുമിച്ച് ഒരു മേൽക്കൂരയ്ക്ക് കീഴിൽ സമാധാനത്തോടെയാണ് കഴിയുന്നതെന്ന് അദ്ദേഹം വ്യക്തമാക്കി. ഇത്തരം ബന്ധങ്ങളെ കേവലം ലൈംഗികതയുമായി മാത്രം ബന്ധിപ്പിക്കുന്നത് ശരിയല്ലെന്നും, ഇതൊരു വലിയ കമ്മ്യൂണിറ്റിയായി പ്രവർത്തിക്കുന്ന ഒന്നാണെന്നും അദ്ദേഹം പറഞ്ഞു.

തന്റെ പങ്കാളികളെല്ലാം സ്വമനസ്സാലെയാണ് കൂടെയുള്ളതെന്നും ആരോടും ഒന്നും മറച്ചുവെക്കുന്നില്ലെന്നും നീ-യോ പറഞ്ഞു.മുൻഭാര്യ ക്രിസ്റ്റൽ റെനയുമായുള്ള വിവാഹമോചനത്തിന് ശേഷമാണ് ജീവിതത്തിൽ പൂർണ്ണമായ സത്യസന്ധത പുലർത്താൻ താൻ തീരുമാനിച്ചതെന്ന് താരം വെളിപ്പെടുത്തി.

മറ്റുള്ളവർ ഇതിനെ തരംതാഴ്ന്ന രീതിയായി കാണുന്നതിനെ നീ-യോ തള്ളിക്കളഞ്ഞു. തന്റെ കുടുംബത്തിൽ സ്നേഹവും സത്യസന്ധതയുമാണ് പ്രധാനമെന്നും ആരെയും വഞ്ചിക്കുന്നില്ലെന്നും അദ്ദേഹം ഉറപ്പിച്ചു പറഞ്ഞു. മൂന്ന് തവണ ഗ്രാമി പുരസ്‌കാരം നേടിയിട്ടുള്ള ഈ സംഗീതജ്ഞൻ തന്റെ സംഗീതത്തേക്കാൾ ഉപരി ഇപ്പോൾ തന്റെ കുടുംബ ഘടനയുടെ പേരിലാണ് സാമൂഹ്യമാധ്യമങ്ങളിൽ വിമർശനങ്ങൾ നേരിടുന്നത്.