പ്രണയനൈരാശ്യം തളർത്തിയ മാസങ്ങൾ; ഉറക്കമില്ലാത്ത രാത്രികളെക്കുറിച്ച് കൽക്കി കൊച്ച്‌ലിൻ

APRIL 19, 2026, 10:45 PM

ഹൃദയഭേദകമായ ഒരു തകർച്ച മനസ്സിനെ മാത്രമല്ല, ശരീരത്തെയും എങ്ങനെ ബാധിക്കുമെന്ന് സ്വന്തം ജീവിതാനുഭവത്തിലൂടെ തുറന്നുപറഞ്ഞിരിക്കുകയാണ് ബോളിവുഡ് താരം കൽക്കി കൊച്ച്‌ലിൻ. പ്രണയനൈരാശ്യത്തെത്തുടർന്ന് മാസങ്ങളോളം താൻ കടുത്ത ഉറക്കമില്ലായ്മ (Insomnia) അനുഭവിച്ചിരുന്നതായി താരം വെളിപ്പെടുത്തി.

നടി സോഹ അലി ഖാൻ അവതാരകയായ പോഡ്‌കാസ്റ്റിലാണ് കൽക്കി തന്റെ കരിയറിലെയും ജീവിതത്തിലെയും പ്രതിസന്ധി ഘട്ടങ്ങളെക്കുറിച്ച് മനസ്സ് തുറന്നത്. വൈകാരികമായ സമ്മർദ്ദം ശാരീരിക ആരോഗ്യത്തെ എത്രത്തോളം ദോഷകരമായി ബാധിക്കുമെന്ന് ഈ അനുഭവം തന്നെ ബോധ്യപ്പെടുത്തിയതായി കൽക്കി പറഞ്ഞു.

ഏകദേശം നാല് മാസത്തോളം നീണ്ടുനിന്ന ആ കാലഘട്ടത്തിൽ രാത്രി രണ്ട് മണിക്കും മൂന്ന് മണിക്കും താൻ ഉണരുമായിരുന്നുവെന്ന് കൽക്കി ഓർത്തെടുക്കുന്നു. പിന്നീട് ഉറക്കം വരാത്തതിനാൽ ഗിറ്റാർ വായിച്ചോ മറ്റ് ജോലികളിൽ ഏർപ്പെട്ടോ സമയം കളയുകയായിരുന്നു പതിവ്.