'ഇത് എന്റെ അവസാനമാണോ എന്ന് എനിക്കറിയില്ല'; ബാലയ്‌ക്കെതിരെ വീണ്ടും എലിസബത്ത്

FEBRUARY 23, 2025, 9:41 PM

കൊച്ചി: ബാലയെ ബ്ലാക്ക് മെയിൽ ചെയ്യുകയാണെന്ന ആരോപണത്തിന് മറുപടിയുമായി ഡോ. എലിസബത്ത് ഉദയൻ രംഗത്ത്. കഴിഞ്ഞ ദിവസം എലിസബത്ത് ഫേസ്ബുക്കിൽ പങ്കുവച്ച കുറിപ്പിൽ ബാല കരൾമാറ്റത്തിന് പണം കൊടുത്തത് നിയമവിരുദ്ധമാണെന്ന് എലിസബത്ത് ആരോപിച്ചിരുന്നു. എന്നാൽ അയാൾ കരളിന് പണം കൊടുത്തിട്ടുണ്ടെങ്കിൽ നിങ്ങൾക്ക് എന്താ എന്ന് ചോദിച്ചുകൊണ്ടുള്ള കമന്റിന് മറുപടി നൽകിയാണ് എലിസബത്ത് രംഗത്ത് എത്തിയത്.

ഇത്രയും വർഷമായി എനിക്ക് സംഭവിച്ച കാര്യങ്ങൾ ഞാൻ പറയുന്നു, ഇപ്പോൾ അയാൾ എന്റെ ഭൂതകാലത്തെക്കുറിച്ചും എന്റെ വിഷാദരോഗത്തെ കുറിച്ചും പറയുമെന്ന് ഭീഷണിപ്പെടുത്തുന്നു, ഞാൻ അദ്ദേഹത്തിന് തെറ്റായ മരുന്ന് നൽകിയെന്ന് പോലും പരോക്ഷമായി പറയുന്നു. അയാൾ ചെയ്യുന്നതുപോലെ ഞാൻ ആരുടെയും പേര് നേരിട്ട് പറഞ്ഞില്ല, പക്ഷേ ചെയ്തത് തെറ്റാണെങ്കിൽ ഞാൻ ജയിലിൽ പോകാൻ തയ്യാറാണ്. എന്നെ ജയിലിൽ നിന്ന് പുറത്തിറക്കാൻ പോലും ആരും വരില്ല. അയാൾ കരളിന് പണം നൽകിയെങ്കിൽ അതിൽ എനിക്ക് എന്താണ് ചെയ്യാനുള്ളത് എന്ന് മനസ്സിലാകുന്നില്ല. ഒന്നാമതായി, പണമടച്ചുള്ള അവയവം മാറ്റിവയ്ക്കൽ ശിക്ഷാർഹമായ കുറ്റമാണ്, അതിൽ എനിക്ക് ഒരു പങ്കുമില്ല.

കൂടാതെ പലരും ഞാൻ കീപ്പാണെന്ന് പലതവണ കമന്റ് ചെയ്തു. ആ വില കുറഞ്ഞ കീപ്പായിരുന്നു ഞാനെങ്കിൽ ആ സ്ത്രീയുടെ വീട്ടിലേക്ക് വരുമ്പോൾ എന്തിനാണ് അയാൾ പോലീസ് അകമ്പടിയോടെ വരുന്നത്, പൊലീസ് സ്റ്റേഷനിൽ അവൾക്ക് ചായയും മറ്റും നൽകിയത് എന്തിനാണ്? എലിസബത്ത് ചോദിച്ചു. അദ്ദേഹത്തിന്റെ കുടുംബാംഗങ്ങളിൽ ആരും കരൾ മാറ്റിവയ്ക്കൽ സമയത്ത് ഒപ്പിട്ടിട്ടില്ലായിരുന്നു, ഞാൻ ഒപ്പിടാൻ തയ്യാറായപ്പോൾ അവർ എന്നെ തടഞ്ഞു, അമ്മയുടെ സഹോദരിമാരെ അയച്ചു. മകനോ സഹോദരനോ ഇത്രയധികം വിലയേ ഉള്ളൂ. എന്റെ ഫേസ്ബുക്ക് പ്രൊഫൈൽ ഇതിനുശേഷം ഉണ്ടാകുമെന്ന് എനിക്കറിയില്ല. എന്തായാലും ഞാൻ എന്റെ അക്കൗണ്ട് ഡിലീറ്റ് ചെയ്യില്ല. അത് അവരുടെ ഭാഗത്തുനിന്നോ സർക്കാരിന്റെ ഭാഗത്തുനിന്നോ ഡിലീറ്റ് ചെയ്താലായി. ഒരു സ്ത്രീ എന്നെ കുറിച്ച് മോശമായി കമന്റ് ചെയ്ത സ്ക്രീൻഷോട്ട് ഞാൻ ഇട്ടിട്ടുണ്ട്. ഞാൻ അവരുടെ പ്രൊഫൈൽ പരിശോധിച്ചു, അവർ ഒരു രാഷ്ട്രീയ പാർട്ടി അംഗമാണ്, അവർക്ക് എന്തോ ഒരു സ്ഥാനമുണ്ടായിരുന്നു, ആ വ്യക്തി ഇങ്ങനെയാണ് കമന്റ് ഇടുന്നത്. അതുകൊണ്ട് മാർക്കോ ഫിലിം പോലെ ഇത് എന്റെ അവസാനമാണോ എന്ന് എനിക്കറിയില്ല എന്നും എലിസബത്ത് പറഞ്ഞു.