'കഷ്ടപ്പെട്ട് ഉണ്ടാക്കിയ പണം അപകടത്തിലാക്കരുത്'; അനുമതിയില്ലാതെ തൻ്റെ ചിത്രം ഉപയോഗിച്ച് ലോൺ ആപ്പിന്റെ പരസ്യം, മുന്നറിയിപ്പുമായി അജു വർഗീസ്

APRIL 20, 2026, 6:46 AM

കൊച്ചി: സമ്മതമില്ലാതെ തന്റെ പേരും ചിത്രവും ഉപയോഗിച്ച് പരസ്യം ചെയ്ത എഎം ട്രസ്റ്റ് ലോൺ സർവീസസ് എന്ന ബാങ്കിങ് സ്ഥാപനത്തിനെതിരെ മുന്നറിയിപ്പുമായി നടൻ അജു വർഗീസ്.

'മൂന്ന് ലക്ഷം രൂപ വരെ കേരളത്തിൽ എവിടെയും നൽകുന്നു' എന്നാണ് ഈ പരസ്യത്തിൽ പറയുന്നത്. ഇത്തരം വ്യാജ വാഗ്ദാനങ്ങളിൽ വീഴരുതെന്നും കഷ്ടപ്പെട്ട് ഉണ്ടാക്കിയ പണം അപകടത്തിലാക്കരുതെന്നും നടൻ മുന്നറിയിപ്പ് നൽകി.അനുമതിയില്ലാതെ തന്റെ ചിത്രം ഉപയോഗിച്ചിരിക്കുന്ന എഎം ട്രസ്റ്റ് ലോൺ സർവീസസിന്റെ പരസ്യം ഫേസ്ബുക്കിൽ പങ്കുവച്ച നടൻ തനിക്ക് ഈ പദ്ധതിയുമായി യാതൊരു ബന്ധവുമില്ലെന്നും വ്യക്തമാക്കി.

അജു വർഗീസിൻ്റെ പോസ്റ്റിന്റെ പൂർണരൂപം

"ഒരു അനധികൃത ബാങ്കിങ് സ്ഥാപനം എന്റെ സമ്മതമില്ലാതെ എന്റെ പേരും ചിത്രവും അവരുടെ പ്രചാരണത്തിനായി ഉപയോഗിക്കുന്നത് ശ്രദ്ധയിൽപ്പെട്ടിട്ടുണ്ട്. എനിക്ക് ഈ പദ്ധതിയുമായി യാതൊരു ബന്ധവുമില്ല, ദയവായി ഇത്തരം വ്യാജ വാഗ്ദാനങ്ങളിൽ വീഴരുത്, നിങ്ങളുടെ കഷ്ടപ്പെട്ട് ഉണ്ടാക്കിയ പണം അപകടത്തിലാക്കരുത്".