ചിരാഗ് പാസ്വാനുമായി പ്രണയമോ? ഗോസിപ്പുകൾക്ക് മറുപടിയുമായി കങ്കണ റണാവത്

APRIL 16, 2026, 9:04 AM

കേന്ദ്രമന്ത്രിയും ലോക് ജനശക്തി പാർട്ടി നേതാവുമായ ചിരാഗ് പാസ്വാനും താനും തമ്മിൽ പ്രണയത്തിലാണെന്ന വാർത്തകൾ തള്ളി നടി കങ്കണ റണാവത് എംപി.

കഴിഞ്ഞ കുറച്ചു ദിവസങ്ങളായി സോഷ്യൽ മീഡിയയിൽ പ്രചരിക്കുന്ന ഊഹാപോഹങ്ങൾക്ക് ഒരു ദേശീയ മാധ്യമത്തിന് നൽകിയ അഭിമുഖത്തിലാണ് കങ്കണ വ്യക്തത വരുത്തിയത്. ചിരാഗ് തന്റെ അടുത്ത സുഹൃത്താണെന്നും അവർ തമ്മിൽ പ്രണയമൊന്നുമില്ലെന്നും കങ്കണ തുറന്നു പറഞ്ഞു.

പാർലമെന്റ് വളപ്പിലും മറ്റ് പൊതുപരിപാടികളിലും ഇരുവരും സൗഹൃദം പങ്കിടുന്ന ചിത്രങ്ങൾ വൈറലായതോടെയാണ് ഇവർ പ്രണയത്തിലാണെന്ന തരത്തിൽ വാർത്തകൾ വന്നത്.

"ചിരാഗ് എന്റെ അടുത്ത സുഹൃത്താണ്. പ്രണയമൊന്നും നടക്കില്ല. ഞങ്ങൾക്ക് പരസ്പരം പത്ത് വർഷത്തിലേറെയായി അറിയാം," കങ്കണ പറഞ്ഞു. തനിക്ക് പ്രണയിക്കണമെന്ന് തോന്നിയിരുന്നെങ്കിൽ അത് എപ്പോഴേ സംഭവിക്കുമായിരുന്നുവെന്നും താരം കൂട്ടിച്ചേർത്തു.

2011-ൽ പുറത്തിറങ്ങിയ 'മിലേ നാ മിലേ ഹം' എന്ന സിനിമയിൽ ഇരുവരും ഒരുമിച്ച് അഭിനയിച്ചിരുന്നു. ചിരാഗ് പാസ്വാന്റെ സിനിമാ അരങ്ങേറ്റമായിരുന്നു ഇത്. രാഷ്ട്രീയത്തിൽ എത്തുന്നതിന് മുൻപേ സിനിമയിൽ സഹപ്രവർത്തകരായിരുന്ന ഇരുവരും തമ്മിലുള്ള ആ പഴയ സൗഹൃദം ഇപ്പോഴും മാറ്റമില്ലാതെ തുടരുന്നു എന്നാണ് കങ്കണ വ്യക്തമാക്കിയത്.