'സീതയായി അഭിനയിക്കാൻ കഴിഞ്ഞത് അനുഗ്രഹം'; 'രാമായണ'ത്തെക്കുറിച്ച് മനസുതുറന്ന് സായ് പല്ലവി

JULY 20, 2026, 12:50 AM

ഡൽഹി: നിതേഷ് തിവാരി സംവിധാനം ചെയ്യുന്ന ബ്രഹ്മാണ്ഡ ചിത്രം 'രാമായണ'ത്തിൽ സീതയുടെ വേഷം അവതരിപ്പിക്കാൻ ലഭിച്ച അവസരം ജീവിതത്തിലെ വലിയ അനുഗ്രഹമാണെന്ന് നടി സായ് പല്ലവി. ചിത്രത്തിന്റെ ട്രെയ്‌ലർ ലോഞ്ച് ചടങ്ങിലായിരുന്നു താരം തന്റെ അനുഭവങ്ങൾ പങ്കുവെച്ചത്.

"ഇത്തരമൊരു കഥാപാത്രം ലഭിക്കുക എന്നത് ഏതൊരു അഭിനേതാവിനും അപൂർവ ഭാഗ്യമാണ്. ഒരു ദേവിയുടെ വേഷം അവതരിപ്പിക്കുക എന്നത് വളരെ വലിയ ഉത്തരവാദിത്തമാണ്. ഈ സിനിമയ്ക്കായി പ്രവർത്തിച്ച മുഴുവൻ സംഘവും ഹൃദയവും ആത്മാവും നൽകി പരിശ്രമിച്ചിട്ടുണ്ട്," സായ് പല്ലവി പറഞ്ഞു.

സീതയുടെ വേഷം താൻ നേടിയെടുത്തതല്ലെന്നും, അത് ലഭിച്ചത് ദൈവാനുഗ്രഹമായാണെന്നും താരം വ്യക്തമാക്കി.

"സീതാ മാതാവിന്റെ വേഷം ഞാൻ സ്വയം തെരഞ്ഞെടുത്തതാണെന്ന് ഞാൻ കരുതുന്നില്ല. ഇത് അനുഗ്രഹമായി ലഭിച്ച അവസരമാണ്. ഇത്തരമൊരു കഥാപാത്രം പിന്തുടർന്ന് നേടിയെടുക്കാനോ മുൻകൂട്ടി ആസൂത്രണം ചെയ്ത് അവതരിപ്പിക്കാനോ കഴിയില്ല. ഓരോ ദിവസവും ഞാൻ ധ്യാനിച്ച് 'സീതാ മാതാവേ, എന്നിലൂടെ അങ്ങ് തന്നെ അഭിനയിക്കൂ' എന്ന് പ്രാർത്ഥിക്കുമായിരുന്നു. എന്നിലൂടെ പുറത്തുവന്നതെല്ലാം ആ കഥാപാത്രത്തിന് യോജിച്ചതാണെന്ന് ഞാൻ വിശ്വസിക്കുന്നു," സായ് പല്ലവി പറഞ്ഞു.

ഷൂട്ടിങ് കാലയളവിൽ തന്റെ ചിന്തകളിലും പെരുമാറ്റത്തിലും പരമാവധി ശുദ്ധി നിലനിർത്താൻ ശ്രമിച്ചിരുന്നുവെന്നും താരം പറഞ്ഞു.

"ആ കഥാപാത്രത്തെ അവതരിപ്പിക്കുമ്പോൾ എന്റെ ചിന്തകളിൽ പോലും ശുദ്ധി കാത്തുസൂക്ഷിക്കാൻ ഞാൻ ശ്രമിച്ചു. ഉള്ളിൽ ഒരു നിഷ്പക്ഷത നിലനിർത്തി. അങ്ങനെയാണ് എന്റെ ഏറ്റവും മികച്ച പതിപ്പ് തന്നെ ആ കഥാപാത്രത്തിനായി സമർപ്പിക്കാൻ കഴിഞ്ഞത്," സായ് പല്ലവി കൂട്ടിച്ചേർത്തു.

നിതേഷ് തിവാരി സംവിധാനം ചെയ്യുന്ന 'രാമായണ' സിനിമയ്ക്കായി ലോകമെമ്പാടുമുള്ള പ്രേക്ഷകർ കാത്തിരിക്കുകയാണ്. ചിത്രത്തിൽ ശ്രീരാമനായി രൺബീർ കപൂറും സീതയായി സായ് പല്ലവിയും എത്തുന്നു.

ചിത്രത്തിന്റെ ഔദ്യോഗിക ട്രെയ്‌ലർ 2026 ജൂലൈ 24-ന് പുറത്തിറങ്ങും. ഇതിന് മുന്നോടിയായി ന്യൂഡൽഹിയിൽ നടന്ന 'പ്രഥം സങ്കൽപ്' ചടങ്ങിലൂടെയാണ് ചിത്രത്തിന്റെ ആഗോള പ്രചാരണത്തിന് തുടക്കമായത്. ചടങ്ങിൽ ട്രെയ്‌ലറിന്റെ പ്രത്യേക പ്രിവ്യൂവും പ്രദർശിപ്പിച്ചു.