വഖഫ് ബോർഡിൽ അമുസ്ലിം അംഗങ്ങളില്ല; സർക്കാരിനോട് വിശദീകരണം തേടി ഹൈക്കോടതി

JUNE 11, 2026, 5:01 AM

കൊച്ചി: കേരള വഖഫ് ബോർഡിൽ അമുസ്ലിം വിഭാഗത്തിൽപ്പെട്ട രണ്ട് അംഗങ്ങളെ ഉൾപ്പെടുത്താത്തതുമായി ബന്ധപ്പെട്ട ഹർജിയിൽ സംസ്ഥാന സർക്കാരിനോട് വിശദീകരണം തേടി ഹൈക്കോടതി. ബിജെപി സംസ്ഥാന ഉപാധ്യക്ഷൻ ഷോൺ ജോർജ് സമർപ്പിച്ച ഹർജിയിലാണ് കോടതി നടപടി.

രണ്ടാഴ്ചയ്ക്കകം മറുപടി നൽകാനാണ് ഹൈക്കോടതി സർക്കാരിന് നിർദേശം നൽകിയിരിക്കുന്നത്. ചീഫ് ജസ്റ്റിസ് സൗമെൻ സെൻ ഉൾപ്പെട്ട ഡിവിഷൻ ബെഞ്ചാണ് ഹർജി പരിഗണിച്ചത്.

2025ലെ വഖഫ് നിയമഭേദഗതി പ്രകാരം വഖഫ് ബോർഡിൽ രണ്ട് അമുസ്ലിം അംഗങ്ങൾ ഉണ്ടായിരിക്കണമെന്ന വ്യവസ്ഥ നിലനിൽക്കുന്നുണ്ടെന്ന് ഹർജിയിൽ ചൂണ്ടിക്കാട്ടുന്നു. എന്നാൽ ഈ വ്യവസ്ഥ പാലിക്കാതെയാണ് കേരള വഖഫ് ബോർഡ് പുനഃസംഘടിപ്പിച്ചതെന്നും അതിനാൽ നിലവിലെ ബോർഡിന്റെ രൂപീകരണവും പ്രവർത്തനവും നിയമപരമായി ചോദ്യം ചെയ്യപ്പെടേണ്ടതാണെന്നുമാണ് ഹർജിക്കാരന്റെ വാദം.

2026ൽ കേരള വഖഫ് ബോർഡ് പുനഃസംഘടിപ്പിച്ചപ്പോൾ സർക്കാർ ഒമ്പത് അംഗങ്ങളെയാണ് നാമനിർദേശം ചെയ്തത്. ഇവരിൽ എല്ലാവരും മുസ്ലിം സമുദായത്തിൽപ്പെട്ടവരാണെന്നും, നിയമത്തിൽ നിർദേശിച്ചിരിക്കുന്ന അമുസ്ലിം പ്രതിനിധിത്വം ഉറപ്പാക്കിയിട്ടില്ലെന്നും ഹർജിയിൽ പറയുന്നു.

നിയമഭേദഗതിയിലെ വ്യവസ്ഥകൾ ലംഘിച്ചാണ് ബോർഡ് രൂപീകരിച്ചതെന്നും അതിനാൽ ബോർഡിന്റെ നിയമസാധുത പരിശോധിക്കണമെന്നും ഷോൺ ജോർജ് ആവശ്യപ്പെട്ടിട്ടുണ്ട്.

സർക്കാരിന്റെ വിശദീകരണം ലഭിച്ചശേഷം ഹർജിയിൽ തുടർനടപടികൾ സ്വീകരിക്കുമെന്ന് കോടതി വ്യക്തമാക്കി.