ന്യൂഡെല്‍ഹി: ഹാസ്യനടന്‍ സമയ് റെയ്നയുടെ 'ഇന്ത്യാസ് ഗോട്ട് ലാറ്റന്റ്' ഷോയില്‍ നടത്തിയ മോശം തമാശയുടെ പേരില്‍ വിവിധ സംസ്ഥാനങ്ങളില്‍ കേസിലുള്‍പ്പെട്ട യൂട്യൂബറും പോഡ്കാസ്റ്ററുമായ രണ്‍വീര്‍ അലാബാദിയയ്ക്ക് അറസ്റ്റില്‍ നിന്ന് സുപ്രീം കോടതി സംരക്ഷണം അനുവദിച്ചു. 'മനസ്സിലെ അഴുക്ക് ഛര്‍ദ്ദിച്ചതിന്' സുപ്രീം കോടതി അലാബാദിയയെ കടുത്ത ഭാഷയില്‍ വിമര്‍ശിച്ച കോടതി,  തല്‍ക്കാലം മറ്റ് ഷോകള്‍ ചെയ്യുന്നതില്‍ നിന്ന് അദ്ദേഹത്തെ വിലക്കുകയും ചെയ്തു.

മുംബൈ, ഗുവാഹത്തി, ജയ്പൂര്‍ എന്നിവിടങ്ങളില്‍ ഫയല്‍ ചെയ്ത എഫ്‌ഐആറുകളില്‍ അലാബാദിയയുടെ ഹര്‍ജി പരിഗണിച്ച ജസ്റ്റിസ് സൂര്യകാന്ത്, ജസ്റ്റിസ് എന്‍ കോടീശ്വര്‍ സിംഗ് എന്നിവരടങ്ങിയ ബെഞ്ച്, ഇത്തരം പെരുമാറ്റം അപലപിക്കപ്പെടേണ്ടതുണ്ടെന്ന് പറഞ്ഞു. മാതാപിതാക്കള്‍ ലൈംഗിക ബന്ധത്തില്‍ ഏര്‍പ്പെടുന്നത് സംബന്ധിച്ച പരാമര്‍ശം സമൂഹത്തെ മുഴുവന്‍ ലജ്ജിപ്പിക്കുന്ന അദ്ദേഹത്തിന്റെ വികൃതമായ മനസ്സാണ് കാണിക്കുന്നതെന്ന് കോടതി പറഞ്ഞു. 

കേന്ദ്രത്തിനും മഹാരാഷ്ട്ര, അസം സര്‍ക്കാരുകള്‍ക്കും സുപ്രീം കോടതി നോട്ടീസ് അയച്ചു. എന്തെങ്കിലും ഭീഷണി ഉണ്ടായാല്‍ തനിക്കും കുടുംബത്തിനും സംരക്ഷണം തേടി അലാബാദിയക്ക് മഹാരാഷ്ട്രയിലെയും അസമിലെയും പോലീസിനെ സമീപിക്കാമെന്നും അതില്‍ പറയുന്നു.

സമാന ആരോപണങ്ങളുടെ പേരില്‍ അദ്ദേഹത്തിനെതിരെ എഫ്‌ഐആറുകള്‍ ഫയല്‍ ചെയ്യരുതെന്ന് കോടതി നിര്‍ദേശിച്ചു. അന്വേഷണത്തോട് സഹകരിക്കാന്‍ രണ്‍വീറിനോട് കോടതി ആവശ്യപ്പെട്ടു. അനുമതിയില്ലാതെ രാജ്യം വിടരുതെന്നും അലാബാദിയയോട് സുപ്രീം കോടതി ആവശ്യപ്പെട്ടു. പാസ്‌പോര്‍ട്ട് താനെ പൊലീസില്‍ ഏല്‍പ്പിക്കണം. 

ജയ്പൂരില്‍ അലാബാദിയയ്ക്കെതിരെ മറ്റെന്തെങ്കിലും എഫ്‌ഐആര്‍ രജിസ്റ്റര്‍ ചെയ്തിട്ടുണ്ടെങ്കില്‍, ആ പരാതിയിലും അദ്ദേഹത്തിന്റെ അറസ്റ്റ് താല്‍ക്കാലികമായി തടയുമെന്ന് സുപ്രീം കോടതി പറഞ്ഞു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്