നവി മുംബൈയിൽ മണിക്കൂറുകളോളം വൈദ്യുതി മുടക്കം; പ്രതിഷേധവുമായി നാട്ടുകാർ, ദില്ലിയിലും വൈദ്യുതി പ്രതിസന്ധി

JUNE 8, 2026, 12:23 AM

നവി മുംബൈ: മഹാരാഷ്ട്രയിലെ നവി മുംബൈയിൽ തുടർച്ചയായ വൈദ്യുതി മുടക്കത്തിനെതിരെ പ്രതിഷേധവുമായി നാട്ടുകാർ രംഗത്തെത്തി. ആറുമണിക്കൂറിലേറെ നീണ്ട വൈദ്യുതി തടസ്സത്തെ തുടർന്ന് നിരവധി പ്രദേശങ്ങളിലെ ജനജീവിതം താറുമാറായതോടെയാണ് പ്രതിഷേധം ശക്തമായത്.

വൈദ്യുതി വിതരണത്തിലെ ആവർത്തിച്ചുള്ള തടസ്സങ്ങൾക്കെതിരെ നാട്ടുകാർ പോലീസ് സ്റ്റേഷനു മുന്നിൽ പ്രതിഷേധം സംഘടിപ്പിച്ചു. മഹാരാഷ്ട്ര സ്റ്റേറ്റ് ഇലക്ട്രിസിറ്റി ഡിസ്ട്രിബ്യൂഷൻ കമ്പനി ലിമിറ്റഡിന്റെ (എംഎസ്ഇഡിസിഎൽ) ഉദ്യോഗസ്ഥർക്കെതിരെ നിയമനടപടി സ്വീകരിക്കണമെന്നും പ്രതിഷേധക്കാർ ആവശ്യപ്പെട്ടു.

തുടർച്ചയായ വൈദ്യുതി മുടക്കം വീടുകളെയും വ്യാപാര സ്ഥാപനങ്ങളെയും സാരമായി ബാധിക്കുന്നതായി നാട്ടുകാർ ആരോപിച്ചു. പ്രത്യേകിച്ച് വേനൽക്കാലത്ത് മണിക്കൂറുകളോളം വൈദ്യുതി ഇല്ലാതാകുന്നത് വലിയ ദുരിതമാണ് സൃഷ്ടിക്കുന്നതെന്നും അവർ ചൂണ്ടിക്കാട്ടി.

അതേസമയം, ദേശീയ തലസ്ഥാനമായ ദില്ലിയിലും വൈദ്യുതി വിതരണവുമായി ബന്ധപ്പെട്ട പ്രശ്നങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. ഉയർന്ന വൈദ്യുതി ആവശ്യകതയും വിതരണ ശൃംഖലയിലെ സമ്മർദവും ചില മേഖലകളിൽ പ്രതിസന്ധിക്ക് കാരണമായെന്നാണ് സൂചന.

വൈദ്യുതി മുടക്കവുമായി ബന്ധപ്പെട്ട പരാതികൾക്ക് അടിയന്തര പരിഹാരം കാണണമെന്നും അടിസ്ഥാന സൗകര്യങ്ങൾ മെച്ചപ്പെടുത്തി സ്ഥിരതയാർന്ന വൈദ്യുതി വിതരണം ഉറപ്പാക്കണമെന്നും നാട്ടുകാർ ആവശ്യപ്പെട്ടു.