വിദേശയാത്രകൾ സ്വപ്നം കാണുന്ന ഇന്ത്യൻ പൗരന്മാർക്ക് വലിയൊരു തിരിച്ചടിയുടെ വാർത്തയാണ് പുറത്തുവരുന്നത്. ആഗോള പാസ്‌പോർട്ട് കരുത്തിന്റെ റാങ്കിംഗിൽ ഇന്ത്യ ഏഴ് സ്ഥാനങ്ങൾ താഴേക്ക് പതിച്ചു. ആർട്ടൺ ക്യാപിറ്റൽ പുറത്തുവിട്ട ഏറ്റവും പുതിയ ഗ്ലോബൽ പാസ്‌പോർട്ട് പവർ റാങ്ക് 2026 വിവരങ്ങൾ അനുസരിച്ച് ഇന്ത്യ നിലവിൽ 73-ാം സ്ഥാനത്താണ്.

കഴിഞ്ഞ വർഷം അതായത് 2025-ൽ 66-ാം റാങ്കിലായിരുന്ന ഇന്ത്യയ്ക്കാണ് ഈ വൻ തിരിച്ചടി നേരിട്ടിരിക്കുന്നത്. മൊബിലിറ്റി സ്‌കോർ 73-ൽ നിന്ന് 69 ആയി കുറഞ്ഞതാണ് തിരിച്ചടിക്ക് കാരണം. റാങ്കിംഗിലെ ഈ വീഴ്ചയോടെ മുൻകൂട്ടി വിസയില്ലാതെ വിമാനമിറങ്ങി വിസ ഓൺ അറൈവൽ സ്വന്തമാക്കാമായിരുന്ന അഞ്ച് രാജ്യങ്ങളിലെ സൗകര്യം ഇന്ത്യൻ യാത്രികർക്ക് പൂർണ്ണമായും നഷ്ടമായി.

ഇതോടെ അഞ്ച് രാജ്യങ്ങളിലേക്ക് യാത്ര ചെയ്യാൻ ഇനി മുതൽ മലയാളി യാത്രികർ അടക്കമുള്ള പൗരന്മാർ മുൻകൂട്ടി വിസയ്ക്ക് അപേക്ഷിക്കേണ്ടി വരും. ഇതോടെ ഇന്ത്യക്കാർക്ക് വിസയില്ലാതെ യാത്ര ചെയ്യാവുന്ന രാജ്യങ്ങളുടെ ലിസ്റ്റിൽ വ്യതിയാനങ്ങൾ വന്നിട്ടുണ്ട്. നിലവിൽ 25 രാജ്യങ്ങളിലേക്ക് മാത്രമാണ് മുൻകൂട്ടി വിസയില്ലാതെ ഇന്ത്യക്കാർക്ക് പ്രവേശനം സാധ്യമാകുന്നത്.

ഏറ്റവും പുതിയ വിവരങ്ങൾ അനുസരിച്ച് 39 രാജ്യങ്ങളിൽ വിസ ഓൺ അറൈവൽ സൗകര്യം ലഭ്യമാണ്. എന്നാൽ 129 രാജ്യങ്ങളിലേക്ക് യാത്ര ചെയ്യാൻ ഇന്ത്യക്കാർക്ക് ഇപ്പോഴും മുൻകൂട്ടി അപേക്ഷിച്ചുള്ള വിസ നിർബന്ധമാണ്. വിയറ്റ്‌നാം, ഉഗാണ്ട, സിംബാബ്‌വെ, ഉസ്‌ബെക്കിസ്ഥാൻ തുടങ്ങിയ രാജ്യങ്ങൾക്കൊപ്പമാണ് ഇന്ത്യ നിലവിൽ 73-ാം റാങ്ക് പങ്കിടുന്നത്.

അതേസമയം ലോകത്തിലെ ഏറ്റവും ശക്തമായ പാസ്‌പോർട്ട് എന്ന പദവി യുഎഇ സ്വന്തമാക്കി. 181 മൊബിലിറ്റി സ്‌കോറുമായാണ് യുഎഇ ഒന്നാം സ്ഥാനത്ത് തുടരുന്നത്. യുഎഇ പാസ്‌പോർട്ടുള്ളവർക്ക് 138 രാജ്യങ്ങളിലേക്ക് വിസയില്ലാതെയും 43 രാജ്യങ്ങളിലേക്ക് വിസ ഓൺ അറൈവൽ വഴിയും യാത്ര ചെയ്യാം.

പട്ടികയിൽ ഏറ്റവും പിന്നിൽ നിലയുറപ്പിച്ചിരിക്കുന്നത് അഫ്ഗാനിസ്ഥാനാണ്. വെറും 35 മൊബിലിറ്റി സ്‌കോറുമായി 99-ാം സ്ഥാനത്താണ് അഫ്ഗാനിസ്ഥാൻ. ആഗോളതലത്തിൽ ഓരോ രാജ്യങ്ങളും തമ്മിലുണ്ടാക്കുന്ന നയതന്ത്ര കരാറുകളുടെയും സുരക്ഷാ മാനദണ്ഡങ്ങളുടെയും അടിസ്ഥാനത്തിലാണ് പാസ്‌പോർട്ട് റാങ്കിംഗുകൾ മാറ്റത്തിന് വിധേയമാകുന്നത്.

എന്നാൽ ഇത്തരത്തിലുള്ള സ്വകാര്യ ഏജൻസികളുടെ റാങ്കിംഗ് സംവിധാനങ്ങളെ കേന്ദ്ര വിദേശകാര്യ മന്ത്രാലയം ഔദ്യോഗികമായി തള്ളിക്കളയാറുണ്ട്. പാസ്‌പോർട്ടുകളുടെ കരുത്ത് അളക്കാൻ സാർവത്രികമായി അംഗീകരിക്കപ്പെട്ട ഏകീകൃത മാനദണ്ഡങ്ങൾ നിലവിലില്ലെന്നാണ് കേന്ദ്ര സർക്കാരിന്റെ വിശദീകരണം.

വ്യത്യസ്ത സ്ഥാപനങ്ങൾ സ്വന്തം മാനദണ്ഡങ്ങൾ അനുസരിച്ചാണ് ഇത്തരം റാങ്കിംഗുകൾ തയ്യാറാക്കുന്നതെന്നും അത് ഔദ്യോഗികമല്ലെന്നും പാർലമെന്റിൽ സർക്കാർ വ്യക്തമാക്കിക്കഴിഞ്ഞിട്ടുണ്ട്. എങ്കിലും അന്താരാഷ്ട്ര യാത്രികർക്കിടയിൽ ഈ വിവരങ്ങൾ വലിയ ചർച്ചയായി മാറുന്നുണ്ട്.

വിദേശ വിനോദസഞ്ചാരവും ബിസിനസ് യാത്രകളും വർദ്ധിച്ചുവരുന്ന ഈ സാഹചര്യത്തിൽ പാസ്‌പോർട്ട് റാങ്കിംഗിലെ ഇടിവ് വലിയ ശ്രദ്ധ നേടുന്നുണ്ട്. വരും നാളുകളിൽ കൂടുതൽ രാജ്യങ്ങളുമായി നയതന്ത്ര ചർച്ചകൾ നടത്തി വിസ ഇളവുകൾ നേടാനാണ് ഇന്ത്യ ശ്രമിക്കുന്നത്.

English Summary: Indias passport has dropped seven places to 73rd position in the Global Passport Power Rank 2026 by Arton Capital, losing visa on arrival access to five countries.

Tags: Malayalam News, News Malayalam, Latest Malayalam News, Vachakam News, Indian Passport Ranking 2026, Global Passport Power Rank, Visa On Arrival India, India News Malayalam

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്