നെറ്റ്ഫ്ലിക്സിന്റെ പൊളിറ്റിക്കൽ ത്രില്ലർ സീരീസ് 'ദി ലോർഡ്സ് ഡേ'; ചാനൽ ക്രെസ്‌വെൽ പ്രധാന വേഷത്തിൽ

SEPTEMBER 23, 2026, 5:16 AM

'ദിസ് ഈസ് ഇംഗ്ലണ്ട്', 'ദി ജെന്റിൽമെൻ' എന്നീ ചിത്രങ്ങളിലൂടെ ശ്രദ്ധേയയായ പ്രശസ്ത ബ്രിട്ടീഷ് നടി ചാനൽ ക്രെസ്‌വെൽ നെറ്റ്ഫ്ലിക്സിന്റെ വരാനിരിക്കുന്ന പൊളിറ്റിക്കൽ ത്രില്ലർ സീരീസ് 'ദി ലോർഡ്സ് ഡേ'യിൽ (The Lords' Day) പ്രധാന വേഷത്തിലെത്തുന്നു.

ഡാംസൺ ഇദ്രിസ് കേന്ദ്രകഥാപാത്രമാകുന്ന ഈ പരമ്പരയിൽ ചാനൽ ക്രെസ്‌വെൽ അവതരിപ്പിക്കുന്ന കഥാപാത്രത്തെക്കുറിച്ചുള്ള വിവരങ്ങൾ നിലവിൽ പുറത്തുവിട്ടിട്ടില്ല.

'ഹൗസ് ഓഫ് കാർഡ്സ്' എഴുത്തുകാരൻ മൈക്കൽ ഡോബ്‌സിന്റെ നോവലിനെ ആസ്പദമാക്കിയാണ് ആറ് എപ്പിസോഡുകളുള്ള ഈ പരമ്പര ഒരുങ്ങുന്നത്. ബ്രിട്ടീഷ് രഹസ്യാന്വേഷണ ഉദ്യോഗസ്ഥനായ ഹാരി ജോൺസിന്റെ കഥയാണ് പരമ്പര പറയുന്നത്.

പാർലമെന്റ് സമ്മേളനത്തിനിടെ ഉണ്ടാകുന്ന വൻ ഉപരോധവുംതുടർന്നുണ്ടാകുന്ന രാഷ്ട്രീയ അനിശ്ചിതത്വങ്ങളും മറികടന്ന് രാജ്യത്തെ രക്ഷിക്കാൻ ഹാരി നടത്തുന്ന ശ്രമങ്ങളാണ് സീരീസിന്റെ പ്രമേയം.

ജോനാഥൻ ബ്രാക്ക്ലി, സാം വിൻസെന്റ് എന്നിവർ ചേർന്ന് തിരക്കഥയൊരുക്കുന്ന ഈ ബിഗ് ബജറ്റ് സീരീസിൽ ഹാരി ലോട്ടി, തിമോത്തി സ്പോൾ, അർസെമ തോമസ്, സോഫി വില്ലൻ, ജെമ്മ വീലൻ എന്നിവരും പ്രധാന വേഷങ്ങളിൽ അണിനിരക്കുന്നുണ്ട്.