‘മെൽകൗ പോണ്ടിച്ചേരി’ ആഗോള റിലീസ് നവംബർ 13ന്

NOVEMBER 3, 2026, 10:30 PM

അർജുൻ അശോകൻ, ബാലു വർഗീസ്, അൽതാഫ് സലിം, ശരത് സഭ എന്നിവർ പ്രധാന വേഷങ്ങളിലെത്തുന്ന ‘മെൽകൗ പോണ്ടിച്ചേരി’ നവംബർ 13ന് ആഗോള റിലീസായി തിയേറ്ററുകളിലെത്തും. ‌‌‌ പുതുമുഖം ശ്രീലക്ഷ്മി വിജയനാണ് ചിത്രത്തിലെ നായിക.

ചിത്രത്തിന്റെ ആദ്യ ടീസർ അർജുൻ അശോകന്റെ ജന്മദിനത്തോടനുബന്ധിച്ച് പുറത്തിറക്കിയിരുന്നു. ചിരിയും രസകരമായ സംഭവങ്ങളും നിറഞ്ഞ ഒരു യുവത്വാഘോഷമാണ് ചിത്രം വാഗ്ദാനം ചെയ്യുന്നതെന്ന സൂചനയാണ് ടീസർ നൽകിയത്.

നിഖിൽ മോഹൻ കഥയെഴുതി സംവിധാനം ചെയ്യുന്ന ചിത്രം അരുൺ ഗോപി എക്സൈറ്റ്മെന്റിന്റെ ബാനറിൽ അരുൺ ഗോപിയും ജസ്റ്റിൻ ആൻഡ് മാത്യു എന്റർടെയ്ൻമെന്റ്സിന്റെ ബാനറിൽ ജസ്റ്റിൻ മാത്യുവും ചേർന്നാണ് നിർമ്മിക്കുന്നത്. സുനന്ദ ഫിലിപ്പ് ജസ്റ്റിൻ, സൗമ്യ ജോൺ അരുൺ എന്നിവരാണ് എക്സിക്യൂട്ടീവ് പ്രൊഡ്യൂസർമാർ. ഗുഡ് വിൽ എന്റർടെയ്ൻമെന്റ്സ് ആണ് ചിത്രം കേരളത്തിലെ തിയേറ്ററുകളിൽ വിതരണം ചെയ്യുന്നത്.

കേരളത്തിൽ നിന്നുള്ള ഒരു സംഘം സുഹൃത്തുക്കൾ പോണ്ടിച്ചേരിയിലേക്ക് നടത്തുന്ന യാത്രയും അവിടെ അരങ്ങേറുന്ന സംഭവങ്ങളുമാണ് ചിത്രത്തിന്റെ കഥാപശ്ചാത്തലം. സൗഹൃദവും ആഘോഷങ്ങളും അപ്രതീക്ഷിത സംഭവങ്ങളും ഒത്തുചേരുന്ന രസകരമായ യാത്രയാണ് സിനിമയിലൂടെ അവതരിപ്പിക്കുന്നത്. തുടക്കം മുതൽ ഒടുക്കം വരെ പ്രേക്ഷകരെ ചിരിപ്പിക്കുന്നതിനൊപ്പം ത്രില്ലും ആവേശവും സമ്മാനിക്കുന്ന ഫൺ റൈഡായിരിക്കും ചിത്രമെന്ന പ്രതീക്ഷയാണ് ടീസർ നൽകിയത്.

അർജുൻ അശോകനും ബാലു വർഗീസും അൽതാഫ് സലിമും ശരത് സഭയും ഒരുമിക്കുന്നതാണ് ചിത്രത്തിന്റെ പ്രധാന ആകർഷണം. തമിഴ് ഹാസ്യ താരം മൊട്ട രാജേന്ദ്രനും ചിത്രത്തിൽ ശ്രദ്ധേയമായ വേഷത്തിലെത്തുന്നു. സനൂപ് തൈക്കുടമാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. തിരക്കഥാകൃത്ത് കൂടിയായ സനൂപ് ചിത്രത്തിൽ ഒരു കഥാപാത്രത്തെയും അവതരിപ്പിക്കുന്നുണ്ട്. സോഷ്യൽ മീഡിയ ഇൻഫ്ലുവൻസറായ അന്നാമ്മയും ചിത്രത്തിൽ പ്രധാന വേഷത്തിലുണ്ട്.