ക്യാപ്റ്റൻ ജാക്ക് സ്പാരോ ആയി ജോണി ഡെപ്പ് വീണ്ടും എത്തുമോ?

NOVEMBER 3, 2026, 8:14 PM

ലോകമെമ്പാടുമുള്ള സിനിമാപ്രേമികളുടെ പ്രിയപ്പെട്ട കഥാപാത്രമായ 'ക്യാപ്റ്റൻ ജാക്ക് സ്പാരോ' ആയി വീണ്ടും വെള്ളിത്തിരയിൽ എത്തുമോ എന്ന വിഷയത്തിൽ മനസ്സ് തുറന്ന് ഹോളിവുഡ് താരം ജോണി ഡെപ്പ്. 'പൈറേറ്റ്‌സ് ഓഫ് ദി കരീബിയൻ' ഫ്രാഞ്ചൈസിയുടെ ആറാം ഭാഗത്തിലേക്ക് തിരികെയെത്തുന്നതിനെ കുറിച്ചാണ് താരം പ്രതികരിച്ചത്.

'എബനേസർ' പ്രൊമോഷൻ ചടങ്ങിനിടെയാണ് ജോണി ഡെപ്പ് തന്റെ നിലപാട് വ്യക്തമാക്കിയത്. ഫ്രാഞ്ചൈസി നിർമ്മാതാവും തന്റെ അടുത്ത സുഹൃത്തുമായ ജെറി ബ്രൂക്ക്‌ഹൈമർ ആവശ്യപ്പെട്ടാൽ താൻ അത് ഒരിക്കലും നിരസിക്കില്ലെന്ന് ഡെപ്പ് പറഞ്ഞു.

പരമ്പര മികച്ച രീതിയിൽ അവസാനിപ്പിക്കാൻ സഹായിക്കുക എന്നതാണ് തന്റെ ആഗ്രഹം. ജെറിയെ തനിക്ക് പൂർണ്ണ വിശ്വാസമുണ്ടെന്നും അദ്ദേഹം വിളിച്ചാൽ നാളെ വേണമെങ്കിലും ജോലിയിൽ പ്രവേശിക്കാൻ തയ്യാറാണെന്നും ഡെപ്പ് കൂട്ടിച്ചേർത്തു.

ചിത്രത്തിന്റെ തിരക്കഥ പൂർത്തിയാക്കാനുള്ള ശ്രമങ്ങൾ പുരോഗമിക്കുകയാണെന്നും ജോണി ഡെപ്പുമായി ചർച്ചകൾ നടക്കുന്നുണ്ടെന്നും നിർമ്മാതാവ് ജെറി ബ്രൂക്ക്‌ഹൈമറും സ്ഥിരീകരിച്ചിട്ടുണ്ട്. നല്ലൊരു കഥാപാത്രവും തിരക്കഥയും ലഭിച്ചാൽ ഡെപ്പ് തീർച്ചയായും തിരിച്ചെത്തുമെന്നാണ് പ്രതീക്ഷ.

2003-ൽ പുറത്തിറങ്ങിയ 'ദി കേഴ്‌സ് ഓഫ് ദി ബ്ലാക്ക് പേൾ' എന്ന ചിത്രത്തിലൂടെയാണ് ജോണി ഡെപ്പ് ജാക്ക് സ്പാരോ ആയി ആദ്യമായി പ്രേക്ഷകർക്ക് മുന്നിലെത്തിയത്. 2017-ൽ പുറത്തിറങ്ങിയ 'ഡെഡ് മെൻ ടെൽ നോ ടെയിൽസ്' എന്ന ചിത്രത്തിലാണ് താരം അവസാനമായി ഈ വേഷത്തിൽ പ്രത്യക്ഷപ്പെട്ടത്.