വരാനിരിക്കുന്ന യൂണിറ്റി കപ്പ് ഫുട്‌ബോൾ ടൂർണമെന്റിനുള്ള 28 അംഗ പ്രാഥമിക ഇന്ത്യൻ ടീമിനെ മുഖ്യ പരിശീലകൻ ഖാലിദ് ജമീൽ പ്രഖ്യാപിച്ചു.

ഐ.എസ്.എൽ 2025-26 സീസൺ അവസാനിച്ചാലുടൻ ബംഗളൂരുവിൽ നടക്കുന്ന ഹ്രസ്വകാല പരിശീലന ക്യാമ്പിനായി ബ്ലൂ ടൈഗേഴ്‌സ് ഒത്തുചേരും. തുടർന്ന് മെയ് 24ന് ടീം ലണ്ടനിലേക്ക് തിരിക്കും. പരിശീലന ക്യാമ്പിലെ താരങ്ങളുടെ പ്രകടനം നേരിട്ട് വിലയിരുത്തിയ ശേഷം ടൂർണമെന്റിനുള്ള അന്തിമ 23 അംഗ ടീമിനെ പരിശീലകൻ പ്രഖ്യാപിക്കും. കരുത്തരായ താരങ്ങളെ ഉൾപ്പെടുത്തിക്കൊണ്ട് ടൂർണമെന്റിൽ മികച്ച മുന്നേറ്റം നടത്താനാണ് ഇന്ത്യ ലക്ഷ്യമിടുന്നത്.

ഐ.എസ്.എല്ലിൽ മികച്ച പ്രകടനം പുറത്തെടുത്ത പ്രമുഖ താരങ്ങളെല്ലാം പട്ടികയിൽ ഇടംപിടിച്ചിട്ടുണ്ട്. ഗോൾകീപ്പർമാരായ ഗുർപ്രീത് സിംഗ് സന്ധു, വിശാൽ കൈത്ത് എന്നിവർക്കൊപ്പം പ്രതിരോധ നിരയിൽ സന്ദേഷ് ജിങ്കൻ, ആകാശ് മിശ്ര എന്നിവരുമുണ്ട്. മധ്യനിരയിൽ സഹൽ അബ്ദുൽ സമദ്, അനിരുദ്ധ് ഥാപ്പ എന്നീ താരങ്ങളും മുന്നേറ്റ നിരയിൽ മൻവീർ സിംഗ്, ലാലിയൻസുവാല ചാങ്‌തെ എന്നിവരും അണിനിരക്കുന്നു. മെയ് 28ന് നടക്കുന്ന സെമി ഫൈനലിൽ ജമൈക്കയാണ് ഇന്ത്യയുടെ എതിരാളികൾ. മറ്റൊരു സെമിയിൽ നൈജീരിയ സിംബാബ്‌വെയെ നേരിടും.സാഫ് ചാമ്പ്യൻഷിപ്പ് ഉൾപ്പെടെയുള്ള വരാനിരിക്കുന്ന വലിയ ടൂർണമെന്റുകൾക്ക് മുന്നോടിയായി ടീമിനെ സജ്ജമാക്കാനുള്ള മികച്ച അവസരമാണിതെന്ന് ഖാലിദ് ജമീൽ പറഞ്ഞു.

ഫിഫ റാങ്കിംഗിൽ 136-ാം സ്ഥാനത്തുള്ള ഇന്ത്യയെ സംബന്ധിച്ചിടത്തോളം കരുത്തരായ ടീമുകളുമായി ഏറ്റുമുട്ടുന്നത് വലിയ ഗുണം ചെയ്യും. 71-ാം റാങ്കിലുള്ള ജമൈക്കയെയും 26-ാം സ്ഥാനത്തുള്ള നൈജീരിയയെയും പോലുള്ള ടീമുകൾക്കെതിരെ കളിക്കുന്നത് കളിക്കാർക്ക് കൂടുതൽ ആത്മവിശ്വാസം നൽകും. റാങ്കിംഗിൽ മുന്നിലുള്ള ഇത്തരം ടീമുകൾക്കെതിരെ ലഭിക്കുന്ന എക്‌സ്‌പോഷർ ഇന്ത്യൻ ഫുട്‌ബോളിന്റെ വളർച്ചയ്ക്ക് അത്യാവശ്യമാണ്. ദീർഘകാലമായി ഇന്ത്യൻ ഫുട്‌ബോൾ കാത്തിരിക്കുന്ന പുരോഗതിയിലേക്ക് നയിക്കാൻ ഇത്തരം വെല്ലുവിളികൾ നിറഞ്ഞ മത്സരങ്ങൾ സഹായിക്കുമെന്നാണ് ആരാധകരുടെ പ്രതീക്ഷ. യുവതാരങ്ങൾക്ക് അന്താരാഷ്ട്ര തലത്തിൽ തങ്ങളുടെ കഴിവ് തെളിയിക്കാനുള്ള വലിയ വേദിയായിരിക്കും ഈ ടൂർണമെന്റ്.

ഇന്ത്യയുടെ 28 അംഗ പ്രാഥമിക സ്‌ക്വാഡ്:

• ഗോൾകീപ്പർമാർ: ഗുർപ്രീത് സിംഗ്, വിശാൽ കൈത്ത്, ഹൃത്വിക് തിവാരി, ആൽബിനോ ഗോമസ്.
• ഡിഫൻഡർമാർ: രാഹുൽ ഭേകെ, നിഖിൽ പൂജാരി, റോഷൻ സിംഗ് നൗറെം, അഭിഷേക് സിംഗ് ടെക്ചം, അൻവർ അലി, സന്ദേശ് ജിംഗൻ, ആകാശ് മിശ്ര, ബിജോയ് വർഗീസ്, പ്രംവീർ.
• മിഡ്ഫീൽഡർമാർ: ആഷിഖ് കുരുണിയൻ, ലാലെങ്മാവിയ റാൾട്ടെ, സഹൽ അബ്ദുൾ സമദ്, അനിരുദ്ധ് ഥാപ്പ, ജീക്‌സൺ സിംഗ് തൗണോജം, നൗഫൽ പി.എൻ, റിക്കി ഷാബോംഗ്.
• ഫോർവേഡുകൾ: റയാൻ വില്യംസ്, മൻവീർ സിംഗ്, ലിസ്റ്റൺ കൊളാക്കോ, സുഹൈൽ അഹമ്മദ് ഭട്ട്, എഡ്മണ്ട് ലാൽറിൻഡിക, ലാലിയൻസുവാല ചാങ്‌ടെ, റഹീം അലി, ഫാറൂഖ് ചൗധരി.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്