മണിക്കൂറുകൾക്കുള്ളിൽ നേട്ടം തിരിച്ചു പിടിച്ച് രോഹിത്ശർമ്മ

APRIL 21, 2025, 3:49 AM

ഐപിഎല്ലിലെ മിന്നുന്ന ഒരു റെക്കോർഡ് വിരാട് കോഹ്ലി സ്വന്തമാക്കി മണിക്കൂറുകൾക്കുള്ളിൽ തിരികെ പിടിച്ച് രോഹിത് ശർമ. ഐപിഎൽ ചരിത്രത്തിൽ ഏറ്റവും കൂടുതൽ പ്ലെയർ ഓഫ് ദി മാച്ച് പുരസ്‌കാരം നേടുന്ന ഇന്ത്യൻ താരം എന്ന നേട്ടത്തിനുള്ള ഇഞ്ചോടിഞ്ച് പോരാട്ടമാണ് കോഹ്ലിയും രോഹിതും തമ്മിൽ നടക്കുന്നത്. സൂപ്പർ സൺഡേയിലെ മത്സരങ്ങൾ തുടങ്ങും മുമ്പ് 19 പ്ലെയർ ഓഫ് ദി മാച്ച് പുരസ്‌കാരങ്ങളുമായി രോഹിത് ആയിരുന്നു മുന്നിൽ നിന്നത്.

പഞ്ചാബ് കിംഗ്‌സിനെതിരെയുള്ള മിന്നുന്ന പ്രകടനത്തോടെ ആദ്യ മത്സരം കഴിഞ്ഞപ്പോൾ കോഹ്ലി രോഹിതിനൊപ്പം ഒന്നാം സ്ഥാനത്ത് എത്തി. എന്നാൽ, മണിക്കൂറുകൾക്കുള്ളിൽ തന്നെ രോഹിത് തന്റെ പേരിലുണ്ടായിരുന്ന ആ നേട്ടം തിരികെ പിടിച്ചു. ഈ സീസണിൽ ഫോം കണ്ടെത്താൻ വിഷമിച്ചിരുന്ന താരം ചെന്നൈ സൂപ്പർ കിംഗ്‌സിനെതിരെ 76 റൺസ് അടിച്ച് കൂട്ടിയാണ് പ്ലെയർ ഓഫ് ദി മാച്ച് പുരസ്‌കാരം സ്വന്തമാക്കിയത്.

18 പ്ലെയർ ഓഫ് ദി മാച്ച് പുരസ്‌കാരങ്ങളുള്ള മഹേന്ദ്ര സിംഗ് ധോണിയാണ് മൂന്നാം സ്ഥാനത്തുള്ളത്. അതേസമയം, ഐപിഎല്ലിന്റെ ചരിത്രത്തിൽ ഏറ്റവും കൂടുതൽ പ്ലെയർ ഓഫ് ദി മാച്ച് പുരസ്‌കാരം നേടിയിട്ടുള്ളത് ആർസിബിയുടെ താരമായിരുന്ന എ ബി ഡിവില്ലേഴ്‌സ് ആണ്. 25 തവണ ആ നേട്ടത്തിലെത്താൻ ഡിവില്ലേഴ്‌സിന് സാധിച്ചു. 22 പുരസ്‌കാരങ്ങൾ സ്വന്തമാക്കിയ യൂണിവേഴ്‌സൽ ബോസ് ക്രിസ് ഗെയ്ൽ ആണ് രണ്ടാം സ്ഥാനത്തുള്ളത്.