മുബൈ ക്രിക്കറ്റ് ടീമിലും ഐപിഎല്ലിൽ അവസരം ലഭിക്കാതിരുന്നതിന് പിന്നാലെ മുംബൈ ക്രിക്കറ്റ് വിട്ട് മറ്റൊരു സംസ്ഥാനത്തിനായി കളിക്കാൻ അനുമതി തേടി യുവതാരം പൃഥ്വി ഷാ. അടുത്ത ആഭ്യന്തര സീസണിൽ മറ്റേതെങ്കിലും സംസ്ഥാന അസോസിയേഷനു വേണ്ടി കളിക്കാൻ എൻഒസി നൽകണമെന്നാവശ്യപ്പെട്ടാണ് 25കാരനായ പൃഥ്വി ഷാ മുംബൈ ക്രിക്കറ്റ് അസോസിയേഷന് കത്ത് നൽകിയതെന്ന് ഇന്ത്യൻ എക്‌സ്പ്രസ് റിപ്പോർട്ട് ചെയ്തു.

ഫിറ്റ്‌നെസ് ഇല്ലായ്മയുടെ പേരിൽ കഴിഞ്ഞ വർഷം രഞ്ജി ട്രോഫി ക്രിക്കറ്റിനുള്ള മുംബൈ ടീമിൽ നിന്ന് പൃഥ്വി ഷായെ പുറത്താക്കിയിരുന്നു. പിന്നീട് പൃഥ്വി ഷായെ മുംബൈ ക്രിക്കറ്റ് അസോസിയേഷന്റെ പരിശീലകർക്ക് കീഴിൽ രണ്ടാഴ്ച ഫിറ്റ്‌നെസ് വീണ്ടെടുക്കാനുള്ള പരിശീലനത്തിന് വിട്ടു. പൃഥ്വി ഷായുടെ ശരീത്തിൽ 35 ശതമാനം അധിക കൊഴുപ്പാണെന്ന് പരിശീലകർ റിപ്പോർട്ട് നൽകുകയും ചെയ്തു. ശരീരഭാരവും കൊഴുപ്പും കുറക്കാൻ കഠിന പരിശീലനവും പരിശീലകർ നിർദേശിച്ചിരുന്നു.

മുംബൈക്കായി വീണ്ടും കളിക്കണമെങ്കിൽ ഫിറ്റ്‌നെസ് വീണ്ടെടുക്കണമെന്നും മുംബൈ ക്രിക്കറ്റ് അസോസിയേഷൻ നിർദേശിച്ചിരുന്നു. എന്നാൽ പിന്നീടും ഫിറ്റ്‌നെസ് വീണ്ടെടുക്കാൻ കഴിയാത്തതിനെ തുടർന്ന് പൃഥ്വി ഷായെ ഡിസംബറിൽ നടന്ന വിജയ് ഹസാരെ ട്രോഫിക്കുള്ള മുംബൈ ടീമിലേക്കും പരിഗണിച്ചിരുന്നില്ല.

ഇതിനെത്തുടർന്നാണ് പൃഥ്വി ഷാ മുംബൈ ക്രിക്കറ്റ് വിടാൻ തീരുമാനിച്ചത് എന്നാണ് റിപ്പോർട്ട്. രണ്ടോ മൂന്നോ ക്രിക്കറ്റ് അസോസിയേഷനുകൾ പൃഥ്വി ഷായെ തങ്ങളുടെ സംസ്ഥാനത്തിനായി കളിക്കാൻ ക്ഷണിച്ചിട്ടുണ്ടെന്നാണ് റിപ്പോർട്ട്. പ്രഫഷണൽ ക്രിക്കറ്റിൽ തന്നെ ഇത്രയും കാലം പിന്തുണച്ച മുംബൈ ക്രിക്കറ്റ് അസോസിയേഷന് നന്ദി അറിയിച്ച് പൃഥ്വി ഷാ കത്ത് നൽകിയതിനൊപ്പം മറ്റൊരു സംസ്ഥാനത്തിനായി കളിച്ച് കരിയറിൽ പുതിയ നേട്ടങ്ങൾ സ്വന്തമാക്കാൻ അനുമതി നൽകണമെന്നും അഭ്യർത്ഥിച്ചിട്ടുണ്ട്. മഹാരാഷ്ട്ര ക്രിക്കറ്റ് അസോസിയേഷനുവേണ്ടി കളിക്കാനാണ് പൃഥ്വി ഷാ ആഗ്രഹിക്കുന്നതെന്ന് സൂചനയുണ്ട്.

മുംബൈ ടീമിൽ നിന്ന് പുറത്താക്കിയതിന് പിന്നാലെ സമൂഹമാധ്യമങ്ങളിലൂടെ പലപ്പോഴും പരോക്ഷ പോസ്റ്റുകളിട്ട് പൃഥ്വി ഷാ തന്റെ വിയോജിപ്പ് അറിയിച്ചിരുന്നു. 2022നുശേഷം വിജയ് ഹസാരെ ട്രോഫിയിൽ പൃഥ്വി ഷാ മുംബൈക്കായി കളിച്ചിട്ടില്ല. ഇതിനിടെ ഇംഗ്ലണ്ടിൽ വൺ ഡേ കപ്പിൽ നോർത്താംപ്ടണിനായി കളിച്ച പൃഥ്വി ഷാ അഞ്ച് ഇന്നിംഗ്‌സുകളിൽ നിന്ന 97, 72, 9, 23, 17 എന്നിങ്ങനെ സ്‌കോർ ചെയ്തിരുന്നു.

കഴിഞ്ഞ വർഷം മുംബൈ ടീം മുഷ്താഖ് അലി ട്രോഫി ടി20 ജേതാക്കളായപ്പോൾ പൃഥ്വി ഷായെ കളിപ്പിക്കാത്തതിനെക്കുറിച്ച് ക്യാപ്ടൻ ശ്രേയസ് അയ്യരോട് ചോദിച്ചപ്പോൾ അദ്ദേഹം നൽകിയ മറുപടിയും ശ്രദ്ധേയമായിരുന്നു. മടിയിലിരുത്തി പഠിപ്പിക്കാൻ പൃഥ്വി ഷാ കൊച്ചുകുട്ടിയല്ലെന്നും ഇത്രയും കാലം ക്രിക്കറ്റ് കളിച്ച പൃഥ്വി ഷാ തന്റെ പ്രശ്‌നങ്ങൾ എന്താണെന്ന് സ്വയം തിരിച്ചറിഞ്ഞ് തിരുത്താൻ തയ്യാറാവട്ടെയെന്നുമായിരുന്നു ശ്രേയസിന്റെ പ്രതികരണം.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്