ഇന്ത്യൻ സൂപ്പർ ലീഗിന്റെ 2026 സീസൺ ആരംഭിക്കുമെന്ന പ്രതീക്ഷകൾ ഏറെക്കുറെ അവസാനിച്ചിരിക്കുകയാണ്. 2025 സെപ്തംബറിൽ തുടങ്ങേണ്ട ഐ.എസ്.എൽ ഇതുവരെയായിട്ടും ആരംഭിക്കാൻ ഓൾ ഇന്ത്യ ഫുട്‌ബോൾ ഫെഡറേഷന് സാധിച്ചിട്ടില്ല. കരാറുകാരെ കിട്ടാത്തതിലെ പ്രതിസന്ധിയാണ് തിരിച്ചടിയായി മാറിയിരിക്കുന്നത്. ടൂർണമെന്റ് ആരംഭിക്കാൻ എ.ഐ.എഫ്.എഫ് നടത്തിയ ശ്രമങ്ങളെല്ലാം പാളിയിരിക്കുകയാണ്.

ഇതോടെ വലിയ പ്രതിസന്ധിയാണ് ഇന്ത്യൻ ഫുട്‌ബോൾ നേരിടുന്നത്. ഇനി ഈ സീസണിൽ ഐ.എസ്.എൽ ആരംഭിക്കാൻ വിരളമായ സാധ്യത മാത്രമാണുള്ളത്. എ.ഐ.എഫ.്എഫ് നേതൃത്വം നൽകുന്ന പുതിയ പദ്ധതി പ്രകാരം ക്ലബ്ബുകൾക്ക് പല ആശയക്കുഴപ്പവുമുണ്ട്. സാമ്പത്തിക ചിലവിന്റെ കാര്യത്തിലും ലാഭ വിഹിതത്തിന്റെ കാര്യത്തിലുമെല്ലാം വ്യക്തത വരാത്തതിനാൽ ക്ലബ്ബുകളെല്ലാം എ.ഐ.എഫ്.എഫിനോട് ഇടഞ്ഞിരിക്കുകയാണ്.

ഇതോടെ ക്ലബ്ബുകളെല്ലാം വലിയ സാമ്പത്തിക പ്രതിസന്ധിയാണ് നേരിടുന്നത്. ഇനിയൊരു തിരിച്ചുവരവ് സാധ്യമാകാത്ത തരത്തിൽ വലിയ വെല്ലുവിളിയാണ് ടീമുകൾക്ക് മുന്നിലുള്ളത്. ഇപ്പോഴിതാ കേരളത്തിന്റെ സ്വന്തം ടീമായ കേരള ബ്ലാസ്റ്റേഴ്‌സിൽ നിന്ന് കൂടുതൽ താരങ്ങൾ പടിയിറങ്ങിയിരിക്കുകയാണ്. ഇനി എന്ന് ടൂർണമെന്റ് ആരംഭിക്കുമെന്ന കാര്യത്തിൽ വ്യക്തതയില്ലാത്തതിനാൽ താരങ്ങൾ ഭാവി നോക്കി മുന്നോട്ട് പോവുകയാണ്.

ലൂണക്ക് പിന്നാലെ നോഹ സദോയിയും ക്ലബ്ബ് വിട്ടു

കേരള ബ്ലാസ്റ്റേഴ്‌സിന്റെ സൂപ്പർ താരവും ക്യാപ്ടനുമായ അഡ്രിയാൻ ലൂണ ടീം വിട്ടുവെന്ന വാർത്ത പുറത്തുവന്നത് ഞെട്ടലോടെയാണ് ആരാധകർ കേട്ടത്. ഇത് വലിയൊരു തകർച്ചയുടെ തുടക്കമാണെന്ന കൃത്യമായ സൂചന ആ പടിയിറക്കത്തിലുണ്ടായിരുന്നു. ഇപ്പോഴിതാ കേരള ബ്ലാസ്റ്റേഴ്‌സിലെ മറ്റൊരു സൂപ്പർ താരമായ നോഹ സദോയിയും ക്ലബ്ബ് വിട്ടിരിക്കുകയാണെന്ന റിപ്പോർട്ടാണ് പുറത്തുവരുന്നത്. അഡ്രിയാൻ ലൂണയെപ്പോലെ ഇന്തോനേഷ്യൻ ഫുട്‌ബോൾ ലീഗിലേക്കാണ് സദോയിയും പോകുന്നതെന്നാണ് വിവരം.

ജനുവരിയിലെ ട്രാൻസ്ഫർ വിൻഡോയിലൂടെയാണ് ഇവർ കൂടുമാറ്റം നടത്തുക. 2027വരെ കരാറുള്ള ലൂണയെ വായ്പാ അടിസ്ഥാനത്തിലാണ് ബ്ലാസ്റ്റേഴ്‌സ് ടീം വിടാൻ അനുവദിച്ചിരിക്കുന്നത്. എന്നാൽ ഇനി ലൂണ ഒരു തിരിച്ചുവരവ് നടത്താൻ സാധ്യതയില്ല.

33കാരനായ സദോയിയും കരിയറിന്റെ നിർണ്ണായക ഘട്ടത്തിലൂടെയാണ് കടന്ന് പോകുന്നത്. അതുകൊണ്ടുതന്നെ ഇനിയും ഐഎസ്എല്ലിനായി കാത്തിരക്കില്ല. 19 മത്സരത്തിൽ നിന്ന് ഏഴ് ഗോളുകളാണ് സദോയി നേടിയത്. 1437 മിനുട്ടാണ് ബ്ലാസ്റ്റേഴ്‌സിനായി സദോയി പന്ത് തട്ടിയത്.

പരിശീലകൻ കറ്റാലയും ബ്ലാസ്റ്റേഴ്‌സ് വിട്ടേക്കും

സ്പാനിഷ് പരിശീലകനായ ഡേവിഡ് കറ്റാലയാണ് നിലവിൽ കേരള ബ്ലാസ്റ്റേഴ്‌സിന്റെ പരിശീലകൻ. ഇത്തവണ കറ്റാലക്ക് കീഴിൽ തകർപ്പൻ പ്രകടനം നടത്താമെന്നായിരുന്നു ആരാധകർ പ്രതീക്ഷിച്ചിരുന്നത്. എന്നാൽ ഇപ്പോൾ ടൂർണമെന്റ് പ്രതിസന്ധിയിലായതോടെ കേരള ബ്ലാസ്റ്റേഴ്‌സിന്റെ പരിശീലകസ്ഥാനം കറ്റാല ഒഴിഞ്ഞേക്കും. അദ്ദേഹം ഇപ്പോൾ നാട്ടിലാണുള്ളത്. പരസ്പര ധാരണയോടെ കരാർ അവസാനിപ്പിക്കുമെന്നാണ് വിവരം.

ഇത്തവണത്തെ സൂപ്പർ കപ്പിന് മുന്നോടിയായി ബ്ലാസ്റ്റേഴ്‌സിലേക്ക് വന്ന പോർച്ചുഗൽ താരം തിയാഗോ ആൽവസ് നേരത്തെ തന്നെ ടീം വിട്ടിരുന്നു. വെറും 68 മിനുട്ട് കളിച്ചാണ് താരം മടങ്ങിയത്. സ്പാനിഷ് താരം കോൾഡോ ഒബിയേറ്റയും ടീം വിടുമെന്നുറപ്പ്. വിദേശ താരങ്ങൾ മാത്രമല്ല പ്രധാന ഇന്ത്യൻ താരങ്ങളും പുതിയ തട്ടകം അന്വേഷിക്കുകയാണ്. കേരള ബ്ലാസ്റ്റേഴ്‌സ് ക്ലബ്ബ് പിരിച്ചുവിടുന്ന അവസ്ഥയിലേക്ക് കാര്യങ്ങളെത്തുമോയെന്ന ആശങ്കയാണ് ഇപ്പോൾ ആരാധകർക്കുള്ളത്.

നിസ്സഹായാവസ്ഥയെന്ന് സിഇഒ

കേരള ബ്ലാസ്റ്റേഴ്‌സ് വിടാൻ ആഗ്രഹിക്കുന്ന താരങ്ങളെ ഉപാധികളില്ലാതെ പോകാൻ അനുവദിക്കുമെന്നാണ് ടീം സിഇഒയായ അഭിക് ചാറ്റർജി പറയുന്നത്. ഒരു സാധാരണ സാഹചര്യമായിരുന്നെങ്കിൽ കളിക്കാൻ ഞങ്ങളോടൊപ്പം നിൽക്കണമെന്ന് ഞങ്ങൾ ആഗ്രഹിക്കുമായിരുന്നു. പക്ഷെ ഞങ്ങൾ പ്രായോഗികമായി ചിന്തിക്കുമ്പോൾ ഇത് ബുദ്ധിമുട്ടാണ്. താരങ്ങൾ അവരുടെ കരിയർ മുന്നോട്ട് കൊണ്ടുപോകാൻ ആഗ്രഹിക്കുന്നു. അതുകൊണ്ടുതന്നെ ക്ലബ്ബ് മാനേജ്‌മെന്റ് ഇതിന് പിന്തുണ നൽകുന്നുണ്ടെന്നാണ് അദ്ദേഹം പറഞ്ഞത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്