മാഡ്രിഡ്: സ്പാനിഷ് ലീഗിൽ അത്ലറ്റിക്കോ മാഡ്രിഡിനെതിരെ ബാഴ്സലോണ ഉജ്ജ്വല വിജയം നേടിയെങ്കിലും, സൂപ്പർ താരം ലാമിൻ യമാലിന്റെ മൈതാനത്തെ പെരുമാറ്റം വിവാദമാകുന്നു. തന്നെ സബ്സ്റ്റിറ്റ്യൂട്ട് ചെയ്തതിലുള്ള അതൃപ്തി പരസ്യമായി പ്രകടിപ്പിച്ച യമാൽ അപകടകരമായ പാതയിലാണെന്ന് മുൻ താരം ഹാവി ബാൽബോവ മുന്നറിയിപ്പ് നൽകി.
പ്രശസ്ത കായിക പരിപാടിയായ 'എൽ ചിരിൻക്വിറ്റോ'യിൽ (El Chiringuito) സംസാരിക്കവെയാണ് ബാൽബോവ യമാലിനെതിരെ ആഞ്ഞടിച്ചത്. മികച്ച പ്രകടനം നടത്തുന്നു എന്നത് അച്ചടക്കമില്ലായ്മയ്ക്ക് കാരണമാകരുത് എന്ന് അദ്ദേഹം ഓർമ്മിപ്പിച്ചു.
റോബർട്ട് ലെവൻഡോവ്സ്കി വിജയഗോൾ നേടിയപ്പോൾ ടീം ഒന്നടങ്കം ആഘോഷിച്ചെങ്കിലും യമാൽ അതിൽ പങ്കുചേരാതെ അതൃപ്തി പ്രകടിപ്പിച്ച് നിൽക്കുകയായിരുന്നു.കളിക്കളത്തിൽ നിന്ന് മാറ്റുമ്പോഴുള്ള താരത്തിന്റെ രോഷപ്രകടനങ്ങൾ ഇപ്പോൾ പതിവാകുന്നുവെന്നും ഇത് നിയന്ത്രിക്കപ്പെടണമെന്നും ബാൽബോവ പറഞ്ഞു.
"യമാൽ പോകുന്നത് അപകടകരമായ പാതയിലൂടെയാണ്. ആരെങ്കിലും ഇത് അവനോട് പറഞ്ഞു കൊടുക്കണം. വിനീഷ്യസ് ജൂനിയർ നേരിടുന്ന അത്രയും വിമർശനം യമാലിന് ലഭിക്കുന്നില്ല എന്നത് അത്ഭുതകരമാണ്." - ഹാവി ബാൽബോവ വ്യക്തമാക്കി.
എന്നാൽ തന്റെ പ്രിയ താരത്തെ പിന്തുണച്ച് ബാഴ്സലോണ പരിശീലകൻ ഹാൻസി ഫ്ലിക്ക് രംഗത്തെത്തി. യമാലിന്റേത് വെറും 'വാശി'യല്ലെന്നും മറിച്ച് കളി ജയിക്കാനുള്ള അടങ്ങാത്ത ആഗ്രഹത്തിന്റെ ഭാഗമാണെന്നും ഫ്ലിക്ക് പറഞ്ഞു.
"യമാലിന് വെറും 18 വയസ്സ് മാത്രമാണ് പ്രായം. ഈ പ്രായത്തിൽ വികാരങ്ങൾ നിയന്ത്രിക്കാൻ ബുദ്ധിമുട്ടുണ്ടാകാം. അവൻ മികച്ച കളിക്കാരനാണ്, ചിലപ്പോൾ സബ്സ്റ്റിറ്റ്യൂട്ട് ചെയ്യുമ്പോൾ നിരാശ തോന്നുന്നത് സ്വാഭാവികമാണ്," ഫ്ലിക്ക് പറഞ്ഞു.
ക്ലബ്ബ് എപ്പോഴും താരത്തിനൊപ്പമുണ്ടാകുമെന്നും തെറ്റുകൾ തിരുത്തി അവനെ ലോകത്തിലെ ഏറ്റവും മികച്ച താരമായി വളർത്തുമെന്നും അദ്ദേഹം കൂട്ടിച്ചേർത്തു. അത്ലറ്റിക്കോ മാഡ്രിഡിനെ 2-1 ന് പരാജയപ്പെടുത്തിയതോടെ പോയിന്റ് പട്ടികയിൽ 7 പോയിന്റ് ലീഡുമായി ബാഴ്സലോണ ഒന്നാം സ്ഥാനത്ത് തുടരുകയാണ്. എങ്കിലും യമാലിനെപ്പോലൊരു പ്രധാന താരത്തിന്റെ പെരുമാറ്റദൂഷ്യം വരും മത്സരങ്ങളിൽ ടീമിനെ ബാധിക്കുമോ എന്ന ആശങ്കയിലാണ് ആരാധകർ.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260408121153.jpg)
1-20260408120319.jpg)
-20260408121153.jpg)
