സെവിയ്യ: സ്പാനിഷ് ഫുട്ബോൾ ലോകത്തെ ഞെട്ടിച്ചുകൊണ്ട് സെവിയ്യ എഫ്.സിയുടെ ഉടമസ്ഥാവകാശം ക്ലബ് ഇതിഹാസം സെർജിയോ റാമോസ് ഏറ്റെടുത്തേക്കുമെന്ന് റിപ്പോർട്ടുകൾ. സാമ്പത്തിക പ്രതിസന്ധിയിലും തരംതാഴ്ത്തൽ ഭീഷണിയിലും ഉഴലുന്ന ക്ലബ്ബിന്റെ ഭാവി നിർണ്ണയിക്കുന്ന നിർണ്ണായക ചർച്ചകൾ ഏപ്രിൽ 15-ന് നടക്കും.
സെർജിയോ റാമോസിന്റെ നിക്ഷേപക ഗ്രൂപ്പായ 'ഫൈവ് ഇലവൻ ക്യാപിറ്റൽ' (Five Eleven Capital) ക്ലബ്ബിനായി ഏകദേശം 450 ദശലക്ഷം യൂറോയുടെ (ഏകദേശം 4000 കോടിയിലധികം രൂപ) ബിഡ് സമർപ്പിച്ചതായാണ് വിവരം. ക്ലബ്ബിന്റെ 70 ശതമാനത്തിലധികം ഓഹരികൾ സ്വന്തമാക്കി പൂർണ്ണ നിയന്ത്രണം ഏറ്റെടുക്കാനാണ് റാമോസ് ലക്ഷ്യമിടുന്നത്.
കഴിഞ്ഞ കുറച്ചു കാലമായി സെവിയ്യ നേരിടുന്ന കടുത്ത സാമ്പത്തിക-പ്രകടന തകർച്ചയാണ് ഇത്തരമൊരു നീക്കത്തിലേക്ക് വഴിതെളിച്ചത്. കഴിഞ്ഞ മൂന്ന് സീസണുകളിലായി ക്ലബ്ബിന് 155 ദശലക്ഷം യൂറോയുടെ നഷ്ടമുണ്ടായതായി കണക്കാക്കപ്പെടുന്നു. ഔദ്യോഗിക കണക്കുകൾ പ്രകാരം കടം 70 ദശലക്ഷം യൂറോ ആണെങ്കിലും, ഇത് 180 ദശലക്ഷം വരെയാകാമെന്നാണ് സൂചന.
ലാ ലിഗ പോയിന്റ് പട്ടികയിൽ താഴ്ന്ന നിലയിലുള്ള സെവിയ്യ രണ്ടാം ഡിവിഷനിലേക്ക് തരംതാഴ്ത്തപ്പെടുമോ എന്ന ആശങ്കയിലാണ്. ക്ലബ്ബ് ലാ ലിഗയിൽ തുടരുകയാണെങ്കിൽ ഒരു തുകയും, രണ്ടാം ഡിവിഷനിലേക്ക് പുറത്താവുകയാണെങ്കിൽ കുറഞ്ഞ തുകയും നൽകുന്ന രീതിയിലാണ് കരാർ ക്രമീകരിച്ചിരിക്കുന്നത്. ക്ലബ്ബിന്റെ മൂല്യനിർണ്ണയ നടപടികൾ (Due diligence) ഇതിനോടകം പൂർത്തിയായിക്കഴിഞ്ഞു.
വെറുമൊരു ബിസിനസ്സ് നീക്കത്തിനപ്പുറം, തന്റെ ബാല്യകാല ക്ലബ്ബിനോടുള്ള വൈകാരിക ബന്ധമാണ് റാമോസിനെ ഇതിന് പ്രേരിപ്പിക്കുന്നത്. സെവിയ്യയുടെ അക്കാദമിയിലൂടെ വളർന്ന് ലോക ഫുട്ബോളിലെ കരുത്തനായി മാറിയ റാമോസ് ഉടമയായി എത്തുന്നതോടെ ക്ലബ്ബിന്റെ കായികവും വാണിജ്യപരവുമായ തീരുമാനങ്ങളിൽ വലിയ മാറ്റങ്ങൾ പ്രതീക്ഷിക്കുന്നു. ഏപ്രിൽ 15-ന് നടക്കുന്ന ചർച്ചകൾക്ക് ശേഷം സെവിയ്യയുടെ ഭാവി സംബന്ധിച്ച ഔദ്യോഗിക പ്രഖ്യാപനം ഉണ്ടായേക്കും.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260408121153.jpg)
1-20260408120319.jpg)
-20260408121153.jpg)
