ഫിഫ ലോകകപ്പിന്റെ ചരിത്രപ്രസിദ്ധമായ നോക്കൗട്ട് റൗണ്ട് മത്സരത്തിൽ ഓസ്ട്രേലിയയെ നേരിടാനൊരുങ്ങുന്ന ഈജിപ്തിന് കളിക്ക് മുൻപ് വൻ ആശ്വാസ വാർത്ത. ഹാംസ്ട്രിങ് പരിക്കിനെ തുടർന്ന് വിശ്രമത്തിലായിരുന്ന ഈജിപ്ഷ്യൻ നായകൻ മുഹമ്മദ് സലാ ചൊവ്വാഴ്ച ടീമിനൊപ്പം പരിശീലന മൈതാനത്തേക്ക് തിരിച്ചെത്തി.
വെള്ളിയാഴ്ച നടക്കുന്ന നിർണായക മത്സരത്തിന് മുന്നോടിയായി സ്പോകെനിൽ നടക്കുന്ന പരിശീലന സെഷനിലാണ് താരം ഭാഗികമായി പങ്കെടുത്തത്. സലാ സഹതാരങ്ങൾക്കൊപ്പം പുഞ്ചിരിയോടെ നിൽക്കുന്ന ചിത്രങ്ങൾ ഈജിപ്ഷ്യൻ ഫുട്ബോൾ അസോസിയേഷൻ സോഷ്യൽ മീഡിയയിൽ പങ്കുവെച്ചുകൊണ്ട് "രാജാവ് തിരിച്ചെത്തി" എന്ന് കുറിച്ചു.
ഗ്രൂപ്പ് ഘട്ടത്തിൽ ഇറാനെതിരായ മത്സരത്തിനിടയിലാണ് ലിവർപൂൾ ഫോർവേഡായ സലാക്ക് പരിക്കേറ്റത്. മത്സരത്തിന്റെ 57-ാം മിനിറ്റിൽ താരം കളം വിട്ടത് ഈജിപ്ഷ്യൻ ആരാധകരിൽ വലിയ ആശങ്ക ഉണ്ടാക്കിയിരുന്നു. എന്നാൽ സലായുടെ പരിക്ക് ഗുരുതരമല്ലെന്നും താരം അടുത്ത മത്സരത്തിൽ തിരിച്ചെത്തുമെന്നാണ് പ്രതീക്ഷിക്കുന്നതെന്നും ഈജിപ്ത് കോച്ച് ഹൊസാം ഹസ്സൻ വ്യക്തമാക്കി. താരം പൂർണ്ണമായ രീതിയിൽ പരിശീലനം പുനരാരംഭിച്ചിട്ടില്ലെങ്കിലും ചൊവ്വാഴ്ച മൈതാനത്തിറങ്ങിയത് ഓസ്ട്രേലിയക്കെതിരെ താരം കളിച്ചേക്കുമെന്ന വലിയ പ്രതീക്ഷയാണ് നൽകുന്നത്.
ഫിഫയുടെ പുതുക്കിയ ടൂർണമെന്റ് ഘടന പ്രകാരം ചരിത്രത്തിലാദ്യമായാണ് ഈജിപ്ത് ലോകകപ്പിന്റെ നോക്കൗട്ട് ഘട്ടത്തിലേക്ക് യോഗ്യത നേടുന്നത്. ബെൽജിയത്തിന് തൊട്ടുപിന്നാലെ അഞ്ച് പോയിന്റുമായി ഗ്രൂപ്പിൽ രണ്ടാം സ്ഥാനക്കാരായാണ് ഈജിപ്ത് മുന്നേറിയത്.
ടൂർണമെന്റിൽ ന്യൂസിലാൻഡിനെതിരെ ഈജിപ്ത് നേടിയ ചരിത്രത്തിലെ ആദ്യ ലോകകപ്പ് വിജയത്തിൽ സലാ തന്റെ 68-ാം അന്താരാഷ്ട്ര ഗോൾ സ്വന്തമാക്കിയിരുന്നു. നോക്കൗട്ട് കടമ്പ കടന്ന് അടുത്ത റൗണ്ടിലേക്ക് യോഗ്യത നേടാൻ സലായുടെ സാന്നിധ്യം ഈജിപ്തിന് വലിയ ഊർജ്ജമാകും.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260630103243.jpg)
