ലേഡി സൂപ്പര്‍ സ്റ്റാര്‍ പദവി എനിക്ക് വേണ്ട

AUGUST 7, 2024, 10:15 AM

ഊര്‍വശി എന്ന നടിയെപ്പറ്റി മലയാളികൾക്ക് ആരും പറഞ്ഞുകൊടുക്കേണ്ട കാര്യമില്ല, ഒരുപിടി മികച്ച കഥാപാത്രങ്ങളെ മലയാളികൾക്ക് സമ്മാനിച്ച താരമാണ് ഊർവശി.

ഏത് കഥാപാത്രത്തെയും അനായാസം ചെയ്യാൻ കഴിവുള്ള മറ്റൊരു അഭിനേതാവില്ല. ഒരേ സമയം നായികയായും, സഹനടിയായും, നെഗറ്റീവ് ഷെയ്ഡുള്ള കഥാപാത്രമായും തിളങ്ങാൻ സാധിക്കുന്ന പ്രതിഭാശാലിയാണ് ഊർവശി.

വർഷങ്ങളായി സിനിമ ആസ്വാദകർക്കിടയിൽ ഉറച്ച പേരായി ഉർവശി നിലനിൽക്കുന്നു. എല്ലാത്തരം കഥാപാത്രങ്ങളെയും ഉർവശി അഭിനയിച്ചു തകർത്തു. ഇത്രയൊക്കെ ആണെങ്കിലും ലേഡീ സൂപ്പർസ്റ്റാർ എന്ന് പറയുന്നതിനോട് തനിക്ക് താൽപര്യമില്ലെന്ന് തുറന്നു പറയുകയാണ് ഉർവശി.

എന്നെ തിരഞ്ഞെടുത്തത് എന്റെ സംവിധായകർ തന്നെ

“ബുദ്ധി കൊണ്ട് സിനിമയിൽ വലിയ പ്രയോചനം ഉണ്ടെന്ന് എനിക്ക് തോന്നുന്നില്ല. എന്റെ ഒരു കാഴ്ചപ്പാടാണ് ഞാൻ പറ‍ഞ്ഞത്. കാരണം സിനിമ തൊഴിലായി എടുത്തവർക്ക് അങ്ങനെ ചൂസി ആവാനുള്ള അവസരമൊന്നുമില്ല. വരുന്ന കഥാപാത്രങ്ങളെ നോക്കി തിരഞ്ഞെടുക്കുക എന്നത് മാത്രമാണ് ചെയ്യാൻ സാധിക്കുന്നത്. പല സ്ഥലത്തായി ഞാൻ പറഞ്ഞിട്ടുള്ളതാണ് ഒരു നായക നടന്റേയും പിൻ ബലത്തോടെ സിനിമയിൽ എത്തിയ ആളല്ല ഞാൻ. എന്റെ സംവിധായകർ തന്നെയാണ് എന്നെ തിരഞ്ഞെടുത്തത്.”

“ചില സംവിധായകരും എഴുത്തുകാരും എന്നെ തന്നെ മനസിൽ കണ്ടു കൊണ്ട് എഴുതുന്നു. അതിനാൽ എനിക്ക് ലഭിക്കുന്ന പ്രശംസകൾക്കെല്ലാം കാരണം ആ സംവിധായകരുടെ കഴിവാണ്. പിന്നെ ഈ ‘ലേഡി സൂപ്പർ സ്റ്റാർ’ എന്ന് പറയുന്നതിനോടും എനിക്ക് വല്യ താത്പര്യമില്ല. സൂപ്പർസ്റ്റാർ എന്നു മാത്രം വിളിച്ചാൽ പോരെ? അതുപോലെ ലേഡി ഡയറക്ടർ എന്നു പോലും പറയുന്നത് തെറ്റാണെന്ന് വിശ്വസിക്കുന്ന ഒരാളാണ് ഞാൻ. ടീച്ചർ, ഡോക്ടർ എന്നൊക്കെ പറയുന്ന പോലെ ഇതിനേയും കണ്ടാൽ മതി.” “അതുപോലെ തന്നെയുള്ള ഒരു ജോലിയാണ് അഭിനയവും. പിന്നെ ഒരു കിരീടവും തലയിൽ എടുത്ത് വെക്കാത്തതാണ് നല്ലത് എന്നാണ് എനിക്ക് തോന്നാറ്. അതൊരു വല്യ ബാധ്യതയാണ്, കാരണം ഇത് വീഴാതെ കൊണ്ട് നടക്കേണ്ടതുണ്ട്. അതിലും എനിക്ക് ഇഷ്ടം എല്ലാ കാലത്തും എല്ലാവർക്കും ഇഷ്ടപ്പെടുന്ന നടിയാവണം എന്നു മാത്രമാണ്.”

സൂരറൈ പോട്രിന്റെ ഹിന്ദി റീമേക്കില്‍ ഊർവശിയുടെ കഥാപാത്രത്തെ അവതരിപ്പിച്ച സീബ ബിശ്വാസ് സംവിധായകയോട് ചോദിച്ചത് ഈ കഥാപാത്രം എന്നെ കൊണ്ട് ചെയ്യാൻ സാധിക്കുമോ എന്നാണ്. അതായത് ഊർവശി ചെയ്തു വെച്ച വേഷം മറ്റൊരാള്‍ ചെയ്യുക എന്നത് അല്‍പം പ്രയാസമേറിയ കാര്യമാണ്. അത്രക്കും ആ നടിയുടെ അഭിനയത്തെ മറ്റുള്ളവർ ഭയപ്പെടുന്നെങ്കില്‍ അതു തന്നെയാണ് ഊർവശിയുടെ വിജയവും.