ഗർഭകാലത്തെ ചതി, നഷ്ടപ്പെട്ട കുഞ്ഞ്; ഓം പുരി തകർത്ത ജീവിതത്തെക്കുറിച്ച് ആദ്യ ഭാര്യ സീമ കപൂർ!

JUNE 24, 2026, 12:11 AM

ഇന്ത്യൻ സിനിമ കണ്ട എക്കാലത്തെയും മികച്ച നടന്മാരിൽ ഒരാളായിരുന്നു ഓം പുരി. വെള്ളിത്തിരയിൽ വിസ്മയങ്ങൾ തീർത്ത അദ്ദേഹത്തിന്റെ വ്യക്തിജീവിതം പക്ഷേ വലിയ വിവാദങ്ങൾ നിറഞ്ഞതായിരുന്നു. മറ്റൊരു സ്ത്രീയുടെ കടന്നുവരവോടെ തങ്ങളുടെ ദാമ്പത്യം തകർന്നതിനെക്കുറിച്ചും, ഗർഭകാലത്ത് അനുഭവിക്കേണ്ടി വന്ന കടുത്ത മാനസിക വേദനകളെക്കുറിച്ചും ഓം പുരിയുടെ ആദ്യ ഭാര്യ സീമ കപൂർ അടുത്തിടെ നൽകിയ ഒരഭിമുഖത്തിൽ തുറന്നുപറഞ്ഞതാണ് ഇപ്പോൾ സിനിമാ ലോകത്ത് ചർച്ചയാകുന്നത്.

താൻ ഗർഭിണിയായിരിക്കെയാണ് ഓം പുരി നന്ദിത എന്ന സ്ത്രീയുമായി പ്രണയത്തിലാകുന്നതെന്ന് സീമ വെളിപ്പെടുത്തി. ഇതറിഞ്ഞ് മാനസികമായി തകർന്ന അവർ രാജസ്ഥാനിലെ അമ്മയുടെ വീട്ടിലേക്ക് മാറിത്താമസിക്കുകയായിരുന്നു.

"നിർഭാഗ്യവശാൽ ആ കുഞ്ഞിന് ജീവിക്കാനായില്ല. അന്നെനിക്ക് ആ കുഞ്ഞ് വളരെ വിലപ്പെട്ടതായിരുന്നു. കാരണം പുരി സാഹിബ് ഇനി എന്റെ ജീവിതത്തിലേക്ക് തിരികെ വരാൻ പോകുന്നില്ലെന്ന് എനിക്കറിയാമായിരുന്നു. ഞാനിനി മറ്റൊരു വിവാഹം കഴിക്കാനും പോകുന്നില്ലായിരുന്നു. അതിനാൽ ആ കുഞ്ഞ് എനിക്ക് അത്രമേൽ പ്രധാനപ്പെട്ടതായിരുന്നു..." — സീമ കപൂർ വേദനയോടെ ഓർത്തെടുത്തു.

തന്റെ സഹോദരനും പ്രശസ്ത നടനുമായ അനു കപൂർ ഓം പുരിക്കെതിരെ നിയമനടപടികളുമായി മുന്നോട്ടുപോകാൻ ആവശ്യപ്പെട്ടിരുന്നെങ്കിലും താൻ അതിന് തയ്യാറായില്ലെന്ന് സീമ പറഞ്ഞു. കുഞ്ഞിനെ നഷ്ടപ്പെട്ടതിന് പിന്നാലെ ഓം പുരി തനിക്ക് വിവാഹമോചന നോട്ടീസ് അയച്ചതായും അവർ വെളിപ്പെടുത്തി. 1991-ലായിരുന്നു ഇവരുടെ വിവാഹം. എന്നാൽ വെറും ഒരു വർഷത്തിനു ശേഷം ഇരുവരും വേർപിരിഞ്ഞു. തുടർന്ന് 1993-ൽ ഓം പുരി നന്ദിതയെ വിവാഹം കഴിച്ചെങ്കിലും 2013-ൽ ആ ബന്ധവും അവസാനിച്ചു.

വർഷങ്ങൾക്ക് ശേഷം, മരണത്തിന് മുൻപ് ലണ്ടനിൽ വെച്ച് ഒരു ശസ്ത്രക്രിയക്ക് വിധേയനാകുന്നതിന് തൊട്ടുമുൻപ് ഓം പുരി തന്നെ വിളിച്ച് ചെയ്ത തെറ്റുകൾക്കെല്ലാം മാപ്പ് ചോദിച്ചിരുന്നതായും സീമ കപൂർ അഭിമുഖത്തിൽ കൂട്ടിച്ചേർത്തു. 2017 ജനുവരിയിലാണ് ഓം പുരി അന്തരിച്ചത്.