സിഡ്‌നി സ്വീനിയോ കാമുകൻ സ്കൂട്ടർ ബ്രോണോ? ആസ്തിയിൽ ആരാണ് മുന്നിൽ

MAY 1, 2026, 10:44 PM

പ്രസിദ്ധ നടി സിഡ്‌നി സ്വീനിയും സംഗീത വ്യവസായ രംഗത്തെ പ്രമുഖൻ സ്കൂട്ടർ ബ്രോണും തമ്മിലുള്ള പ്രണയവാർത്തകൾ പുറത്തുവന്നതിന് പിന്നാലെ, ഇരുവരുടെയും ആസ്തിയെക്കുറിച്ചുള്ള ചർച്ചകൾ സജീവമാകുന്നു.

സ്റ്റേജ്‌കോച്ച് മ്യൂസിക് ഫെസ്റ്റിവലിൽ നിന്നുള്ള ചിത്രങ്ങൾ പങ്കുവെച്ചുകൊണ്ടാണ് 27-കാരിയായ സിഡ്‌നി തന്റെ ബന്ധം പരസ്യമാക്കിയത്. ഇതോടെ 44-കാരനായ സ്കൂട്ടർ ബ്രോണിന്റെ സമ്പാദ്യവും സിഡ്‌നിയുമായുള്ള താരതമ്യവും സോഷ്യൽ മീഡിയയിൽ വലിയ ചർച്ചയായിരിക്കുകയാണ്.

കഴിഞ്ഞ അഞ്ച് വർഷത്തിനിടയിൽ സിഡ്‌നി സ്വീനിയുടെ ആസ്തിയിൽ വൻ വർദ്ധനവാണ് ഉണ്ടായിരിക്കുന്നത്. 'യൂഫോറിയ', 'ദ വൈറ്റ് ലോട്ടസ്' തുടങ്ങിയ പരമ്പരകളിലൂടെയും 'എനിവൺ ബട്ട് യൂ', 'മാഡം വെബ്' തുടങ്ങിയ സിനിമകളിലൂടെയും ശ്രദ്ധേയയായ താരത്തിന്റെ ആകെ ആസ്തി ഏകദേശം 40 മില്യൺ ഡോളറാണ് (ഏകദേശം 330 കോടി രൂപ).

അഭിനയത്തിന് പുറമെ അന്താരാഷ്ട്ര ബ്രാൻഡുകളായ സാംസങ്, ഫോർഡ്, അർമാനി എന്നിവയുമായുള്ള കരാറുകളും സ്വന്തമായി തുടങ്ങിയ അടിവസ്ത്ര ബ്രാൻഡായ 'SYRN' ഉം താരത്തിന്റെ വരുമാനം വർദ്ധിപ്പിച്ചു. 22 മില്യൺ ഡോളറിലധികം മൂല്യമുള്ള റിയൽ എസ്റ്റേറ്റ് നിക്ഷേപങ്ങളും സിഡ്‌നിക്കുണ്ട്.

എന്നാൽ, സിഡ്‌നിയേക്കാൾ ബഹുദൂരം മുന്നിലാണ് സ്കൂട്ടർ ബ്രോണിന്റെ ആസ്തി. ജസ്റ്റിൻ ബീബർ, അരിയാന ഗ്രാൻഡെ തുടങ്ങിയ പ്രമുഖരുടെ മാനേജരായിരുന്ന ഇദ്ദേഹത്തിന്റെ ആകെ സമ്പാദ്യം 1 ബില്യൺ ഡോളറിലധികം (ഏകദേശം 8,300 കോടി രൂപ) ആണെന്നാണ് റിപ്പോർട്ടുകൾ.

2021-ൽ തന്റെ സംഗീത സാമ്രാജ്യമായ 'ഇറ്റാക്ക ഹോൾഡിംഗ്‌സ്' 1 ബില്യൺ ഡോളറിന് വിറ്റതും ഊബർ, സ്പോട്ടിഫൈ തുടങ്ങിയ കമ്പനികളിലെ നിക്ഷേപവുമാണ് ബ്രോണിനെ ശതകോടീശ്വരനാക്കിയത്. ടെയ്‌ലർ സ്വിഫ്റ്റിന്റെ ആദ്യ ആറ് ആൽബങ്ങളുടെ മാസ്റ്റർ കോപ്പികൾ വിറ്റതിലൂടെയും അദ്ദേഹം വലിയ ലാഭമുണ്ടാക്കിയിരുന്നു.