"ശക്തിമാനാകാൻ അഭിനയം മാത്രം പോരാ, രൺവീർ സിംഗിന് ആ വേഷം പറ്റില്ല"; മുകേഷ് ഖന്ന

APRIL 21, 2026, 11:37 PM

ഇന്ത്യയുടെ സ്വന്തം സൂപ്പർ ഹീറോ 'ശക്തിമാൻ' ബിഗ് സ്‌ക്രീനിലേക്ക് എത്തുമ്പോൾ, നായകനായി നിശ്ചയിച്ചിരിക്കുന്ന രൺവീർ സിംഗിനെതിരെ വീണ്ടും തുറന്നടിച്ച് മുകേഷ് ഖന്ന.

ബേസിൽ ജോസഫ് സംവിധാനം ചെയ്യുന്ന ബിഗ് ബജറ്റ് ചിത്രത്തിൽ രൺവീർ സിംഗ് അഭിനയിക്കുന്നതിനോട് തനിക്ക് യോജിപ്പില്ലെന്ന് അദ്ദേഹം ഒരിക്കൽ കൂടി വ്യക്തമാക്കി. ഒരു ദേശീയ മാധ്യമത്തിന് നൽകിയ അഭിമുഖത്തിലാണ് അദ്ദേഹം തന്റെ നിലപാട് ആവർത്തിച്ചത്.

രൺവീർ സിംഗിന്റെ അഭിനയശേഷിയെ താൻ മാനിക്കുന്നുണ്ടെങ്കിലും ശക്തിമാൻ എന്ന കഥാപാത്രത്തിന് ആവശ്യമായ മുഖഭാവം അദ്ദേഹത്തിനില്ലെന്നാണ് മുകേഷ് ഖന്നയുടെ വാദം. "അദ്ദേഹം മികച്ച നടനാണ്, ഊർജ്ജസ്വലനാണ്. പക്ഷേ ശക്തിമാനാകാൻ വെറും അഭിനയം മാത്രം പോരാ, ആ മുഖത്ത് ഒരു ശാലീനതയും ശാന്തതയും വേണം. രൺവീറിന്റെ മുഖം എപ്പോഴും നൃത്തം ചെയ്യാനായി ക്ഷണിക്കുന്നതുപോലെയാണ്, അത് ശക്തിമാന് ചേരുന്നതല്ല," അദ്ദേഹം പറഞ്ഞു.

രൺവീർ സിംഗ് നായകനായ 'ധുരന്ധർ 2' (Dhurandhar 2) ബോക്സ് ഓഫീസിൽ ചരിത്ര വിജയം നേടി കുതിക്കുമ്പോഴാണ് ചിത്രത്തിന്റെ ഒറിജിനൽ സ്രഷ്ടാവ് കൂടിയായ മുകേഷ് ഖന്ന ഇത്തരമൊരു അഭിപ്രായപ്രകടനം നടത്തിയത്.

വേഷപ്പകർച്ചയിലെ ആത്മാർത്ഥതയെക്കുറിച്ച് സംസാരിക്കവെ, അക്ഷയ് കുമാറിന്റെ 'സാമ്രാട്ട് പൃഥ്വിരാജ്' എന്ന ചിത്രത്തെയും അദ്ദേഹം വിമർശിച്ചു. കേവലം ഒരു വിഗ്ഗ് ധരിച്ചതുകൊണ്ട് മാത്രം ഒരാൾ പൃഥ്വിരാജ് ചൗഹാൻ ആകില്ലെന്നും, കഥാപാത്രമായി മാറാൻ ആഴത്തിലുള്ള തയ്യാറെടുപ്പുകൾ ആവശ്യമാണെന്നും അദ്ദേഹം ഓർമ്മിപ്പിച്ചു.

സോഷ്യൽ മീഡിയയിൽ ഈ വിഷയം വലിയ ചർച്ചയായിട്ടുണ്ട്. രൺവീറിനെ അനുകൂലിക്കുന്നവർ അദ്ദേഹത്തിന്റെ അഭിനയ വൈവിധ്യത്തെ പുകഴ്ത്തുമ്പോൾ, ശക്തിമാന്റെ തനിമ നഷ്ടപ്പെടുമോ എന്ന ആശങ്ക മുകേഷ് ഖന്നയെ അനുകൂലിക്കുന്നവരും പങ്കുവെക്കുന്നു. മലയാളിയായ ബേസിൽ ജോസഫ് ഈ വെല്ലുവിളി എങ്ങനെ മറികടക്കുമെന്നാണ് സിനിമാ ലോകം ഉറ്റുനോക്കുന്നത്.