'പെഡ്ഡി'യിലെ ഗ്ലാമർ ലുക്ക്; ട്രോളുകൾക്ക് ഇരയായി ജാൻവി കപൂർ

JUNE 4, 2026, 2:22 AM

ഹൈദരാബാദ്: രാം ചരൺ നായകനായി എത്തുന്ന പാൻ ഇന്ത്യൻ ചിത്രം 'പെദ്ധി' തിയറ്ററുകളിലെത്തി. ബുച്ചി ബാബു സന സംവിധാനം ചെയ്ത ചിത്രത്തിന് ആദ്യ പ്രദർശനങ്ങൾക്കുശേഷം സമ്മിശ്ര പ്രതികരണങ്ങളാണ് ലഭിക്കുന്നത്. രാം ചരണിന്റെ പ്രകടനത്തിനും എ.ആർ. റഹ്മാന്റെ സംഗീതത്തിനും മികച്ച അഭിപ്രായങ്ങൾ ലഭിക്കുമ്പോൾ, ജാൻവി കപൂറിന്റെ കഥാപാത്രത്തിനും പ്രകടനത്തിനുമെതിരെ വലിയ വിമർശനങ്ങളും ഉയരുന്നുണ്ട്.

ചിത്രത്തിൽ രാം ചരൺ മികച്ച പ്രകടനമാണ് കാഴ്ചവെച്ചിരിക്കുന്നതെന്നാണ് പ്രേക്ഷകരുടെ വിലയിരുത്തൽ. കഥാപാത്രത്തിനായി താരം നടത്തിയ പരിശ്രമം സ്‌ക്രീനിൽ വ്യക്തമായി കാണാമെന്നും, സ്പോർട്സ് പശ്ചാത്തലത്തിലുള്ള രംഗങ്ങൾ അദ്ദേഹം കയ്യടക്കത്തോടെ അവതരിപ്പിച്ചിട്ടുണ്ടെന്നും സോഷ്യൽ മീഡിയയിൽ അഭിപ്രായങ്ങൾ ഉയരുന്നു. ചിത്രത്തിലെ പ്രകടനത്തിന് ദേശീയ പുരസ്‌കാര സാധ്യത വരെ ചിലർ ചൂണ്ടിക്കാട്ടുന്നുണ്ട്.

അതേസമയം, എ.ആർ. റഹ്മാന്റെ പശ്ചാത്തല സംഗീതത്തിനും വലിയ പ്രശംസയാണ് ലഭിക്കുന്നത്. ചിത്രത്തിന്റെ വികാരനിമിഷങ്ങളെയും പ്രധാന രംഗങ്ങളെയും കൂടുതൽ ശക്തമാക്കുന്നതിൽ റഹ്മാന്റെ സംഗീതത്തിന് നിർണായക പങ്കുണ്ടെന്നാണ് പ്രേക്ഷകരുടെ പ്രതികരണം.

എന്നാൽ ചിത്രത്തിന് വിമർശനങ്ങളും നേരിടേണ്ടി വരുന്നുണ്ട്. ജാൻവി കപൂറും രാം ചരണും തമ്മിലുള്ള പ്രണയരംഗങ്ങൾ തൃപ്തികരമല്ലെന്നും, കഥാപാത്രത്തിന് ആവശ്യമായ പ്രാധാന്യമോ ആഴമോ നൽകിയിട്ടില്ലെന്നും ചിലർ അഭിപ്രായപ്പെടുന്നു. ചിത്രത്തിന്റെ ആദ്യപകുതി അൽപം മന്ദഗതിയിലാണെന്നും, ഇടവേളയോടടുക്കുമ്പോഴാണ് കഥ കൂടുതൽ ആകർഷകമാകുന്നതെന്നും സോഷ്യൽ മീഡിയയിലെ പ്രതികരണങ്ങളിൽ പറയുന്നു.

അതേസമയം കേരളത്തിൽ ചിത്രത്തിന് പ്രതീക്ഷിച്ചതിനേക്കാൾ കുറഞ്ഞ അഡ്വാൻസ് ബുക്കിംഗാണ് ലഭിച്ചതെന്നാണ് റിപ്പോർട്ടുകൾ.