'പിറന്നാളാശംസകൾ ആലിക്കുട്ടി...!! നീ ഇത്രയും വളർന്നുവെന്ന് വിശ്വസിക്കാൻ കഴിയുന്നില്ല'; അലംകൃതയ്ക്ക് ജന്മദിനാശംസകളുമായി പൃഥ്വിരാജും സുപ്രിയയും

SEPTEMBER 8, 2026, 4:44 AM

മകൾ അലംകൃതയ്ക്ക് ജന്മദിനാശംസകളുമായി പൃഥ്വിരാജും സുപ്രിയയും. മകൾക്കൊപ്പമുള്ള സന്തോഷനിമിഷങ്ങളുടെ ചിത്രങ്ങൾ പങ്കുവെച്ചുകൊണ്ട് സോഷ്യൽ മീഡിയയിലൂടെയാണ് ഇരുവരും തങ്ങളുടെ പ്രിയപ്പെട്ട 'ആലിക്കുട്ടി'ക്ക് ജന്മദിനാശംസകൾ നേർന്നത്.'

"പിറന്നാൾ ആശംസകൾ ഞങ്ങളുടെ വെളിച്ചമേ! നീ നീയായിരിക്കുന്ന രീതിയിലും, നല്ലൊരു വ്യക്തിയായി വളരുന്നതിലും അമ്മയ്ക്കും അച്ഛനും അങ്ങേയറ്റം അഭിമാനമുണ്ട്. ചുറ്റുമുള്ളവരോടുള്ള നിന്റെ കരുതൽ ഒരു വലിയ പ്രചോദനമാണ്. നിന്റെ സാന്നിധ്യം കൊണ്ടുതന്നെ ജീവിതത്തിന്റെ എത്രയോ മനോഹരമായ പാഠങ്ങളാണ് നീ ഞങ്ങളെ പഠിപ്പിച്ചത്. ചിറകുകൾ വിടർത്തി ഇനിയും ഉയരങ്ങളിലേക്ക് പറക്കുക. ജീവിതത്തെ എന്നും ഇതുപോലെ ഇഷ്ടത്തോടെ ചേർത്തുവെക്കുക," എന്ന് പൃഥ്വിരാജ് കുറിച്ചു.

"എന്റെ ആലിക്കുട്ടിക്ക് 12-ാം പിറന്നാൾ ആശംസകൾ. നീ ഇത്രയും വളർന്നുവെന്ന് വിശ്വസിക്കാൻ പോലും കഴിയുന്നില്ല. ആശുപത്രിയിൽ നിന്ന് വീട്ടിലേക്ക് കൊണ്ടുവന്നത് ഇന്നലെ കഴിഞ്ഞതുപോലെ തോന്നുന്നു. നീ അത്രമേൽ പ്രിയപ്പെട്ട മകളാണ്. ഞങ്ങളുടെ എല്ലാ നല്ല ഗുണങ്ങളും നിന്നിലാണ് ഉള്ളതെന്ന് തോന്നിപ്പോകും. ഈ വാക്‌സാമർഥ്യവും കുറുമ്പും ആരിൽ നിന്നാണ് കിട്ടിയതെന്ന് പ്രത്യേകം പറയേണ്ടതില്ലല്ലോ," എന്ന് സുപ്രിയ കുറിച്ചു.

എപ്പോഴും സ്‌നേഹവും കരുണയുമുള്ളവളായിരിക്കണമെന്നും, ഈ ലോകം പലപ്പോഴും വിചിത്രമാണെന്നും ഓർമ്മിപ്പിച്ച സുപ്രിയ, മകളുടെ വളർച്ചയിൽ തങ്ങൾ ഏറെ അഭിമാനിക്കുന്നുണ്ടെന്നും കൂട്ടിച്ചേർത്തു.

2011-ൽ വിവാഹിതരായ പൃഥ്വിരാജിനും സുപ്രിയയ്ക്കും 2014-ലാണ് അലംകൃത ജനിക്കുന്നത്. പഠനത്തോടൊപ്പം സംഗീതരംഗത്തും അലംകൃത തന്റെ സാന്നിധ്യം അറിയിച്ചുകഴിഞ്ഞു. നിസാം ബഷീർ സംവിധാനം ചെയ്ത പൃഥ്വിരാജ് ചിത്രം 'ഐ, നോബഡി'യിലെ 'സർക്കസ്' എന്ന ഇംഗ്ലീഷ് ഗാനം ആലാപനം ചെയ്തത് അലംകൃതയായിരുന്നു. കൂടാതെ, പൃഥ്വിരാജ് സംവിധാനം ചെയ്ത മോഹൻലാൽ ചിത്രം 'എമ്പുരാന്റെ' ടൈറ്റിൽ ട്രാക്കിന്റെ ഒരു ഭാഗവും ആലപിച്ചത് ഈ കുഞ്ഞുപ്രതിഭയാണ്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്