വേർപിരിയലിന് വർഷങ്ങൾക്ക് ശേഷവും ഹോളിവുഡ് സൂപ്പർതാരങ്ങളായ ബ്രാഡ് പിറ്റും ആഞ്ചലീന ജോളിയും തമ്മിലുള്ള നിയമപോരാട്ടങ്ങൾ അവസാനിക്കുന്നില്ല. 2024-ന്റെ അവസാനത്തോടെ ഇരുവരുടെയും വിവാഹമോചനം ഔദ്യോഗികമായി പൂർത്തിയായെങ്കിലും, മുൻപ് ഒന്നിച്ച് നടത്തിയിരുന്ന ബിസിനസ്സ് സംരംഭങ്ങളെ ചൊല്ലിയുള്ള തർക്കങ്ങൾ ഇപ്പോഴും കോടതിമുറികളിൽ തുടരുകയാണ്.

ഇരുവർക്കും സംയുക്തമായി ഉടമസ്ഥതയുണ്ടായിരുന്ന ഫ്രഞ്ച് വൈനറിയും എസ്റ്റേറ്റുമായ 'ഷാതോ മിരാവൽ'  സംബന്ധിച്ച കേസിൽ ബ്രാഡ് പിറ്റിന് ഇപ്പോൾ അനുകൂലമായ ഒരു കോടതി വിധി ലഭിച്ചിരിക്കുകയാണ്. മാധ്യമമായ 'പേജ് സിക്സ്' പുറത്തുവിട്ട കോടതി രേഖകൾ പ്രകാരം, മിഷിഗണിലെ ഒരു ജഡ്ജി സ്റ്റോലി ഗ്രൂപ്പിന്റെ  മുൻ ജനറൽ കൗൺസിലായ ടോഡ് കുലിബയോട് വീണ്ടും വിശദമായ മൊഴിനൽകാൻ ഹാജരാകാൻ ഉത്തരവിട്ടിട്ടുണ്ട്.

2021-ൽ ആഞ്ചലീന ജോളി തന്റെ വൈനറി ഓഹരികൾ സ്റ്റോലി ഗ്രൂപ്പുമായി ബന്ധമുള്ള 'ടെന്യൂട്ട് ഡെൽ മോണ്ടോ' എന്ന കമ്പനിക്ക് വിറ്റതുമായി ബന്ധപ്പെട്ട് കഴിഞ്ഞ ഡിസംബറിൽ നടന്ന മൊഴിയെടുപ്പിൽ 33 ചോദ്യങ്ങൾക്ക് മറുപടി നൽകാൻ കുലിബ വിസമ്മതിച്ചിരുന്നു. ഈ ഇടപാടിന്റെ ഘടനയെക്കുറിച്ചും അതിന് പിന്നിൽ പ്രവർത്തിച്ച വ്യവസായി യൂരി ഷെഫ്‌ലറുടെ പങ്കിനെക്കുറിച്ചും കൂടുതൽ വിവരങ്ങൾ പുറത്തുകൊണ്ടുവരാനാണ് ബ്രാഡ് പിറ്റിന്റെ അഭിഭാഷകർ ശ്രമിക്കുന്നത്.

ബിസിനസ്സ് ഇടപാടുകളുമായി ബന്ധപ്പെട്ട കാര്യങ്ങളിൽ 'അറ്റോർണി-ക്ലയന്റ് പ്രിവിലേജ്' കാത്തുസൂക്ഷിക്കാനുള്ള അവകാശം ഉന്നയിച്ച് ചോദ്യങ്ങളിൽ നിന്ന് ഒഴിഞ്ഞുമാറാനാകില്ലെന്ന് കോടതി വ്യക്തമാക്കി. ഇതോടെ കുലിബയ്ക്ക് മുൻപ് മറുപടി നൽകാതിരുന്ന ചോദ്യങ്ങൾക്കും പുതിയ ചോദ്യങ്ങൾക്കും മറുപടി നൽകേണ്ടി വരും.

തന്റെ അനുവാദമില്ലാതെയാണ് ജോളി വൈനറിയിലെ ഓഹരികൾ വിറ്റതെന്ന് ആരോപിച്ച് 2022-ലാണ് ബ്രാഡ് പിറ്റ് കേസ് ഫയൽ ചെയ്യുന്നത്. എന്നാൽ അങ്ങനെയൊരു കരാർ നിലവിലില്ലെന്നാണ് ജോളിയുടെ വാദം.അതേസമയം, കാലിഫോർണിയയിലെ ലോസ് ആഞ്ചലസ് സുപ്പീരിയർ കോടതിയിൽ ഈയിടെ ആഞ്ചലീന ജോളി ഒരു നിയമവിജയം നേടിയിരുന്നു. വൈനറി വിൽപ്പനയുമായി ബന്ധപ്പെട്ട ജോളിയുടെ സ്വകാര്യ ഇമെയിലുകൾ പരിശോധിക്കണമെന്ന പിറ്റിന്റെ ആവശ്യം ജഡ്ജി നിരസിച്ചിരുന്നു.

ഇത് തന്റെ കക്ഷിയുടെ വലിയ വിജയമാണെന്ന് ജോളിയുടെ അഭിഭാഷകൻ പോൾ മർഫി പ്രതികരിച്ചു. ജോളിയുടെ സ്വകാര്യ ആശയവിനിമയങ്ങളിലേക്ക് കടന്നുകയറാനുള്ള പിറ്റിന്റെ ശ്രമത്തിന്റെ ഭാഗമാണിതെന്നും അദ്ദേഹം കുറ്റപ്പെടുത്തി. എന്നാൽ, ഭാവിയിൽ കൃത്യമായ നിയമപരമായ വാദങ്ങളോടെ ബ്രാഡ് പിറ്റിന് ഈ വിഷയത്തിൽ വീണ്ടും കോടതിയെ സമീപിക്കാവുന്നതാണ്.

വൈനറി തർക്കത്തിന് പുറമെ തന്റെ ആഡംബര സ്കിൻകെയർ ബ്രാൻഡായ 'ബ്യൂ ഡൊമെയ്ൻ'  മായി ബന്ധപ്പെട്ടും ബ്രാഡ് പിറ്റ് മറ്റൊരു നിയമനടപടി നേരിടുന്നുണ്ട്. മാലിബു ആസ്ഥാനമായി പ്രവർത്തിക്കുന്ന 'ബ്യൂ ഡി'  എന്ന സ്കിൻകെയർ ബ്രാൻഡാണ് പിറ്റിനെതിരെ കോടതിയെ സമീപിച്ചിരിക്കുന്നത്. പിറ്റിന്റെ ബ്രാൻഡിന്റെ പേര് തങ്ങളുടെ പേരിനോട് വളരെ സാമ്യമുള്ളതാണെന്നും ഇത് ഉപഭോക്താക്കളിൽ ആശയക്കുഴപ്പമുണ്ടാക്കുമെന്നുമാണ് ഇവരുടെ വാദം. 

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്