സമ്മാനങ്ങൾ സ്വീകരിക്കില്ല! ടെയ്‌ലർ സ്വിഫ്റ്റ് - ട്രാവിസ് കെൽസി വിവാഹ നിബന്ധന വെളിപ്പെടുത്തി ജോർജ്ജ് കിറ്റിൽ

JUNE 23, 2026, 11:31 PM

പോപ്പ് ഗായിക ടെയ്‌ലർ സ്വിഫ്റ്റിന്റെയും എൻഎഫ്എൽ താരം ട്രാവിസ് കെൽസിയുടെയും വിവാഹ വാർത്തകൾക്കായി കാതോർത്തിരിക്കുകയാണ് ആഗോള സംഗീത-കായിക ലോകം.

ഇരുവരുടെയും നിശ്ചയത്തിന് ശേഷം ഓരോ നീക്കങ്ങളും ആരാധകർ സസൂക്ഷ്മം നിരീക്ഷിച്ചുവരികയായിരുന്നു. എന്നാൽ ഇപ്പോഴിതാ ഇവരുമായി ഏറെ അടുത്ത സുഹൃത്തും സഹതാരവുമായ ജോർജ്ജ് കിറ്റിൽ പങ്കുവെച്ച ചില വിവരങ്ങളാണ് സോഷ്യൽ മീഡിയയിൽ പുതിയ തരംഗം സൃഷ്ടിക്കുന്നത്.

നാഷ്‌വില്ലിൽ നടന്ന വാർഷിക 'ടൈറ്റ് എൻഡ് യൂണിവേഴ്സിറ്റി' (TEU) ചടങ്ങിനിടെയാണ് സാൻ ഫ്രാൻസിസ്കോ താരം കൂടിയായ ജോർജ്ജ് കിറ്റിൽ ഇരുവരുടെയും വിവാഹത്തെക്കുറിച്ച് സൂചന നൽകിയത്. "വിവാഹം ഇത്രയും അടുത്തെത്തി നിൽക്കുമ്പോഴും ഞങ്ങൾക്കായി സമയം കണ്ടെത്താൻ മനസ്സ് കാണിച്ച ടെയ്‌ലർ സ്വിഫ്റ്റ് ശരിക്കും ഒരു അത്ഭുതമാണ്" കിറ്റിൽ 'പീപ്പിൾ' മാഗസിനോട് പറഞ്ഞു.

വിവാഹത്തിൽ പങ്കെടുക്കുന്ന അതിഥികൾക്കായി ടെയ്‌ലറും ട്രാവിസും ഒരു ലളിതമായ നിബന്ധന വെച്ചിട്ടുണ്ടെന്നും കിറ്റിൽ വെളിപ്പെടുത്തി; മറ്റൊന്നുമല്ല, "ആരിൽ നിന്നും യാതൊരുവിധ സമ്മാനങ്ങളും സ്വീകരിക്കില്ല" എന്നതാണത്. എങ്കിലും ട്രാവിസിന് പഴയ നാണയങ്ങൾ ശേഖരിക്കുന്നതിൽ താല്പര്യമുള്ളതിനാൽ താൻ ഒരു പഴയ നാണയം സമ്മാനമായി നൽകിയേക്കുമെന്നും കിറ്റിൽ തമാശയായി കൂട്ടിച്ചേർത്തു.

ആരാധകരുടെ പുതിയ കണ്ടെത്തലുകൾ പ്രകാരം വരാനിരിക്കുന്ന ജൂലൈ 3-ന് ന്യൂയോർക്കിലെ മാഡിസൺ സ്ക്വയർ ഗാർഡനിൽ വെച്ചായിരിക്കും ഈ വമ്പൻ പ്രഖ്യാപനവും ആഘോഷങ്ങളും നടക്കുക. സെലീന ഗോമസ്, ബ്ലെയ്ക്ക് ലൈവ്ലി, എമ്മ സ്റ്റോൺ തുടങ്ങിയ വൻ താരനിര തന്നെ ഈ വിവാഹത്തിൽ പങ്കെടുത്തേക്കുമെന്നാണ് റിപ്പോർട്ടുകൾ.