തിരുവനന്തപുരം: സ്ത്രീകൾക്കും പെൺകുട്ടികൾക്കും ക്രിക്കറ്റ് പരിശീലനം നൽകുന്നതിനായി വനിതാ കോച്ചുമാരെ നിയമിക്കണമെന്ന് കേരള സംസ്ഥാന മനുഷ്യാവകാശ കമ്മീഷൻ കേരള ക്രിക്കറ്റ് അസോസിയേഷന് നിർദേശം നൽകി. കമ്മീഷൻ ചെയർപേഴ്സൺ ജസ്റ്റിസ് അലക്സാണ്ടർ തോമസ് ആണ് ഉത്തരവ് പുറപ്പെടുവിച്ചത്.

കെസിഎയുടെ കീഴിൽ പരിശീലനം നടത്തുന്ന ഒരു പരിശീലകൻ പെൺകുട്ടികളെ ലൈംഗികമായി ഉപദ്രവിക്കുകയും അപമര്യാദയായി പെരുമാറുകയും ചെയ്തുവെന്ന മാധ്യമ റിപ്പോർട്ടുകളുടെ അടിസ്ഥാനത്തിൽ സ്വമേധയാ രജിസ്റ്റർ ചെയ്ത കേസിലാണ് കമ്മീഷന്റെ നടപടി.

വനിതാ കോച്ചുമാരെ ലഭ്യമാക്കാൻ കഴിയാത്ത സാഹചര്യങ്ങളിൽ പരിശീലന സമയത്ത് ഒരു മുതിർന്ന വനിതാ ഉദ്യോഗസ്ഥയുടെ സാന്നിധ്യം നിർബന്ധമായും ഉറപ്പാക്കണമെന്നും കമ്മീഷൻ നിർദേശിച്ചു. പരിശീലനത്തിന് എത്തുന്ന പെൺകുട്ടികളും സ്ത്രീകളും വസ്ത്രം മാറുന്ന മുറികളിലേക്ക് പുരുഷന്മാർക്ക് പ്രവേശനം പൂർണമായും വിലക്കണമെന്നും ആവശ്യമായാൽ മുന്നറിയിപ്പ് ബോർഡുകൾ സ്ഥാപിക്കണമെന്നും ഉത്തരവിൽ പറയുന്നു.

പരിശീലന കേന്ദ്രങ്ങളിൽ എത്തുന്ന പെൺകുട്ടികളുടെ മാതാപിതാക്കൾക്ക് താൽപര്യമുണ്ടെങ്കിൽ പരിശീലന സ്ഥലത്ത് തുടരാൻ അനുമതി നൽകണമെന്നും കമ്മീഷൻ നിർദേശിച്ചു.

അനിഷ്ട സംഭവങ്ങൾ തടയുന്നതിനായി ആവശ്യമായ എല്ലാ സ്ഥലങ്ങളിലും സിസിടിവി ക്യാമറകൾ സ്ഥാപിക്കണമെന്നും ദൃശ്യങ്ങൾ സ്ഥിരമായി പരിശോധിക്കണമെന്നും കമ്മീഷൻ വ്യക്തമാക്കി. അസ്വാഭാവികമായ സംഭവങ്ങളോ പെരുമാറ്റങ്ങളോ കണ്ടെത്തിയാൽ ഉടൻ പൊലീസിനെ അറിയിക്കണമെന്നും നിർദേശമുണ്ട്.

പരിശീലകർക്കെതിരെ പരാതി ലഭിച്ചാൽ അത് മറച്ചുവയ്ക്കാതെ ഉടൻ പൊലീസിന് കൈമാറണമെന്നും കമ്മീഷൻ വ്യക്തമാക്കി. ആരോപണ വിധേയനായ പരിശീലകൻ പോക്സോ കേസിൽ വിചാരണ നേരിടുന്നയാളായതിനാൽ മറ്റ് ക്രിക്കറ്റ് അസോസിയേഷനുകളുമായി സഹകരിക്കാൻ അനുവദിക്കരുതെന്ന കെസിഎ നിർദേശം ജില്ലാ അസോസിയേഷനുകൾ കർശനമായി നടപ്പാക്കണമെന്നും ആവശ്യപ്പെട്ടു.

അതേസമയം, കെസിഎ പുതിയ സുരക്ഷാ നടപടികളും പ്രഖ്യാപിച്ചിട്ടുണ്ട്. കെസിഎയിലോ ജില്ലാ ക്രിക്കറ്റ് അസോസിയേഷനുകളിലോ ജോലിക്ക് അപേക്ഷിക്കുന്നവർക്ക് പൊലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കും. കുട്ടികളുടെ സുരക്ഷ ഉറപ്പാക്കുന്നതിനായി പ്രത്യേക ചൈൽഡ് പ്രൊട്ടക്ഷൻ പോളിസി രൂപീകരിക്കുമെന്നും അറിയിച്ചു.

തൊഴിൽ സ്ഥലങ്ങളിലെ ലൈംഗികാതിക്രമ പരാതികൾ കൈകാര്യം ചെയ്യാൻ ഇന്റേണൽ കംപ്ലയിന്റ്സ് കമ്മിറ്റി രൂപീകരിക്കാനും ജീവനക്കാർക്ക് കൗൺസിലിങ് നൽകാനും തീരുമാനിച്ചിട്ടുണ്ട്. യുവ പരിശീലകർക്കായി കുട്ടികൾക്കെതിരായ ലൈംഗികാതിക്രമങ്ങൾ തടയുന്നതുമായി ബന്ധപ്പെട്ട ബോധവത്കരണ പരിപാടികളും സംഘടിപ്പിക്കണമെന്നും കമ്മീഷൻ നിർദേശിച്ചു.

തിരുവനന്തപുരം ജില്ലാ ക്രിക്കറ്റ് അസോസിയേഷൻ-ലെ ഒരു അസിസ്റ്റന്റ് കോച്ചിനെതിരെ പ്രായപൂർത്തിയാകാത്ത പെൺകുട്ടി നൽകിയ പീഡനപരാതിയെ തുടർന്നുണ്ടായ സംഭവങ്ങൾ ആവർത്തിക്കാതിരിക്കാൻ കെസിഎ അതീവ ജാഗ്രത പാലിക്കണമെന്നും ജസ്റ്റിസ് അലക്സാണ്ടർ തോമസ് നിർദേശിച്ചു.

കേസുമായി ബന്ധപ്പെട്ട് ആരോപണ വിധേയനായ പരിശീലകനെതിരെ തിരുവനന്തപുരം കന്റോൺമെന്റ് പൊലീസ് ആറ് കേസുകൾ രജിസ്റ്റർ ചെയ്തിട്ടുണ്ടെന്നാണ് റിപ്പോർട്ട്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്