“വടി ഒടിയും വരെ അടിച്ചു”; ഏഴാം ക്ലാസുകാരനെ അധ്യാപകൻ ക്രൂരമായി മർദിച്ചെന്ന് പരാതി; പൊലീസ് അന്വേഷണം

JUNE 25, 2026, 11:17 PM

ഇടുക്കി: അണക്കരയിൽ ഏഴാം ക്ലാസ് വിദ്യാർഥിയെ അധ്യാപകൻ മർദിച്ചെന്ന പരാതിയിൽ വണ്ടൻമേട് പൊലീസ് അന്വേഷണം ആരംഭിച്ചതായി റിപ്പോർട്ട്. മുട്ടിൽ നിർത്തിച്ച് കാലിൽ ചവിട്ടുകയും ചൂരൽ കൊണ്ട് മർദിക്കുകയും ചെയ്തെന്നാണ് കുട്ടിയുടെ ആരോപണം. സംഭവത്തിൽ പരിക്കേറ്റ വിദ്യാർഥി വണ്ടൻമേട് സർക്കാർ ആശുപത്രിയിൽ ചികിത്സ തേടി.

സംഭവം ഇന്നലെ ഉച്ചയ്ക്കുശേഷമാണ് നടന്നത്. തമിഴ് മീഡിയത്തിൽ പഠിക്കുന്ന വിദ്യാർഥിയെ അധ്യാപകൻ ശിവകുമാർ മർദിച്ചെന്നാണ് പരാതി. “വടി ഒടിയും വരെ തന്നെ അടിച്ചു” എന്നാണ് കുട്ടി പൊലീസിന് നൽകിയ മൊഴി.

കുട്ടിയുടെ അമ്മയും സംഭവത്തിൽ ഗുരുതര ആരോപണമാണ് ഉന്നയിച്ചത്. “മകൻ വേദനിച്ച് കരയുകയായിരുന്നു. ആ അവസ്ഥ കണ്ടപ്പോൾ വലിയ വിഷമമായി” എന്ന് അവർ പറഞ്ഞു. തുടർന്ന് കുട്ടിയെ സമീപത്തെ പ്രാഥമികാരോഗ്യ കേന്ദ്രത്തിലെത്തിക്കുകയും, ഡോക്ടർ വിവരമറിയിച്ചതിനെ തുടർന്ന് പൊലീസ് സ്ഥലത്തെത്തി കുട്ടിയുടെ മൊഴി രേഖപ്പെടുത്തുകയും ചെയ്തു.

അതേസമയം, ആരോപണം അധ്യാപകൻ നിഷേധിച്ചു. ക്ലാസിൽ ഓടിനടന്ന വിദ്യാർഥിയോട് ശാന്തമായി ഇരുന്ന് പുസ്തകം വായിക്കാൻ പറഞ്ഞെങ്കിലും, കുട്ടി കളിയാക്കി പുറത്തേക്ക് ഓടിയെന്നാണ് അദ്ദേഹത്തിന്റെ വിശദീകരണം. തിരിച്ചുവിളിച്ച് മുട്ടിന് താഴെ ചൂരൽ കൊണ്ട് രണ്ട് അടി മാത്രമാണ് നൽകിയതെന്നും, മറ്റ് തരത്തിലുള്ള മർദനം ഉണ്ടായിട്ടില്ലെന്നും അധ്യാപകൻ പറഞ്ഞു.

സംഭവത്തിൽ സ്കൂൾ അധികൃതർ അന്വേഷണത്തിന് ഉത്തരവിട്ടിട്ടുണ്ട്. ക്ലാസിലുണ്ടായിരുന്ന മറ്റ് വിദ്യാർഥികളിൽ നിന്ന് വിവരങ്ങൾ ശേഖരിക്കുന്നതിനായി പിടിഎ കമ്മിറ്റി അംഗങ്ങൾ ഇന്ന് സ്കൂളിലെത്തി മൊഴിയെടുക്കും.