സുപ്രീം കോടതിയിലെ സീനിയർ സ്റ്റാൻഡിംഗ് കൗൺസൽ നിയമനം വിവാദത്തിൽ; അഡ്വ. രമേഷ് ബാബുവിന്റെ നിയമനത്തിനെതിരെ ചട്ടലംഘന ആരോപണം

JULY 9, 2026, 1:29 AM

കൊച്ചി: അഡ്വ. രമേഷ് ബാബുവിനെ സുപ്രീം കോടതിയിലെ സീനിയർ സ്റ്റാൻഡിംഗ് കൗൺസലായി നിയമിച്ചതിനെതിരെ ചട്ടലംഘന ആരോപണം. നിലവിൽ നിലവിലില്ലാത്ത തസ്തികയിലേക്കാണ് നിയമനം നടത്തിയതെന്നാണ് ഉയരുന്ന ആക്ഷേപം.

1978-ലെ കേരള സർക്കാർ അഭിഭാഷകരുടെ നിയമന ചട്ടങ്ങളിൽ 'സീനിയർ സ്റ്റാൻഡിംഗ് കൗൺസൽ' എന്ന തസ്തികയെക്കുറിച്ച് പരാമർശമില്ലെന്നാണ് വിമർശനം. ചട്ടങ്ങളിൽ നിർവചിക്കാത്ത ഒരു പദവിയിലേക്ക് നിയമനം നടത്തിയത് നിയമപരമായി ചോദ്യം ചെയ്യപ്പെടാവുന്നതാണെന്നും, നിയമനത്തിന് മുമ്പ് ബന്ധപ്പെട്ട ചട്ടങ്ങളിൽ ഭേദഗതി വരുത്തിയിട്ടില്ലെന്നുമാണ് ആരോപണം.

രമേഷ് ബാബുവിന് സീനിയർ പദവി നൽകുന്നതുമായി ബന്ധപ്പെട്ട് അധികാരപരമായ വ്യക്തതയില്ലെന്ന ആക്ഷേപവും ഉയരുന്നുണ്ട്. കൂടാതെ, 65 വയസ്സ് കഴിഞ്ഞതിനാൽ സ്റ്റാൻഡിംഗ് കൗൺസൽ പദവിയിലേക്ക് പോലും അദ്ദേഹത്തെ നിയമിക്കാനാകില്ലെന്നാണ് ചില നിയമവിദഗ്ധരുടെ നിലപാട്.

മന്ത്രിസഭാ യോഗത്തിലെ തീരുമാനത്തിന്റെ അടിസ്ഥാനത്തിൽ നിയമവകുപ്പാണ് ഇന്നലെ രമേഷ് ബാബുവിന്റെ നിയമന ഉത്തരവ് പുറത്തിറക്കിയത്. എന്നാൽ നിയമനവുമായി ബന്ധപ്പെട്ട് ഉയരുന്ന ആരോപണങ്ങളിൽ സർക്കാർ ഇതുവരെ ഔദ്യോഗിക വിശദീകരണം നൽകിയിട്ടില്ല.

അതേസമയം, സർക്കാർ അഭിഭാഷകരുടെ നിയമനവുമായി ബന്ധപ്പെട്ട വിവാദങ്ങൾ ഇതാദ്യമല്ല. ഹൈക്കോടതിയിലെ സർക്കാർ പ്ലീഡർമാരുടെ നിയമനത്തിലും നേരത്തെ പരാതികൾ ഉയർന്നിരുന്നു. നിയമന നടപടികൾ പുനഃപരിശോധിക്കണമെന്ന ആവശ്യവുമായി ഇന്ത്യൻ ലോയേഴ്സ് കോൺഗ്രസും രംഗത്തെത്തിയിരുന്നു.

അനുഭവപരിചയം ഉൾപ്പെടെയുള്ള മാനദണ്ഡങ്ങൾ കൃത്യമായി പരിശോധിക്കാതെയാണ് സർക്കാർ അഭിഭാഷകരെ നിയമിച്ചതെന്നായിരുന്നു സംഘടനയുടെ ആരോപണം. അർഹതയില്ലാത്തവരുടെ നിയമനം സർക്കാരിന്റെ നിയമപോരാട്ടങ്ങളെ പ്രതികൂലമായി ബാധിക്കുമെന്നും, വിവാദമായ നിയമനങ്ങൾ പിൻവലിക്കണമെന്നും സംഘടന ആവശ്യപ്പെട്ടിരുന്നു. അല്ലാത്തപക്ഷം അനർഹരായവരുടെ പേരുകൾ പുറത്തുവിടുമെന്നും മുന്നറിയിപ്പ് നൽകിയിരുന്നു. ജില്ലാ സർക്കാർ അഭിഭാഷകരുടെ നിയമനങ്ങളിലും സമാനമായ ആശങ്കകൾ നിലനിൽക്കുന്നതായും സംഘടന വ്യക്തമാക്കിയിട്ടുണ്ട്.