കുടുംബശ്രീ മിഷനിൽ 134 കരാർ ജീവനക്കാരെ പിരിച്ചുവിട്ടു; നോട്ടീസ് പോലും നൽകാതെയെന്ന് പരാതി

JULY 2, 2026, 11:51 PM

തിരുവനന്തപുരം: സംസ്ഥാന കുടുംബശ്രീ മിഷനിൽ 134 കരാർ ജീവനക്കാരെ നോട്ടീസ് പോലും നൽകാതെ പിരിച്ചുവിട്ടതായി പരാതി. യുഡിഎഫ് സർക്കാർ അധികാരത്തിലെത്തിയതിന് പിന്നാലെയാണ് നടപടി. ദേശീയ നഗര ഉപജീവന ദൗത്യത്തിന്റെ (NULM) അടുത്ത ഘട്ട പദ്ധതി സംസ്ഥാനത്ത് ആരംഭിച്ചിട്ടില്ലെന്ന കാരണമാണ് സർക്കാർ ചൂണ്ടിക്കാട്ടുന്നത്.

അതേസമയം കണ്ണൂർ ഇരിട്ടി സ്വദേശിനിയായ ലെജു 2018 മുതൽ ജൂൺ 30 വരെ കുടുംബശ്രീ മിഷനിൽ കമ്മ്യൂണിറ്റി ഓർഗനൈസറായി ജോലി ചെയ്തിരുന്നു. ജൂൺ 30 വൈകിട്ട് സർക്കാർ ഉത്തരവ് ലഭിച്ചതോടെ, അടുത്ത ദിവസം മുതൽ ജോലിക്ക് ഹാജരാകേണ്ടതില്ലെന്ന് അറിയിക്കുകയായിരുന്നു. ഇത്തരത്തിൽ ഒരു മുൻകൂർ നോട്ടീസുമില്ലാതെയാണ് 134 ജീവനക്കാരെ ഒരുമിച്ച് ഒഴിവാക്കിയതെന്നാണ് ആരോപണം.

പിരിച്ചുവിട്ടവരിൽ 18 മുതൽ 20 വർഷം വരെ സേവനമനുഷ്ഠിച്ച ജീവനക്കാരുമുണ്ട്. ഉമ്മൻ ചാണ്ടി സർക്കാരിന്റെ കാലത്ത് നിയമിതരായവരും പുതിയ സർക്കാരിന്റെ കാലത്ത് ജോലി നഷ്ടപ്പെട്ടവരുടെ കൂട്ടത്തിലുണ്ട്.

ദേശീയ നഗര ഉപജീവന ദൗത്യത്തിന്റെ തുടർപദ്ധതിയായ ദീൻദയാൽ അന്ത്യോദയ യോജന – നാഷണൽ അർബൻ ലൈവ്‌ലിഹുഡ് മിഷൻ (DAY-NULM) സംസ്ഥാനത്ത് ആരംഭിച്ചിട്ടില്ലെന്നതാണ് സർക്കാർ നടപടിക്ക് കാരണമായി പറയുന്നത്. എന്നാൽ പദ്ധതി വ്യാപിപ്പിക്കുന്നതിനാൽ നിലവിലുള്ള ജീവനക്കാർക്ക് തുടരാമെന്ന് കേന്ദ്ര സർക്കാർ സംസ്ഥാനങ്ങൾക്ക് അയച്ച കത്തിൽ വ്യക്തമാക്കിയിട്ടുണ്ടെന്നാണ് ജീവനക്കാർ ചൂണ്ടിക്കാട്ടുന്നത്.

ഇതിനുപുറമെ, ഇവർക്ക് ഓഗസ്റ്റ് വരെ ശമ്പളം അനുവദിച്ച് തദ്ദേശസ്വയംഭരണ വകുപ്പ് ആദ്യം ഉത്തരവിറക്കിയെങ്കിലും, പിന്നീട് അത് തിരുത്തി ജൂൺ വരെയായി ചുരുക്കിയതായും ആരോപണമുണ്ട്.

പിരിച്ചുവിട്ടവരിൽ 50 വയസിന് മുകളിൽ പ്രായമുള്ളവരും ഉൾപ്പെട്ടിട്ടുണ്ട്. പുതിയ ജോലി കണ്ടെത്തുക ഇവർക്ക് ഏറെ ബുദ്ധിമുട്ടാകുമെന്നും ആശങ്ക ഉയരുന്നു.

പുതിയ രാഷ്ട്രീയ നിയമനങ്ങൾക്ക് വഴിയൊരുക്കാനാണ് ഇത്രയും പേരെ ഒരുമിച്ച് ഒഴിവാക്കിയതെന്ന ആരോപണവും ശക്തമാണ്. മാർച്ച് 31ന് അവസാനിച്ച കരാർ കാലാവധി ജൂൺ 30ന് ശേഷം പുതുക്കിനൽകാതെയാണ് പിരിച്ചുവിടൽ നടന്നത്. നിലവിൽ സേവനത്തിൽ തുടരുന്ന മറ്റ് കരാർ ജീവനക്കാർക്ക് സെപ്റ്റംബർ 30 വരെ മാത്രമാണ് കാലാവധി നീട്ടിയിരിക്കുന്നത്. തുടർന്ന് തങ്ങളുടെ ഭാവി എന്താകുമെന്ന ആശങ്കയിലാണ് അവർ.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്