തമിഴ്‌നാട്ടിൽ രാഷ്ട്രീയപ്പോര് മുറുകുന്നു: വിജയ് സർക്കാർ ആറുമാസം തികയ്ക്കില്ലെന്ന് ഡി.എം.കെ

MAY 17, 2026, 10:50 PM

ചെന്നൈ: തമിഴ്‌നാട് മുഖ്യമന്ത്രി ജോസഫ് വിജയ്‌ക്കും അദ്ദേഹത്തിന്റെ നേതൃത്വത്തിലുള്ള ടി.വി.കെ. സഖ്യ സർക്കാരിനുമെതിരെ രൂക്ഷവിമർശനവുമായി മുതിർന്ന ഡി.എം.കെ. നേതാവും തിരുച്ചെന്തൂർ എം.എൽ.എ.യുമായ അനിത രാധാകൃഷ്ണൻ. തമിഴ്‌നാട്ടിലെ പുതിയ ഭരണസംവിധാനം ആറുമാസം പോലും തികയ്ക്കില്ലെന്നും, കഴിഞ്ഞ ഏപ്രിലിൽ നടന്ന തിരഞ്ഞെടുപ്പിൽ പരാജയപ്പെട്ട ഡി.എം.കെ. അധ്യക്ഷൻ എം.കെ. സ്റ്റാലിൻ ഉടൻ തന്നെ മുഖ്യമന്ത്രി സ്ഥാനത്തേക്ക് തിരിച്ചെത്തുമെന്നും അദ്ദേഹം അവകാശപ്പെട്ടു. ദക്ഷിണ തമിഴ്‌നാട്ടിൽ നടന്ന ഒരു പാർട്ടി പരിപാടിയിൽ സംസാരിക്കുകയായിരുന്നു അദ്ദേഹം.

ഭരണകക്ഷിയായ തമിഴക വെട്രി കഴകത്തിന്റെ (TVK) മുതിർന്ന നേതാവും വില്ലിവാക്കം മണ്ഡലത്തിൽ നിന്ന് വിജയിക്കുകയും ചെയ്ത ആദവ് അർജുനനെ അനിത രാധാകൃഷ്ണൻ പരസ്യമായി വെല്ലുവിളിച്ചു:

"ഇനി വെറും നാല് മാസം മാത്രമാണ് ഈ സർക്കാരിന്റെ ആയുസ്സ്. ആദവ് അർജുനൻ എന്നൊരാളുണ്ട്, ധൈര്യമുണ്ടെങ്കിൽ എം.എൽ.എ. സ്ഥാനം രാജി വെക്കൂ; ഞാനും രാജി വയ്ക്കാം. നമുക്ക് തിരുച്ചെന്തൂരിൽ നേരിട്ട് ഏറ്റുമുട്ടാം. ഇത് ഞങ്ങളുടെ മണ്ണാണ്, ഇവിടെ ആരെയും ഞങ്ങൾ തോൽപ്പിക്കും."

കഴിഞ്ഞ 25 വർഷമായി അനിത രാധാകൃഷ്ണന്റെ ശക്തമായ കോട്ടയാണ് തിരുച്ചെന്തൂർ മണ്ഡലം. 2001-ൽ എ.ഐ.എ.ഡി.എം.കെ. ടിക്കറ്റിൽ ആദ്യമായി ഇവിടെ നിന്ന് ജയിച്ച അദ്ദേഹം, പിന്നീട് 2009 മുതൽ ഡി.എം.കെ.യിലൂടെ ഈ മണ്ഡലം നിലനിർത്തുകയായിരുന്നു.എന്നാൽ ഈ പ്രസ്താവനകളോട് മുഖ്യമന്ത്രിയുടെ ഓഫീസോ ടി.വി.കെ. നേതൃത്വമോ ഇതുവരെ പ്രതികരിച്ചിട്ടില്ല.

തമിഴ്‌നാട് രാഷ്ട്രീയത്തിൽ ദശാബ്ദങ്ങൾക്ക് ശേഷം നടന്ന ഏറ്റവും വലിയ അട്ടിമറിയായിരുന്നു വിജയ്‌യുടെ തിരഞ്ഞെടുപ്പ് വിജയം. ആകെയുള്ള 234 സീറ്റുകളിൽ 108 എണ്ണവും തൂത്തുവാരിയ ടി.വി.കെ, കഴിഞ്ഞ 62 വർഷമായി ഡി.എം.കെ.യും എ.ഐ.എ.ഡി.എം.കെ.യും മാറിമാറി ഭരിച്ചിരുന്ന തമിഴ്‌നാട് രാഷ്ട്രീയ ചരിത്രമാണ് തിരുത്തിക്കുറിച്ചത്.