നായകൻ' വീണ്ടും വരാർ; കമൽ മണിരത്‌നം ചിത്രം റീമാസ്റ്റർ പതിപ്പ് പ്രദർശനത്തിന്...

OCTOBER 30, 2025, 9:30 AM

ചിത്രം നവംബർ 06ന് വേൾഡ് വൈഡ് റീ റിലീസ് ചെയ്യും..

കമൽഹാസൻ മണിരത്‌നം ടീമിന്റെ 'നായകൻ' എന്ന ചിത്രം 38 വർഷത്തിനുശേഷം വീണ്ടും പ്രദർശനത്തിനെത്തുന്നു. കമൽഹാസൻ നായകനായ എക്കാലത്തെയും ഹിറ്റ് ചിത്രം നവംബർ 06ന് വേൾഡ് വൈഡ് ആയിട്ടാണ് റീ റിലീസ് ചെയ്യുന്നത്. ചിത്രം 4കെയിലാണ് പ്രദർശിപ്പിക്കുക. രഞ്ജിത്ത് മോഹൻ ഫിലിംസ് ആണ് നായകൻ കേരളത്തിൽ വിതരണത്തിന് എത്തിക്കുന്നത്. തമിഴിൽ പ്രദർശനത്തിന് എത്തിയ ചിത്രത്തിൽ മുംബൈയിലെ അധോലോക നായകന്റെ കഥയാണ് മുഖ്യപ്രമേയം. 1987ൽ പുറത്തിറങ്ങിയ നായകൻ കമൽ മണിരത്‌നം കൂട്ടുകെട്ടിൽ പിറന്ന ക്ലാസിക് ചിത്രമായാണ് വിലയിരുത്തപ്പെടുന്നത്. പിതാവിന്റെ കൊലപാതകത്തിന് പ്രതികാരം ചെയ്തശേഷം മുംബൈയിലെത്തി അധോലോക നായകനായി മാറിയ വേലുനായ്ക്കർ എന്ന കഥാപാത്രത്തെയാണ് കമൽ അവതരിപ്പിച്ചത്. ചിത്രത്തിലൂടെ അക്കൊല്ലത്തെ ദേശീയ ചലച്ചിത്ര പുരസ്‌കാരത്തിൽ കമൽ മികച്ച നടനായി. പി.സി. ശ്രീരാം ഛായാഗ്രാഹണത്തിന് അവാർഡ് നേടി. കലാസംവിധാനത്തിന് തോട്ട ധരണിയും ദേശീയ അവാർഡ് നേടിയപ്പോൾ കമൽഹാസന്റെ നായകൻ ഓസ്‌കറിനുള്ള ഇന്ത്യയുടെ ഔദ്യോഗിക എൻട്രിയായും തെരഞ്ഞെടുക്കപ്പെട്ടിരുന്നു.

മണിരത്‌നം ബാലകുമാരനുമായി ചേർന്നാണ് ചിത്രത്തിന്റെ തിരക്കഥ എഴുതിയത്. സാമ്പത്തികമായ വിജയം നേടുക മാത്രമല്ല ചിത്രത്തിന് നീരൂപ പ്രശംസയും ലഭിച്ചു എന്നിടത്താണ് കമൽഹാസന്റെ നായകന്റെ വിജയത്തിന്റെ പ്രാധാന്യം വർദ്ധിക്കുന്നത്. കമൽഹാസന്റെ എക്കാലത്തെയും മികച്ച ഒരു കഥാപാത്രമായി വേലുനായ്ക്കർ മാറി. ശരണ്യയും കാർത്തികയും ഡൽഹി ഗണേശും നാസറും ചിത്രത്തിൽ മറ്റ് പ്രധാന വേഷങ്ങളിൽ നായകനായ കമൽഹാസനൊപ്പം എത്തി. സുജാത ഫിലിംസ് മുക്ത ഫിലിംസ് എന്നീ ബാനറുകളിൽ മുക്ത വി രാമസ്വാമി, മുക്ത ശ്രീനിവാസൻ, ജി. വെങ്കിടേശ്വരൻ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. ചിത്രത്തിന്റെ കാസ്റ്റിംഗും ഡയലോഗുകളും ക്യാമറയും സംഗീതവുമെല്ലാം മികവുറ്റതായിരുന്നു. അതിനെല്ലാം പരസ്പരം ഒരു ബാലൻസ് ഉണ്ടായിരുന്നു. ഒന്നും മുഴച്ചു നിൽക്കാതെ മണിരത്‌നം അതിനെയെല്ലാം സമന്വയിപ്പിക്കുകയായിരുന്നു. ഇളയരാജയുടെ സംഗീതവും ആ ക്ലാസിക്കിനെ പൂർണതയിൽ എത്തിക്കാൻ സഹായിച്ചു. എഡിറ്റർ: ബി.ലെനിൻ, വി.ടി. വിജയൻ, ഡയലോഗ്: ബാലകുമാരൻ, അർത്ഥിത്തരണി, സൗണ്ട് മിക്‌സ്: എ. എസ്. ലക്ഷ്മി നാരായൺ, ത്രിൽസ്: സൂപ്പർ സുബ്ബരായൻ, പ്രമോഷൻ കൺസൾട്ടന്റ്: സിനാൻ, വാർത്ത പ്രചരണം: പി.ശിവപ്രസാദ് എന്നിവരാണ് മറ്റ് അണിയറ പ്രവർത്തകർ.