‘അസ്കൻഷൻ’ വരുന്നു; ആൽഫോൻസോ ക്വാറോണും ആപ്പിൾ ടിവിയും വീണ്ടും ഒന്നിക്കുന്നു

AUGUST 11, 2026, 10:06 PM

‘ഹാരി പോട്ടർ ആൻഡ് ദ പ്രിസണർ ഓഫ് അസ്കബാൻ’ ഒരുക്കിയ പ്രശസ്ത സംവിധായകൻ ആൽഫോൻസോ ക്വാറോൺ വീണ്ടും ആപ്പിൾ ടിവിയുമായി കൈകോർക്കുന്നു. ‘ഡിസ്ക്ലെയ്മർ’ എന്ന പരമ്പരയ്ക്ക് ശേഷം ഇരുവരും ഒന്നിക്കുന്ന പുതിയ പരമ്പരയാണ് ‘അസ്കൻഷൻ’. ‘ഔട്ട്‌ലാൻഡർ’ എന്ന പരമ്പരയിലൂടെ ശ്രദ്ധേയയായ കെയ്റ്റ്രിയോണ ബാല്ഫെയാണ് പ്രധാന വേഷത്തിലെത്തുന്നത്.

ക്രിസ്റ്റ്യൻ വൈറ്റും നതാലി എറിക്ക ജെയിംസും ചേർന്നാണ് പരമ്പരയുടെ മേൽനോട്ടം വഹിക്കുന്നത്. നതാലി എറിക്ക ജെയിംസ്, ക്രിസ്റ്റ്യൻ വൈറ്റ്, ആൽഫോൻസോ ക്വാറോൺ, കാർലോസ് ക്വാറോൺ എന്നിവർ ചേർന്നാണ് തിരക്കഥ ഒരുക്കുന്നത്. പരമ്പരയിലെ പ്രധാന സംവിധാന ചുമതല നതാലി എറിക്ക ജെയിംസിനാണ്.

ആഡം നെവിലിന്റെ ‘ലാസ്റ്റ് ഡേയ്സ്’ എന്ന നോവലിൽനിന്ന് പ്രചോദനം ഉൾക്കൊണ്ടാണ് ‘അസ്കൻഷൻ’ ഒരുങ്ങുന്നത്. തിന്മയുടെയും നിഷ്കളങ്കതയുടെയും ഏറ്റവും സങ്കീർണമായ തലങ്ങളിലേക്കാണ് പരമ്പര പ്രേക്ഷകരെ കൊണ്ടുപോകുന്നത്. പ്രിയപ്പെട്ടവരെ സംരക്ഷിക്കുന്നതിനായി മനുഷ്യർ എത്രത്തോളം പോകും, അതിനായി എന്തെല്ലാം ത്യജിക്കാൻ തയ്യാറാകും എന്ന ചോദ്യമാണ് കഥയുടെ പ്രധാന പ്രമേയം.

‘ഔട്ട്‌ലാൻഡർ’ പരമ്പരയ്ക്ക് ശേഷം കെയ്റ്റ്രിയോണ ബാല്ഫെയുടെ ടെലിവിഷൻ തിരിച്ചുവരവ് കൂടിയാണ് ‘അസ്കൻഷൻ’. ‘സെൻസ് ആൻഡ് സെൻസിബിലിറ്റി’, ‘ദ ഹൗസ്‌കീപ്പർ’, ‘എ ലോങ് വിന്റർ’ തുടങ്ങിയ ചിത്രങ്ങളിലും താരത്തെ ഉടൻ കാണാനാകും.

രഹസ്യങ്ങളും മനുഷ്യബന്ധങ്ങളിലെ സംഘർഷങ്ങളും തിന്മയും നിഷ്കളങ്കതയും തമ്മിലുള്ള അതിർവരമ്പുകളും പ്രമേയമാക്കുന്ന പരമ്പരയായതിനാൽ ‘അസ്കൻഷൻ’ പ്രഖ്യാപനം സിനിമാ-പരമ്പരാ പ്രേമികൾക്കിടയിൽ ഇതിനോടകം തന്നെ ശ്രദ്ധ നേടിയിരിക്കുകയാണ്.