പ്രിയങ്ക ചോപ്രയും റസ്സൽ ക്രോയും ഒന്നിക്കുന്നു

AUGUST 11, 2026, 10:12 PM

പ്രിയങ്ക ചോപ്രയും ഓസ്കർ പുരസ്കാര ജേതാവായ റസ്സൽ ക്രോയും ആദ്യമായി ഒരുമിക്കുന്ന പുതിയ ചിത്രമാണ് ‘ബ്ലൂഫ്ലൈ’. ശാസ്ത്രകൽപ്പിത പശ്ചാത്തലത്തിലുള്ള ആക്ഷൻ ത്രില്ലറായ ചിത്രത്തിന്റെ സംവിധാനം ‘പ്രിഡേറ്റേഴ്സ്’ എന്ന ചിത്രത്തിലൂടെ ശ്രദ്ധേയനായ നിമ്രോഡ് ആന്റൽ നിർവഹിക്കും. ഡേവിഡ് ഫ്രിജെറിയോ, വില്യം യൂബാങ്ക്, കാർലൈൽ യൂബാങ്ക് എന്നിവർ ചേർന്നാണ് ചിത്രത്തിന്റെ തിരക്കഥ ഒരുക്കുന്നത്.

കോംഗോയുടെ ആഴമേറിയ പ്രദേശങ്ങളിലാണ് ചിത്രത്തിന്റെ കഥ നടക്കുന്നത്. ദുഃഖത്തിൽ കഴിയുന്ന ഐക്യരാഷ്ട്ര സംഘടനയുടെ ഒരു പരിഭാഷകയെ കേന്ദ്രീകരിച്ചാണ് കഥ മുന്നോട്ടുപോകുന്നത്. ഔദ്യോഗിക രേഖകളിൽ പോലും നിലവിലില്ലെന്ന് പറയപ്പെടുന്ന ദുരൂഹമായ ഒരു തകർന്ന വിമാനത്തെ കണ്ടെത്തുന്നതിനുള്ള രഹസ്യ ദൗത്യത്തിലേക്ക് ഇവർ അപ്രതീക്ഷിതമായി എത്തിപ്പെടുന്നു.

സായുധസംഘങ്ങളുടെ നിയന്ത്രണത്തിലുള്ള പ്രദേശങ്ങളിലൂടെ പ്രത്യേക സേനാ സംഘം നദിയിലൂടെ യാത്ര തിരിക്കുന്നതോടെയാണ് കഥ കൂടുതൽ അപകടകരമായ വഴിയിലേക്ക് നീങ്ങുന്നത്. വിമാനത്തിനടുത്തേക്ക് എത്തുന്തോറും ദൗത്യത്തിന്റെ യഥാർഥ ലക്ഷ്യത്തെക്കുറിച്ചുള്ള ഞെട്ടിക്കുന്ന സത്യങ്ങൾ അവർ തിരിച്ചറിയുന്നു. ആ വിമാനം തിരികെ കൊണ്ടുവരാനല്ല തങ്ങളെ അവിടേക്ക് അയച്ചതെന്ന തിരിച്ചറിവാണ് സംഘത്തെ കാത്തിരിക്കുന്നത്.

മൈക്കൽ ജെഫേഴ്സൺ, ഡേവിഡ് ഫ്രിജെറിയോ, ഡെബോറ ഗ്ലോവർ, അരിയാനെ ഫ്രേസർ, ഡെൽഫിൻ പെറിയർ, വനേസ യാവോ ഗുവോ എന്നിവർ ചേർന്നാണ് ചിത്രം നിർമിക്കുന്നത്. ലിയ ബുമാൻ, ഗൈ ഡേവീസ്, റൂത്ത്ആൻ ഫ്രിജെറിയോ, ബ്രയാൻ കവനോ-ജോൺസ്, ജേസൺ ക്രിങ്സ്റ്റീൻ, കാറ്റി ലിയറി, സ്കോട്ട് ലെവൻസൺ, ജെയിംസ് നോർബറി എന്നിവർ സഹനിർമാതാക്കളായും പ്രവർത്തിക്കുന്നു.

ചിത്രത്തിന്റെ ആഗോള വിതരണാവകാശങ്ങൾ ഹൈലാൻഡ് ഫിലിം ഗ്രൂപ്പിനാണ്. ടൊറന്റോ അന്താരാഷ്ട്ര ചലച്ചിത്രമേളയുടെ വിപണിയിലൂടെയാണ് ചിത്രത്തിന്റെ വിതരണാവകാശ വിൽപ്പന ആരംഭിക്കുക. ഈ വർഷം അവസാനത്തോടെ ഓസ്ട്രേലിയയിലെ ഗോൾഡ് കോസ്റ്റിൽ ചിത്രീകരണം ആരംഭിക്കുമെന്നാണ് റിപ്പോർട്ട്.

അതേസമയം, ‘ഗ്ലാഡിയേറ്റർ’ എന്ന ചിത്രത്തിലൂടെ ഓസ്കർ പുരസ്കാരം നേടിയ റസ്സൽ ക്രോ അടുത്തിടെ ‘ന്യൂറംബർഗ്’ എന്ന ചിത്രത്തിലും അഭിനയിച്ചിരുന്നു. നിരവധി പുതിയ ചിത്രങ്ങളും താരത്തിന്റേതായി അണിയറയിൽ ഒരുങ്ങുന്നുണ്ട്.

പ്രിയങ്ക ചോപ്രയാകട്ടെ, അടുത്തിടെ ‘ദ ബ്ലഫ്’ എന്ന ചിത്രത്തിൽ പ്രധാന വേഷത്തിലെത്തി. ഇദ്രിസ് എൽബ, ജോൺ സീന എന്നിവർക്കൊപ്പം ‘ഹെഡ്സ് ഓഫ് സ്റ്റേറ്റ്’ എന്ന ചിത്രത്തിലും താരം അഭിനയിച്ചിരുന്നു. എസ്. എസ്. രാജമൗലി സംവിധാനം ചെയ്യുന്ന പുതിയ ബിഗ് ബജറ്റ് ചിത്രമായ ‘വാരണാസി’യിലും പ്രിയങ്കയാണ് നായിക. ചിത്രം 2027 ഏപ്രിലിൽ പ്രേക്ഷകരിലേക്കെത്തുമെന്നാണ് വിവരം.